Akapeea te Akarongo te Tauturu Anga i Tei Maki Ra

TE AKAPAPU maira te au papaanga o te au rapakau anga temeio i roto i te Puka Tapu e te manako maira te Atua i to tatou tu oraanga, e te akaari maira te reira i tona mana no te rapakau. I te mea e kua riro teia au rapakau anga temeio ei akakaka i te Atua e kua apai mai i te rekareka maata, e mea tau i reira no te ui, Te angaanga nei ainei rai te apinga aroa o te rapakauanga na roto i te vaerua tapu?

Te pau anga ki te reira uianga, kare​—e te tumu no te reira penei ka poitirere etai pae. Te reira au rapakau anga temeio i te anere mataiti mua kua akatupu te reira i tona akakoro anga. Kua akakite tika tikai The Illustrated Bible Dictionary e: “Te akakoro anga o te rapakau anga temeio e mea akonoanga te reira, kare i te rapakau anga ma te au vairakau.” Eaa etai o te au akakoro anga akonoanga tei raveia e taua au temeio ra?

Tetai mea, kua riro ta Iesu au rapakauanga temeio ei akakoro anga no te akatakaanga iaia ei Mesia. E i muri ake i tona matenga, kua tauturu te reira no te akatumu e tei runga ta te Atua akameitakianga i te putuputuanga Kerititiano ou. (Mataio 11:2-6; Ebera 2:3, 4) Pera katoa, kua akaari mai te reira e ka akatupuia ta te Atua taputou no te rapakau i te au tangata nei i roto i te ao ou. Te akapapu maira te reira i to tatou akarongo e ka tae mai te taime me “kare oki to reira e karanga e, Kua maki au: te au tangata e noo i reira, kua apai keia ta ratou ara.” (Isaia 33:24) Te rave angaia teia au akakoro anga i te anere mataiti mua, kare i reira te au temeio i anoano akaouia.

E mea tau no te akamaara e kua makiaia rai te au pipi a Iesu i te anere mataiti mua e kare i rapakauia ana na roto i te temeio. E kite anga tika maata atu teia e kua raveia te angaanga rapakauanga temeio a Iesu e te au apotetoro ei apii i te au tuatua mou puapinga, kare no te oronga i tetai angaanga rapakau anga vairakau. Te orongaanga i tetai rapakau anga noa ua nei no te au maki putuputu o Timoteo, kua akakite a Paulo i te vairakau o te taangaanga anga i te uaina, kare i te rapakauanga ma te akarongo. Ko Paulo tei rave i te au temeio o te rapakauanga, kare i rauka ana iaia te tu maru mei ‘tetai tara i roto i tona kopapa nei’ tei “pāpā” ua mai iaia ra.​—2 Korinetia 12:7; 1 Timoteo 5:23.

Te mate anga te au apotetoro, kua ngaro rai te apinga aroa o te rapakauanga. Kua akakite mai tikai a Paulo e ka tupu teia. Te akaaiteanga i te putuputuanga Kerititiano ki tetai pepe, kua karanga a Paulo e: “I taku tamariki anga ra, mei ta te tamariki katoa taku tuatua, mei to te tamariki toku kite, mei to te tamariki toku manako; kia riro ra au ei tangata pakari, tuku ke atura au i te peu a te tamariki.” Te tumu manako o tana akatutu anga koia oki ko te au apinga aroa temeio o te vaerua e tuanga ia o te vai tamariki anga o te putuputuanga Kerititiano. E au tu “peu a te tamariki” ia. No reira, kua akakite aia: “E kore ïa [au apinga aroa temeio].”​—1 Korinetia 13:8-11.

Ka Tauturu Ainei te Akarongo me Topaia Tatou e te Maki?

Inara, noatu me kare tatou e irinaki ana i te rapakauanga ma te akarongo, e mea tau tikai i reira no te pure ki te Atua no te tauturu me topaia tatou e te maki. E kare i te mea tarevake me pure tetai atu no tatou. Inara e tau te au pure kia tika tikai e kia rotai ki to te Atua anoano. (1 Ioane 5:14, 15) Kare e ngai ta te Puka Tapu e akaue ra ia tatou kia pure no te rapakauanga ma te akarongo.a Mari ra, ka pure tatou no to Iehova turuanga aroa i te tuatau o te au timata anga tei akatupuia e te maki.

