Ka Rauka ia Koe te Tavini i te Ngai Anoano Maataia te Papuritia Patireia?

“E oraanga tau ua to matou i Marike inara kua manamanata maua ko te riro te oraanga anoano maata i te apinga materia i reira ei akatupu i te kino kia maua e ta maua nga tamariki tamaroa. Kua tavini ana maua ko taku vaine ei nga mitinari i mua ana, e kua inangaro maua kia kite akaou i taua tu oraanga ngoie ua e te mataora.”

AKAMAROIROIIA e taua anoano ra, no reira i te mataiti 1991, kua manako a Ralph raua ko Pam i te tata atu ki te au opati manga i te akakite i to raua anoano kia tavini i te ngai e anoano maataia ra te au papuritia o te Patireia. Kua pau mai te opati manga i Meiko e te anoano maataia ra te au papuritia o te Patireia te ka rauka i te tutu aere ki te au tangata tuatua reo Papaa i taua enua ra. Ko taua koro ra, i akakite ei te opati manga, kua ‘teatea ïa i te mou.’ (Ioa. 4:35) Kare i roa i muri mai, kua ariki a Ralph raua ko Pam e ta raua nga tamariki tamaroa e 8 mataiti tetai e 12 tetai, i taua patianga ra e kua akateateamamao i te neke atu ki Meiko.

E Ngai Maata

Kua akakite a Ralph e: “I mua ake ka akaruke ei matou ia Marike, kua karanga mai tetai au taeake e te au tuaine kia maua ma te akakoroanga meitaki ua e: ‘Kare te neke ki tetai enua ke i te mea meitaki!’ ‘Peea me rokoia kotou i te maki?’ ‘Eaa korua ka aere ei ka tutu aere i roto i tetai ngai tuatua reo Papaa? Kare te aronga tuatua reo Papaa i reira e inangaro mai i te tuatua mou!’ Inara, kua ngaueue kore rai to maua manako. No te mea, kua akamanako meitaki rai maua i ta maua tukuanga tika. Kua manakonako mai ana maua i teia no tetai au mataiti. Kare maua i akao ana ia maua ki roto i te kaiou te ka roa i te tutaki anga, kua akaputuputu maua i te moni, e kua uriuri manako ki to maua pamiri no tetai au taime no runga i te au tu ngata ta matou ka aro atu.”

Te mea mua, kua aere atu a Ralph e tona pamiri i te aravei i te opati manga i Meiko. Kua akaari mai te au taeake i reira i tetai mapu no te enua katoa kia ratou e kua akakite atu kia ratou e, “Teia ta kotou ngai ka angaanga!” Kua noo te pamiri ki San Miguel de Allende, tetai oire, e maata rai te au tangata no te au enua tuketuke mai, e 240 kiro mita ki te tua apatokerau opunga o Mexico City. E toru mataiti i muri ake i to ratou tae atu anga, kua akatumuia tetai putuputuanga tuatua reo Papaa, e 19 papuritia i taua oire ra. Ko te putuputuanga tuatua reo Papaa mua te reira i Meiko—inara e maata atu rai te angaanga e vaira.

Mei tetai okotai mirioni au tangata Marike e noo ra i Meiko. Kapiti katoa atu ki te reira, e maata ua atu te au tangata Meiko kua tereniia mei te au taote te au roia e te aronga apiipii e tuatua ana i te reo Papaa. Kua akamarama mai a Ralph e: “Kua pure matou kia maata mai te aronga angaanga. E vaoo ua ana matou i tetai pia moe no te au taeake e te au tuaine e aere mai ana i te ‘tutaka aere i te enua,’ i na te reira tuatua ai.”—Nume. 13:2.

