Aru ia Karaiti, te Arataki Apa Kore
E KITE ua ana te aronga te aru ra i te au tangata tutara i te tu mareka kore. Tuke ra ta Karaiti aratakianga i te aronga e kauraro ra kiaia. Kua tuatua a Iesu e: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua.” (Mata. 11:28, 29) E oraora e e mataora tikai ta Iesu aratakianga. Te manako ua maira aia i te aronga akaaka e tei takinokinoia, te pati anga ia ratou kia aere mai ki raro ake i tana amo maru. Eaa ra te o maira i te aru anga i ta Iesu aratakianga?
“I mate katoa oki te Mesia uaorai no kotou,” i tata ai te apotetoro ko Petero, “e kua vaoo oki i te akaraanga na kotou, kia aru kotou i tona takainga vaevae.” (1 Pete. 2:21) Mei teaa ra te puapinga no tatou kia aru i to Iesu takainga vaevae? Akamanako e te tikoti ra koe e tetai pupu tangata i tetai ngai e au pomu tetai tei uunaia, e e tai rai tangata tei kite akapeea kotou e ora ai. Kare ainei ka aru vaitata koe i tona takainga vaevae, te aru anga i tana ngai e takai ra? Mei te reira rai, to tatou oraanga tinamou no te tuatau ki mua, tei runga i te aru vaitata anga i to Iesu akaraanga. Te rave anga i te reira, te kapiti maira i te akarongo e te kauraro anga kiaia e te turuturu anga i te aronga tei komono iaia.
Akarongo e e Kauraro
Vaitata ki te openga o tana Tuatua i runga i te Maunga, kua akakite a Iesu e: “E teianei, ko tei akarongo mai i taku nei tuatua, e akono atura, e arite au iaia i tetai tangata pakari, ko tei akatu i tona are ki runga i te papa. E topa iora te ua, e taʼe iora te vai puke, e te matangi oki i te arara viviki anga mai i rungao i taua are ra, kare rava i keu, no te mea e papa te turanga.”—Mata. 7:24, 25.
Te tangata “pakari” ta Iesu e taiku ra, e tangata akarongo e te kauraro ki tana au tuatua. Te akaari ra ainei tatou na te aru ngakau tae anga e te akangateitei ra e te ariki rekareka ra tatou i to Karaiti akaraanga, me kore ka iki ua ainei tatou i tetai au akauenga a Iesu tei mama ua e tei tau i te kauraro atu? Kua tuatua a Iesu e: “Kare oki au i tukumoe i te rave i te mea e mareka mai ei [te Atua].” (Ioa. 8:29) E tauta tatou i te aru i taua akaraanga ra.
I te anere mataiti mua, kua akanoo te au apotetoro i te akaraanga meitaki no te kauraro anga ki ta Karaiti aratakianga. Tetai atianga, kua tuatua a Petero kia Iesu e: ‘I na, kua akaruke matou i te au mea katoa, e kua aru mai ia koe.’ (Mare. 10:28) E puapinga tikai ta Iesu aratakianga ki te au apotetoro, i akaruke puareinga ai ratou i tetai atu au apinga kia aru iaia.—Mata. 4:18-22.
Turuturu i to Karaiti Au Komono
Mua ua ake i tona mate, kua taiku a Iesu i tetai mataara ke kia aru tatou i tana aratakianga. Kua tuatua aia e: “Ko te kite mai i taku e tono ra, kua kite mai aia iaku ra.” (Ioa. 13:20) Kua tuatua a Iesu i tona au komono akatainuia ei “au taeake” nona. (Mata. 25:40) Muri ake to Iesu akatuia anga ki te rangi, kua ikiia tona “au taeake” kia mono iaia ei ‘karere na te Mesia,’ te pati anga i tetai ke kia akaongi mai ki te Atua ko Iehova. (2 Kori. 5:18-20) Me ariki tatou i ta Karaiti aratakianga, ka kauraro tatou ki tona “au taeake.”
Meitaki i te akamanako akapeea tatou me ariu atu ki te akoanga tau o te Tuatua Tapu i roto i ta tatou au puka akatumuia ki runga i te Pipiria. Na te apiianga i te au Tuatua Tapu e te aere anga ki te au uipaanga putuputuanga, ka akamaaraia mai kia tatou te au tuatua a Karaiti. (2 Pete. 3:1, 2) E ariki rekareka tatou i teia au kai pae vaerua na te apii putuputu anga i te reira. Eaa ra to tatou tu me ripitiia mai tetai au akoanga i tetai au taime? Ei akaraanga, te ako maira te Tuatua a te Atua i te au Kerititiano kia akaipoipo “kia tau ra i te Atu.” (1 Kori. 7:39) Kua uriuri putuputuia ana teia manako i roto i Te Punanga Tiaki no tetai au anere mataiti. Te akaari maira te au taeake o Karaiti i to ratou manako aroa no to tatou oraanga pae vaerua na te neneianga i te au atikara no runga i teia e tetai atu akoanga tei akauruia. Tetai mataara i te akaari e te aru ra tatou i to tatou Arataki apa kore ko Iesu Karaiti, na te akarongo anga ki teia au akamaaraara anga.
‘Ko te arataa oki o te aronga tuatua-tika ra, e tau ïa ki te mārama kakā ra, ko tei kakā ua e tae ua atu ki te avatea tikai ra,’ i akakite ei a Maseli 4:18. Ae, te tupu ua ra ta Iesu aratakianga. Tetai mataara kia turuturu i to Karaiti “au taeake,” kia manako papu i tetai ua atu au akatikatikaanga ta tatou e marama ra no te au tuatua mou o te Tuatua Tapu tei neneiia e “te tavini akono meitaki e te pakari.”—Mata. 24:45.
Ka kauraro katoa tatou ki to Karaiti “au taeake” na te turuturu anga i te au akaaere tei ikiia i roto i te putuputuanga Kerititiano. Kua tuatua te apotetoro ko Paulo e: “E akarongo i to kotou au arataki, e kauraro atu kotou: te tiaki ra ratou i to kotou au vaerua.” (Ebe. 13:17) Ei akaraanga, ka akamaroiroi mai tetai tangata pakari ia tatou i te puapinga kia rave putuputu i te Akamorianga a te Ngutuare i te aiai, me kore ka oronga mai i tetai au manako te ka tauturu i ta tatou angaanga orometua. Penei ka oronga mai te akaaere tutaka i tetai akoanga meitaki o te Tuatua Tapu kia tatou no runga i tetai tuanga puapinga o te oraanga Kerititiano. Me aru puareinga tatou i taua akoanga ra, te akaari ra tatou e te aru ra tatou ia Iesu to tatou Arataki.
Te ngere nei teianei ao i te aratakianga meitaki. Inara, e akaoraora anga tikai te aru anga i ta Karaiti aratakianga aroa! No reira, e kauraro ki to tatou Arataki e e turuturu i te aronga tana e taangaanga ra i teia tuatau.
[Au Tutu i te kapi 27]
Ariki ra ainei koe i te akoanga Tuatua Tapu eiaa e piri atu ki te tangata irinaki kore?