Te akaari maira te Puka Tapu i ta te aronga akarongo ka pure me makiia te karanga anga e: “Na Iehova e akamaroiroi mai iaia i tona roi maki ra; e naau e eeu i tona roi katoa i te maki angaia ra.” (Salamo 41:3) Te manako anga no runga i te Tuatua na te Atua ka tauturu te reira te aronga te mamae ra i te maki o te manako ngakau. Kua tata te tata taramo e: “Kua turu mai to takinga-meitaki iaku, e Iehova. I rotopu i toku nei manako mirimiri-ngata i roto iaku nei, na to akapumaana e akarekareka mai i toku vaerua.”​—Salamo 94:18, 19; akara katoa Salamo 63:6-8.

Pera katoa, te anoanoia ra tatou kia akaari i te manako meitaki i roto i te au mea o te turanga oraanga, e te ako maira te Puka Tapu ia tatou no runga i teia. E meitaki ake i te noo i tau ki te au kaveinga Puka Tapu i te rave i te apinga akakona, te kai avaava, te kai kava maata, me kare te kaikai nunui e oti me tupu mai te maki, kua uri viviki atu i reira ki te rapakau anga ma te akarongo. Te pureanga no tetai temeio me pakiaia tetai e te maki, kare ia i te komono no te tu akono pakari e ora atu ei i te maki tei rauka i te kopaeia, mei te kai anga i te au kai akamatutu me ka rauka te reira me kare ra te kimianga i te tauturu i te pae o te rapakau anga vairakau tei tau tikai.

Te akamaroiroi katoa ra te Tuatua na te Atua ia tatou kia tatanu i te au tu manako turanga oraora te ka puapinga ia tatou i te pae o te turanga kopapa oraora. Te ako ra te puka a Maseli e: “Tei te maki kore o te ngakau, ko to te kopapa ïa ora: kareka te vareae, ko to te ivi ïa pe.” “E meitaki to te ngakau rekareka mei te vairakau ra: e marō ra te ivi i te ngakau taitaia.” (Maseli 14:30; 17:22) Te pureanga no te vaerua tapu no te akatupu i te tu maru e te rekareka i roto ia tatou ka puapinga anake ua te reira i to tatou turanga kopapa oraora.​—Philipi 4:6, 7.

Akapeea te Rapakauanga ma te Akarongo?

E tikai, noatu e ka noo tetai tangata i te oraanga turanga oraora, ka tupu rai te maki. Akapeea i reira? E kino ainei i te aere ki tetai tangata rapakau ma te akarongo, te manakonako anga kia akaoraia? Ae, ka tupu te kino. Te maata anga o te taime kare te aronga rapakau ma te akarongo e rave ua ana ma te kore e tutakiia. E te akapouanga i te moni ki runga i tetai tangata rapakau ma te akarongo ka tupu te mamae e te ngere, i te mea e e ngari ake i te akapou i te moni ki runga i te tauturu i te pae o te rapakau vairakau. Tetai rai, eaa ka oronga ei i te moni ki te aronga tangata tei akavare ua i te au tangata?

Penei ka maro etai pae e: ‘Papu e, e puapinga rai to te rapakauanga ma te akarongo noatu e e manga patene ua o te aronga tei aere ki te “aronga rapakau” e kua rapakauia.’ Inara e mea papu kore e me ka rapakau tikaiia tetai ua atu e te aronga rapakau ma te akarongo. Kua akatika te Encyclopædia Britannica e: “E meangiti ua te kimikimi anga tei raveia tei rauka no runga i te au tika kitea koreia no te rapakauanga ma te akarongo.”