Akangoie ua Ratou i to Ratou Oraanga kia Maata atu to Ratou Taime i te Tutu Aere

Kare i roa ana e maata te au taeake tei tae mai e te au tuaine, tei inangaro i te akamaata atu i to ratou taime i te tutu aere. Ko Bill raua ko Kathy tetai o ratou mei Marike mai. Kua tavini ana raua e 25 mataiti i te au ngai te anoano maataia ra te au papuritia. Te manako ra raua i te apii i te reo Paniora, inara kua taui ta raua parani i te neke atu anga raua ki te oire ko Ajijic i te pae i te Roto o Chapala, e ngai manea tikai e nooia ana e te aronga ritaea no Marike mai. Kua akamarama mai a Bill e, “I Ajijic kua akamaata atu maua i te taime i te kimi aere i te au tangata tuatua reo Papaa tei inangaro kia kite i te tuatua mou.” I roto ua i te rua mataiti i muri ake i te tae atu anga ki taua oire ra, kua rekareka tikai a Bill raua ko Kathy no te mea kua kite raua i te akatumuia anga te rua o te putuputuanga tuatua reo Papaa i Meiko.

Ko Ken raua ko Joanne no Kanata mai, kua inangaro raua i te akangoie ua i to raua oraanga e kia akapou maata atu i te taime ki te au angaanga a te Patireia. Kua neke katoa atu raua kia Meiko. Kua akakite a Ken, “Kua roa rai i matau ei maua i te noo ki tetai ngai penei kare e rauka te vai maana, kare e uira, me kore kare e angaanga ana te terepaoni no tetai au ra.” Inara, kua riro te angaanga tutu aere ei akamaroiroianga tikai. Kare i roa kua ikiia a Ken ei tavini tauturu e e rua mataiti i muri mai, ei tangata pakari. I te akamataanga, e ngata tikai no ta raua tamaine ko Britanny te piri ki roto i tetai putuputuanga tuatua reo Papaa meangiti ua, kare e maata ana te mapu i roto. Inara, i muri ake i tona piri anga ki roto i te au angaanga patu Are Uipaanga Patireia, e maata te aronga tana i akataeake atu i Meiko.

Ko Patrick raua ko Roxanne no Texas mai i Marike, kua rekareka raua i te akarongo anga no runga i te ngai angaanga mitinari kare i mamao roa, e e tuatua reo Papaa ana te tangata i reira. “Muri ake i te aere anga ki Monterrey, tetai oire i te tua apatokerau itinga o Meiko, kua manako maua e te arataki ra a Iehova ia maua ki reira kia tauturu,” i na Patrick ei. I roto ua i te rima ra kua rauka ia raua i te oko atu i to raua kainga i Texas e kua ‘ano atu ki Makedonia,’ i na te reira tuatua ai. (Anga. 16:9) Ngata tikai e rauka mai ei te moni ei ngaki ia raua, inara i roto ua i te rua mataiti, kua mataora tikai raua i te kite i tetai manga pupu ua e 17 Au Kite, i te riro mai anga ei putuputuanga o tetai 40 papuritia.

Ko Jeff raua ko Deb tetai nga tokorua tei akangoie ua i to raua oraanga kia akamaata atu i to raua taime i te tutu aere. Kua oko raua i to raua aka kainga maatamaata i Marike e kua neke atu ki tetai manga apatimani ua i Cancún, tetai oire maata i te pae tai i te tua itinga o Meiko. I te tuatau i topa, kua matau ua raua i te aere ki te au akaputuputuanga i roto i te au are akaanuanuia vaitata ua mai ki to raua kainga. I teianei ra, ka aere raua e varu ora e tae atu ei ki te akaputuputuanga vaitata roa atu, i roto i te reo Papaa, e raveia ana i te ngai tarekareka i vao ua i te atea. Inara kua mareka tikai raua i te kite i te akatumuangaia tetai putuputuanga e 50 papuritia i Cancún.

