PAUIA TE AU UIANGA PIPIRIA

Ka akakoreia mai ainei ta tatou ara?

Te akakite ra te Pipiria e, e aronga ara tatou pouroa. Kua iri mai te ara ki runga ia tatou mei te tangata mua mai ko Adamu. No reira tatou i tetai au taime e rave ei i te kino, e a muri ake kua tataraara no ta tatou i rave. Kua mate a Iesu Karaiti te Tamaiti a te Atua ei tutaki i ta tatou ara. Na roto i tana atinga oko, ka rauka i te akakore i ta tatou ara. E apinga aroa teia no ko mai i te Atua.​—E tatau ia Roma 3:23, 24.

Kua rave ana tetai aronga i te ara kino e kua manako e me ka akakore mai rai te Atua i ta ratou ara. Te mea mataora ra, te akakite maira te Tuatua a te Atua e: “Te mā nei tatou i ta tatou au ara ravarai i te toto o tana Tamaiti o Iesu Mesia.” (1 Ioane 1:7) Ka akakore katoa mai a Iehova i te au ara kino me tataraara tikai tatou.​—E tatau ia Isaia 1:18.

Eaa ta tatou ka rave kia akakoreia mai ta tatou ara?

Me inangaro tatou kia akakoreia mai ta tatou ara e te Atua ko Iehova, ka anoanoia tatou kia apii no runga iaia​—kia marama i tona au arataa, tana akoanga, e tana au umuumuanga. (Ioane 17:3) Ka akakore mai a Iehova i te ara a te aronga tei tataraara i ta ratou angaanga kino e tei tauta kia taui i to ratou oraanga.​—E tatau ia Angaanga 3:19.

Kare te akamarekaanga i te Atua i te mea ngata no tatou kia rave. Te marama maira a Iehova e e tu paruparu to tatou. E Atua aroa aia e te takinga meitaki. E no tona tu takinga meitaki, kare ainei te reira e akakeu ana ia koe kia inangaro i te kite e ka akapeea me akamareka iaia?​—E tatau ia Salamo 103:13, 14.