Ka Ui ta Tatou Aronga Tatau . . .
E rave ana rai te Au Kite o Iehova i te rapakauanga temeio?
▪ Kare rava te Au Kite o Iehova e rave ana i te peu rapakauanga temeio. Mei ia Iesu rai, kua irinaki ratou e ko ta ratou angaanga maata roa atu koia oki ko te tutu anga i te tuatua meitaki o te Patireia o te Atua. Irinaki katoa ratou e ko te akairo o te au Kerititiano mou, kare ko te rapakauanga temeio mari ra ko tetai apinga puapinga maata rava atu.
Tika rai, ko te rapakauanga aroa i te anere mataiti mua T.N. tei raveia e Iesu Karaiti, e puapinga maata kia tatou ravarai. Nana i reira i akapapu meitaki mai e i raro ake i tana tutaraanga ei Ariki no te Patireia o te Atua, “kare oki to reira e karanga e, Kua maki au.”—Isaia 33:24.
Akapeea i reira i teia tuatau? Te karanga ra te aronga rapakauanga temeio i roto ia Kerititome, pera katoa i roto i tetai atu au akonoanga kare i te Kerititiano, e ka rauka ia ratou i te akaora temeio i te maki. Tera ra, kua akamatakite pakari a Iesu uaorai i tetai ua atu e karanga ra e “kua rave i te au akairo e manganui” i roto i tona ingoa. Ka karanga atu aia kia ratou e: “Kare takiri au i kite ia kotou: ka aere ke atu kotou, te aronga rave tuatua kino.” (Mataio 7: 22, 23) No reira, te akapapu maira ainei te au angaanga temeio a te aronga rapakauanga temeio i teia tuatau, i ta te Atua arikianga me kore akameitakianga?
Akamanako ana i ta te Pipiria e tuatua ra no runga i te au rapakauanga tei raveia e Iesu. Na te akaaite anga i te reira rekoti Tuatua Tapu ki te au ravenga a te aronga rapakauanga temeio i teia tuatau, ka rauka ia tatou kia kite e, me no ko mai rai i te Atua te rapakauanga temeio o teia tuatau.
Kare rava a Iesu i taangaanga ana i te rapakauanga ei ravenga i te arataki mai i te au pipi me kore i te aronga matakitaki. Mari ra, e manganui tana rapakauanga i rave i te au ngai kare e kiteaia e te tangata. Maata te taime kua akakite aia ki te aronga tana i rapakau e, eiaa e akakite i taua au temeio ra ki tetai tangata.—Luka 5:13, 14.
Kare rava a Iesu i pati ana kia tutakiia tana au temeio. (Mataio 10:8) Kare rava ta Iesu angaanga i puapinga kore ana. Kua meitaki pouroa te aronga maki tei aere mai kia rapakau aia, e kare te rapakauanga i akatumuia ki runga i te akarongo o te tangata. (Luka 6:19; Ioane 5:5-9, 13) Kua rauka katoa ia Iesu i te akaora mai i tei mate!—Luka 7:11-17; 8:40-56; Ioane 11:38-44.
Noatu e kua rave aia i taua au temeio ra, ko te mea maata i te anganga orometua a Iesu, kare e ko te akauipa mai i te aronga tei ariu mai na roto i te au peu temeio e akakeu ra i te manako ngakau. Mari ra, ko tana angaanga maata roa atu ko te akakitekite i te tuatua meitaki o te Patireia o te Atua. Kua akaaere a Iesu i tana au pipi kia akariro i te tangata ei pipi, te ka apii i etai atu no runga i te manakonakoanga no te oraanga kopapa apa kore i raro i te Patireia o te Atua.—Mataio 28:19, 20.
Tika rai, ko tetai au pipi a Iesu i te anere mataiti mua kua rauka ia ratou te apinga aroa takake no te rapakauanga, inara ka ope te reira. (1 Korinetia 12:29, 30; 13:8, 13) I teia tuatau kare e na te angaanga rapakauanga i akataka mai i te au Kerititiano mou, mari ra na te tatua o te aroa akaatinga uaorai. (Ioane 13:35) Kare i rauka i te aronga rapakauanga temeio i teia tuatau, i te akatupu mai i tetai pamiri Kerititiano tika tikai mei roto i te iti tangata ravarai e te au turanga tukeke tei tatua kapitiia e taua aroa ra.
Te vaira ra oki tetai pupu Kerititiano tei taokotaiia e tetai tatua ketaketa tikai o te aroa, e kua patoi pakari ratou i te takino atu i tetai e tetai—me kore i tetai ke ua atu—noatu i roto i te tamakianga kino roa atu a te tangata. Koai ma ratou? Ko te Au Kite o Iehova. I roto i te ao e pini ua ake, kua kite uaia ratou no te akaari i te aroa mei to Karaiti rai. Te taokotai mai anga i te au iti tangata tukeke, pa enua, peu, e te au turanga eteniki, e tu temeio tikai, e i na roto anake ua i te vaerua tapu o te Atua i rauka ai teia. Eaa ai koe kore ei e aere atu ki tetai o ta ratou au uipaanga kia kite mata uaorai koe?
[Tutu i te kapi 27]
Tei te aronga rapakauanga temeio (i te tua katau) tikai ainei te turuturuanga a te Atua?