Kua akamata katoa tetai au taeake e te au tuaine Meiko i te tauturu i te angaanga tutu aere i roto i te reo Papaa. Ei akaraanga, i te akarongo anga a Rubén e tona pamiri e kua akatumuia te putuputuanga tuatua reo Papaa mua i San Miguel de Allende, e ko Meiko katoatoa te ngai angaanga o taua putuputuanga ra, i reira rai kua aere atu ratou i te tauturu. Tera i reira te aiteanga, ka anoanoia ratou kia apii i te reo Papaa kia akamatau ia ratou ki te au peu tuketuke, e te aere mamao anga—800 kiro mita i te au epetoma ravarai—kia tae ki te au uipaanga. Kua akakite a Rubén e: “Kua rekareka tikai matou i te akakitekite atu ki te au manuiri tei noo ana i Meiko no tetai au mataiti inara kua akarongo i te karere o te tuatua meitaki i roto i to ratou uaorai reo no te taime mua. Tetai papaki ia ratou, kua akakite mai kia matou, i to ratou mareka ma te aue.” I muri ake i te tauturu anga i te putuputuanga i San Miguel de Allende, kua tavini a Rubén e tona pamiri ei au painia i roto i te oire ko Guanajuato, i Meiko rotopu, te ngai i tauturu ei ratou i te akatumu i tetai putuputuanga reo Papaa e 30 tuma au papuritia. Teia tuatau, te tavini nei ratou i roto i tetai pupu tuatua reo Papaa i Irapuato, tetai oire vaitata mai ki Guanajuato.

Tutu Anga ki te Aronga Ngata i te Aravei Atu

Kapiti atu ki te au manuiri, e maata te au tangata Meiko e tuatua Papaa ana. Te maataanga i te taime e ngata i te akakitekite atu i te karere o te Patireia kia ratou no te mea te noo ra ratou ki roto i te au ngai o te aronga moni, e au tavini vaine ua te vai mai ana i te ngutupa. Mei te mea ra e ko te pu ngutuare te ka aere mai ki te ngutupa, penei kare ratou e inangaro i te akarongo mai i ta tatou karere no te mea te manako ra ratou e e akapupuanga akonoanga meangiti ua te Au Kite o Iehova i reira. E oti akera, me araveiia atu taua au tu pu ngutuare ra e te Au Kite mei te au enua ke mai, ka akarongo ua mai tetai pae ia ratou.

Ka akamanako ana i te akaraanga o Gloria i roto i te oire maata ko Querétaro, i Meiko rotopu. Kua akamarama mai aia e: “Kua araveiia mai ana au i mua ana e te Au Kite tuatua reo Paniora kare ra oki au i akarongo ana kia ratou. Inara, i te tupu anga te au manamanata ki toku pamiri e te au taeake, kua taitaia tikai au e kua pure ki te Atua, i te pati akatenga kiaia kia tauturu mai iaku i te kimi i tetai ravenga. I muri poto ua mai i te reira, kua tapae mai tetai vaine tuatua reo Papaa ki toku kainga. Kua ui mai aia kiaku e me e tangata tuatua Papaa tetai i roto i te ngutuare. No te mea e e manuiri aia, kua inangaro au kia kite no runga iaia, e kua akakite atu au kiaia e e tuatua Papaa ana au. Iaia e tuatua maira, te manako ra au e, ‘Eaa ra te angaanga a teia vaine Marike i konei?’ Inara kua pati oki au ki te Atua no tetai akairo. No reira penei e ko teia manuiri ta te Atua pauanga ki taku pure.” Kua ariki a Gloria i tetai apii Pipiria e kua tere viviki atu tona turanga ki mua e kua papetitoia, noatu te patoianga a te pamiri. Teianei, te tavini nei a Gloria ei painia tamou, e te tavini katoa nei tana tane e ta raua tamaiti ia Iehova.

Tutaki no te Aronga tei Akamaata atu i to Ratou Taime i te Tutu Aere

E maata rai te au akaaoanga o te tavini anga ki te ngai e anoano maataia ra te au papuritia, inara e maata katoa rai te tutaki. Kua akakite a Ralph, tei taikuia i te akamataanga e: “Kua rave ana matou i te au apii Pipiria ki te au tangata no Peritane mai, no Tinito, no Tiamaika, no Tuitene, e ki te ui ariki katoa no Kaana mai. Kua piri atu tetai pae o teia aronga apii Pipiria ki roto i te angaanga orometua tamou. I te au mataiti tei aereia mai ana, kua kite ana to matou pamiri i te akatumuia anga e itu au putuputuanga Papaa. Kua kapiti mai ta maua nga tamariki tamaroa kia maua i te painia anga, e i teianei te tavini nei raua i ko i te Betela i Marike.”

