Te Oronga Maira te Tuakaouanga o Iesu i te Ora!
E PUAPINGA tikai te tuakaouanga o Iesu no tatou i teia tuatau, kare te reira i tetai tupuanga puapinga kore ua. Kua akakite mai te apotetoro ko Paulo i te puapinga o te reira te tata anga aia e: “Kua tu akaou tikai ra te Mesia mei te mate maira, kua riro ïa ei momua no te aronga i topa te moe ra. Mei te mate oki i rauka i te tangata ra, no te tangata katoa i raukaʼi te tuakaouanga i te aronga i mate ra. Mei te tangata i ope i te mate ia Adamu, e ope katoa i te akaoraia e te Mesia.”—1 Korinetia 15:20-22.
Kua akatuakaouia a Iesu i te ra 16 o Nisana, mataiti 33 T.N., te ra i oronga ai te ngati Iuda i te momua o ta ratou titona i mua i te aroaro o te Atua ko Iehova i te iero i Ierusalema. Na te kapiki anga ia Iesu e ko te momua, te akakite maira a Paulo e e au tangata ke atu tetai te ka akatuakaouia mai mei te mate.
Te akamarama maira te au tuatua a Paulo e aru maira eaa te ka rauka mai mei te tuakaouanga o Iesu. “Mei te mate oki i rauka i te tangata ra,” i tuatua ei a Paulo, “no te tangata katoa i raukaʼi te tuakaouanga i te aronga i mate ra.” Ka mate tatou katoatoa no te ara e te tu apa ta Adamu i tuku mai ki runga ia tatou. Inara, na te oronga mai anga i tona oraanga apa kore ei oko, kua rauka i te au tangata kia akatuakaouia e kia akaoraia mai mei te kino o te ara e te mate na roto ia Iesu. No reira, kua tata mai a Paulo i roto ia Roma 6:23: “E utunga te mate no te ara; kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.”
Kua akamarama mai a Iesu i te puapinga o tona mate e te tuakaouanga no tatou. Kua tuatua aia no runga iaia uaorai e: “Koia katoa te Tamaiti a te tangata ra, kia akateitei katoaia e tikaʼi: Kia kore e mate te akarongo iaia, kia rauka ra te ora mutu kore. I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”—Ioane 3:14-16.
Akamanako ana i tetai oraanga mutu kore kare e mamae me kore e mii akaou! (Apokalupo 21:3, 4) E manakonakoanga mataora tikai teia! Kua tuatua tetai tangata apii kite no runga i teia e: “Te akamaara maira te ngai tanuanga mate kia tatou e e poto ua te tuatau o te oraanga, te akapapu maira te tuakaouanga e e poto ua te tuatau o te mate.” Ae, te oronga maira te tuakaouanga o Iesu i te ora!