Noatu e e meangiti ua te aronga tei rapakauia, kare teia i te kite anga tika e te angaanga ra te vaerua tapu. I te Ako anga i te Maunga, kua karanga a Iesu e: “E manganui te ka tuatua mai kiaku i taua rā ra, E te Atu, e te Atu, kare aina kua apii matou ma toou ingoa; e kua tuaru i te au demoni i toou ingoa; e kua rave i te au akairo e manganui ma toou ingoa? Ko taku ïa e karanga atu, Kare takiri au i kite ia kotou: ka aere ke atu kotou, te aronga rave tuatua kino.” (Mataio 7:22, 23) Kua karanga katoa a Iesu e ko tetai pae aronga, noatu e te mareka koreia ra e te Atua, ka inangaro ratou kia akaraia ratou uaorai na roto i te au akairo: “E au Mesia pikikaa oki te ka tu mai ki runga, e te peroveta pikikaa, e ka akakite mai i te akairo e te au ravenga mamaata; e tae ua atu te vare i te aronga i ikiia ra, naringa e tika.” (Mataio 24:24) Papu e, ka o atu te aronga rapakau ma te akarongo i teia tuatau ki roto i te rave anga o taua au tuatua, ma ta ratou au oronga anga akatutu, te maro putuputu anga no te moni, e kua akakite i te au rapakauanga temeio.

Teia aronga nei, kare ratou e aru ana i te au takainga vaevae o Iesu. Koai i reira ta ratou e aru ra? Te oronga maira te apotetoro ko Paulo i tetai akakite anga kia tatou i tona karanga anga e: “Ko Satani oki tei akatutu angela katoa iaia uaorai no te mārama. Kare oki te mea va maata, kia akatutu tavini tona au tavini no te tuatua-tika; e akatauia to ratou openga i ta ratou angaanga.” (2 Korinetia 11:14, 15) Me kare te aronga rapakau ma te akarongo e rave i te au rapakauanga mei ta ratou i tuatua ra, e tau ratou ei aronga pikikaa, te aruanga i to Satani mataara, “ko tei pikikaa i to te ao katoatoa nei.” (Apokalupo 12:9) Inara akapeea me ko tetai au pupu meangiti ua, te rave ra ratou i te au rapakauanga? Kare ainei ta ratou “au akairo e manganui” i tupu na roto i te mana o Satani e tana au temoni? Ae, ko te reira te tu!

Te Tuatau no te Rapakauanga Tikai

Kua raveia te au rapakauanga temeio a Iesu ma te tauturu o te vaerua tapu o te Atua. Kua akaari mai te reira e kua akakoro aia i te akaoti i to te tangata nei au manamanata i te pae o te oraanga kopapa i tona tuatau rai. Te taputou ra a Iehova i ‘te rapakau o te pa enua.’ (Apokalupo 22:2) E kare anake ua aia e rapakau i te au maki mari ra ka apai ke katoa i te mate. Kua akamarama mai a Ioane e kua aere mai a Iesu “kia kore e mate te akarongo iaia, kia rauka ra te ora mutu kore.” (Ioane 3:16) Mei teaa atura te rapakau anga memeitaki te reira! Ka rave akaou a Iesu i te au rapakau anga mei tei papaia i roto i te Puka Tapu inara e maata rava atu ia. Ka akatu katoa aia i tei mate ra! (Ioane 5:28, 29) Aea teia e tupu ei?

I roto i te ao ou a te Atua, koia oki, i tau ki te au kite anga tika ravarai, te vaitata maira te reira. Te reira ao ou, te ka turouia mai i muri ake ka akaatea ravaiaʼi te kino e tuatau ua atu i roto i teia akatereanga o te au mea nei, ka riro ia ei akameitakianga tikai no te au tangata ngakau tika. E ao te reira ma te kore e mamae. “E [na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” (Apokalupo 21:4) Mei teaa te tuke ra ki ta tatou e kite nei takapini ia tatou i teia ra!

No reira, i te au turanga maki, e pure ki te Atua no te tauturu. E noatu te maki ra me kare te oraora ra, e apii e akapeea te ora mutu kore ma te kore e maki e rauka tikai ei. E patu i toou akarongo ki roto i teia taputou anga papu a te Atua na te apiianga i te au papaanga tuatua no te reira i roto i te Puka Tapu. E apii e akapeea ta te Atua akakoroanga no teia i te vaitata anga mai i te akatupuia i tau ki tana uaorai papaanga tuatau. Auraka e ekoko, no te mea te akapapu maira te Tuatua na te Atua ia tatou e: “Nana e akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai.”​—Isaia 25:8.

[Au Tataanga Rikiriki i Raro]

[Tutu i te kapi 7]

Ta Iesu au rapakauanga temeio kua akatupuia to ratou akakoroanga

[Tutu i te kapi 8]

Ka taoki akaou a Iesu ma te akamaata i te au rapakauanga temeio