I Meiko, e 88 putuputuanga tuatua reo Papaa i teianei e pera katoa te au pupu e manganui. Eaa ra te tumu no teia tupuanga viviki? E maata ua atu te au tangata tuatua reo Papaa i Meiko kare rava i tuatua ana ki te Au Kite o Iehova. Kua akarongo mai tetai papaki no te mea kare e tamanamanata mei to ratou pamiri e te au taeake, te ka riro ei arai ia ratou mei ta ratou rai i kite ana i to ratou enua anau. Noatu ra kua ariki tetai papaki i te patianga kia apii i te Pipiria no te mea kua ritaea ratou e maata to ratou taime i te aruaru i te au mea pae vaerua. Tetai katoa, kua tere atu i te okotai toru o te au papuritia i roto i te au putuputuanga tuatua reo Papaa e tavini ra ei au painia, tei riro ei tauturu maata ki te tu toto mapu e te tu tutupu i roto i te au putuputuanga.

Tapapa Maira te Au Akameitakianga ia Koe

Kare e ekoko e maata te tangata i roto i teianei ao te ka ariu meitaki ua mai ia ratou e akarongo ra i te karere o te Patireia e tutuia atura kia ratou i roto i to ratou uaorai reo. No reira e akamaroiroianga tikai te kite e e maata ua atu te au taeake e te au tuaine pakari i te pae vaerua—te aronga mapu e te pakari, te aronga kare i akaipoipo e tei akaipoipo—tei inangaro puareinga ua i te neke ki te au ngai e anoano maataia ra te aronga akakitekite i te Patireia. E tika, penei ka rauka ia ratou i te akakoromaki i te au tu ngata, inara e au mea rikiriki ua teia me akaaiteia atu ki te mataora ta ratou e kite ra me aravei ratou i te au tangata tei ariki mai i te tuatua mou. Ka rauka ainei ia koe i te rave i tetai au akatanotanoanga te ka tauturu ia koe kia neke ki tetai ngai i toou enua me kore ki tetai enua ke e anoano maataia ra te aronga tutu aere i te Patireia?a (Luka 14:28-30; 1 Kori. 16:9) Me koia ia, kia papu ia koe e e maata ua atu te au akameitakianga ka rauka ia koe.

[Tataanga Rikiriki i Raro]

[Pia i te kapi 21]

Kiteaia mai te Tu Mataora o te Aronga Ritaea

Kua neke atu a Beryl mei Peritane ki Kanata. Kua angaanga aia i reira ei manitia no tetai au kamupani i te pa enua. Kua riro katoa mai aia ei vaine karape i te akaoro oroenua e kua iki katoaia aia ei mata no Kanata ki te Tarekareka Olympic i te mataiti 1980. I tona ritaea anga ki Chapala, i Meiko, e kaikai ana a Beryl raua ko tana tane i roto i te au are kai i reira. I tona kite atu anga i tetai aronga ritaea tuatua Papaa e mataora ua ra, kua aere atu aia i te aravei ia ratou e kua ui atu e eaa ta ratou angaanga i Meiko. Te maataanga o teia au tangata mataora nei, e Au Kite no Iehova. Kua akamanako a Beryl raua ko tana tane e mei te mea e no te kite i te Atua e rauka mai ei te mataora e te akakoroanga i roto i te oraanga, i na, ka inangaro katoa rai raua kia kite iaia. I muri ake i te aere anga ki te au uipaanga Kerititiano no tetai au marama kua ariki a Beryl i tetai apii Pipiria. No te au mataiti tei aereia, kua rauka ia Beryl kia tavini ei painia tamou.

