“Kia Tuku i Tetai Ngai no te Reira”
1 Tetai taime, i te tuatua anga atu ki tana au pipi no runga i te akaipoipo, kua tuatua a Iesu e ‘e apinga orongaia’ mai te noo takaua. E oti kua karanga aia e: “Ko te ka rauka kia tuku i tetai ngai no te reira e tuku ia no te reira.” (Mata. 19:10-12, NW) I tetai au mataiti i muri mai, kua tata te apotetoro ko Paulo no runga i te au puapinga o te noo takaua e kua akamaroiroi i etai kia aru i tana akaraanga kia noo akapera ua kare i akaipoipo. (1 Kori. 7:7, 38) I teia tuatau e maata ‘tei tuku i tetai ngai’ no te noo takaua e te mataora nei i te au puapinga no te reira. Eaa ra etai o teia?
2 Tavinianga “ma te Iroirongata Kore”: Kua marama a Paulo e ko te noo takaua ka akatuera mai ia i te tuatau nona kia tavini ia Iehova “ma te iroirongata kore.” Pera katoa i teia tuatau, ka rauka i tetai tungane takaua kia itae atu no te Apii Terenianga Orometua, e e turanga rangatira atu to tetai tangata takaua kia piri ki roto i te angaanga painia, te apii i tetai reo ke, te neke ki te ngai tei anoano maataia te tauturu, te angaanga i te Betela, me kare kia papa ua no etai atu au akameitakianga o te tavinianga. Ka maata atu tona uaorai taime e te tuatau no te apii oonu atu te akamanakonakoanga e te tuatua marie atu kia Iehova na roto i te pure ma te ngakau tae. Mei tei kiteaia e maata atu te taime o te tangata kare i akaipoipo i te oronga iaia uaorai i te tauturu i etai ke. Pouroa taua au tu angaanga ra e “meitaki [no] kotou.”—1 Kori. 7:32-35; Anga. 20:35.
3 Taua tu tavinianga iroirongata kore ra i te Atua ka apai mai i te akameitakianga maata. I muri ake i te 27 mataiti i Kenia, kua tata tetai tuaine takaua e: “E apinga tikai te maata o te taeake e te maata rai o te angaanga! E rave kapiti ana matou i te au apinga [e te] atoro atu tetai i tetai. . . . Kua rauka iaku i te taangaanga i te rangatiraanga tei kapitiia mai kia aere ki tetai ua atu rai ngai ta te turanga noo takaua i akatuera mai kia maroiroi atu rai i roto i te angaanga orometua, e kua apai mai teia i te mataora maata kiaku.” Kua kapiti mai aia e: “Kua oonu roa atu toku pirianga kia Iehova i roto i te au mataiti i aereia mai ana.”
4 Tukuanga i Tetai Ngai no te Reira: Kua akakite a Iesu e ko te akakeuanga no te akatupu i te apinga oronga no te noo takaua e tau ei “no te patireia o te au rangi ra.” (Mata. 19:12, NW) Mei tetai ua atu rai apinga orongaia mai, ka anoanoia te turanga noo takaua kia taangaanga meitakiia i te apai mai i te mataora e te au puapinga. Na te akapuapinga meitaki anga i te au tuatau ta te noo takaua e apai maira e na te irinaki anga kia Iehova no te kite pakari e te maroiroi, e manganui te tangata kare i akaipoipo tei rauka te marama no runga i te puapinga o te tuku anga i tetai ngai no te apinga orongaia.