Mose​—E Tangata Aroa

EAA TE AROA?

E tu inangaro tikai te aroa i tetai ke. Ka akaari tetai tangata aroa na roto i tana tuatua e tana au angaanga i tona manako no runga i te aronga e akaperepere ra aia, noatu te umuumuia ra te tu akaatinga anga uaorai.

AKAPEEA A MOSE TE AKAARI ANGA I TE AROA?

Kua akaari a Mose i te aroa no te Atua. Na roto ra i teea tu? E akamaara i te au tuatua i roto ia 1 Ioane 5:3 e: “Teia oki te inangaro i te Atua, ko te akono i tana au akauenga.” Kua aru a Mose i taua kaveinga ra. I roto i te au mea ravarai ta te Atua i pati kiaia kia rave​—mei te tuatua anga kia Pharao ki te taki anga i tana rakau ki runga i te Tai Muramura—​kua akarongo a Mose. Kua akarongo a Mose noatu e mama ua me kore e ngata te akauenga. “Ko tana ïa i rave.”—Exodo 40:16.

Kua akaari a Mose i te aroa ki tona au taeake Iseraela. Kua kite ratou e te taangaanga ra a Iehova ia Mose kia arataki i tona iti tangata, no reira kua aravei ratou ia Mose i te akakite i te au manamanata tukeke. Ka tatau tatou e: “Kua tu ua iora te au tangata ki mua ia Mose, mei te popongi mai e aiai ua atura.” (Exodo 18:13-16) Akamanako ana e kua roiroi tikai a Mose te akarongo ua anga ki te ngati Iseraela i te akakite anga i to ratou manamanata kiaia i te au taime ravarai! Inara no to Mose inangaro i tona iti tangata, kua mataora aia i te tauturu ia ratou.

Kua akarongo a Mose e kua pure katoa aia no tona aronga akaperepere. Kua pure katoa aia no te aronga tei akakino mai iaia! Ei akaraanga, te urutoe anga te tuaine o Mose ko Miriama iaia, kua tuku a Iehova i te maki repera ki runga iaia. Kare a Mose i mataora ana no tei akautungaia a Miriama, mari ra kua viviki a Mose i te pure no tona tuaine e: “E akaora koe iaia i teianei, e te Atua e, ko taku ïa tuatua ia koe.” (Numero 12:13) Kare ainei e no to Mose aroa i rave ei aia i taua pure ra?

EAA TE AU APIIANGA NO TATOU?

Ka rauka ia tatou i te aru ia Mose na te akatupu anga i te aroa maata no te Atua. Te akakeu ra taua aroa ra ia tatou kia akarongo ki tana au akauenga ma te “ngakau katoa.” (Roma 6:17) Me akarongo tatou kia Iehova ma te ngakau katoa, ka akarekareka tatou i tona ngakau. (Maseli 27:11) Ka puapinga katoaia tatou uaorai. Me tavini tatou i te Atua ma te aroa ngakau tae, ka rave tatou i te au mea tika e ka mataora tatou i te rave i te reira!​—Salamo 100:2.

Tetai mataara ke ka rauka ia tatou i te aru ia Mose, na te akatupu anga i te aroa akaatinga uaorai no tetai ke. Me akakite mai te au oa me kore te au mema pamiri i to ratou manamanata kia tatou, ka akakeu te aroa ia tatou (1) kia akarongo meitaki kia ratou; (2) kia marama i to ratou turanga; e te (3) kia akakite kia ratou e te manako atura tatou ia ratou.

Mei ia Mose rai, ka rauka ia tatou i te pure no to tatou aronga akaperepere. Tetai taime, me akakite mai ratou i to ratou manamanata, ka manako tatou e kare e rauka ia tatou i te tauturu atu ia ratou. Penei ka tuatua tatou e, “Akakoromaki mai, taku ua ka rauka i te rave, ko te pure noou.” Inara kia akamaara e: “Me pure tetai tangata tuatua tika, ka riro tana pure ei mea ririnui tikai.” (Iakobo 5:16, The Kingdom New Testament) Penei ka akakeu ta tatou au pure ia Iehova kia rave i tetai mea ei tauturu i te reira tangata tei kare rava Aia i rave ana. No reira, kare ainei e e meitaki atu no tatou i te pure no to tatou aronga akaperepere?a

Ka ariki ainei koe e e maata atu ta tatou ka apii mai mei ia Mose? Noatu e tangata noa ua nei aia, kua akanoo aia i tetai akaraanga meitaki tikai no te tu akarongo, akaaka, e te aroa. Me aru meitaki tatou i tona akaraanga, ka puapinga maataia tatou e tetai ke.​—Roma 15:4.