[Pia i te kapi 22]

“E Akameitakianga Tikai Ratou kia Matou”

Te aronga tei neke ki te au enua e anoano maataia ra te au papuritia o te Patireia, kua mareka tikai te au taeake i reira, ia ratou. Kua tata mai tetai opati manga i te Karapieni e: “Naringa ka akaruke te anere ua atu au manuiri e tavini ra i konei, kare e meitaki roa te turanga o te au putuputuanga i konei. E akameitakianga tikai ratou kia matou.”

Te akakite ra te Tuatua a te Atua e ‘na te nuku tamaine maata i akakite’ i te tuatua meitaki. (Sala. 68:11) No reira, kare i te mea poitirere e e maata ua atu te au tuaine kare i akaipoipo tei kapiti atu ki te aronga e tavini ra i te au enua ke. E tauturu maata tikai taua au tuaine ra tei akaatinga ia ratou uaorai. Kua akakite tetai opati manga i Europa Itinga e: “I roto i te au putuputuanga e manganui, e maata ua atu te au tuaine, i tetai au taime e taeria ana te 70 patene. Te maataanga ia ratou, e ou ua i roto i te tuatua mou, inara e puapinga maata tikai te tauturu a te au tuaine painia kare i akaipoipo no te au enua ke mai, i roto i te tereni anga i taua aronga ou ra. E puapinga maata tikai teia au tuaine no te au enua ke mai kia matou!”

Eaa ra te manako o taua au tuaine ra no runga i te tavini anga i roto i te au enua ke? “E maata ua atu te au akaaoanga,” i karanga ai a Angelica, tetai tuaine e 30 tuma ona mataiti, tei tavini ana no tetai au mataiti i roto i tetai au enua ke ei painia kare i akaipoipo. “Iaku e rave ra i tetai tukuanga angaanga, e tauta pakari ana au i te aere na roto i te vari i runga i te au mataara i tera ra i tera ra, e e maata te au tangata taku i kite e mamae ua ra e kua riro teia ei akataitaia iaku. Inara kua mareka tikai au i te tauturu i te tangata i roto i te angaanga orometua. Kua tukia katoa toku ngakau i te au tuatua akameitaki a te au tuaine i reira tei akameitaki mai iaku no te aere mai i te tauturu ia ratou. Kua akakite mai tetai tuaine kiaku e kua riro taku akaraanga i te aere mai anga mei tetai ngai mamao ki tona enua kia tavini ei painia, ei akamaroiroi iaia kia rave katoa te angaanga orometua tamou.”

Kua karanga a Sue, tetai painia e 50 tuma ona mataiti e: “Papu roa e ka aro atu koe i te au akaaoanga, inara kare teia e rauka kia akaaiteia atu ki te au akameitakianga ka rauka mai ia koe. E mea mataora tikai te angaanga orometua! I te mea e maata toku taime e pou ana i te angaanga kapiti e te au tuaine mapu, e akakite ana au kia ratou i taku i mou mai mei roto i te Pipiria e ta tatou au puka no runga i te mataara no te akono atu i te au arairaianga. E akakite ua mai ana ratou kiaku e kua riro taku akaraanga no te akakoromaki i te au manamanata iaku e tavini ra no tetai au mataiti e manganui ei painia kare i akaipoipo, ei tauturu ia ratou kia kite e ka rauka katoa ia ratou kia autu i te au akaaoanga i roto i to ratou oraanga. Kua riro te tauturu anga i teia au tuaine ei marekaanga maata kiaku.”

[Mapu i te kapi 20]

(No runga i teia, akara i te puka)

MEIKO

Monterrey

Guanajuato

Irapuato

Ajijic

Chapala

Roto o Chapala

San Miguel de Allende

Querétaro

MEXICO CITY

Cancún

[Tutu i te kapi 23]

Kua rauka i tetai aronga te rekareka maata o te akakitekite anga ki te au manuiri tei akarongo ki te tuatua meitaki no te taime mua