Kare te Mate e Akaope i te au Mea Ravarai!

E oire meangiti ua a Betania, e e rua maire (3 kiro mita) te mamao mei ia Ierusalema. (Ioane 11:18) Kua tupu tetai tumatetenga i reira i etai epetoma i mua ua ake ka mate ei a Iesu. Ko Lazaro tetai oa piri mou o Iesu, kua rokoia aia e te maki e kua mate.

Te rongo anga a Iesu i te nuti, kua akakite aia ki tana au pipi e kua moe a Lazaro e ka aere aia ka akaara iaia. (Ioane 11:11) Inara kare te au pipi a Iesu i marama ana i te aiteanga o tana tuatua, i reira kua akakite tika atu a Iesu e: “Kua mate takiri a Lazaro.”​—Ioane 11:14.

E a ra i muri ake i te tanumanga, kua tae atu a Iesu ki Betania e kua akapumaana atura ia Mareta, tetai tuaine o Lazaro. Kua tuatua atu a Mareta e: “E te Atu, naringa koe i ko nei, kare e mate toku tungane.” (Ioane 11:17, 21) Kua pau atu a Iesu e: “Ko au te tuakaouanga, e te ora; ko te akarongo mai iaku ra, mate ua atu rai, ka ora ra ïa.”​—Ioane 11:25.

Ei akaari kia ratou e e tuatua mou tikai tana, kua aere atu a Iesu ki ko i te menema e kua kapiki atura ma te reo maata: “E Lazaro, ka aere mai ki vao!” (Ioane 11:43) Kua poitirere tikai te au tangata i te aere mai anga a Lazaro ki vao.

E rua tuakaouanga ta Iesu i rave i mua ake i te reira. I tetai atianga, kua akatuakaou mai aia i te tamaine a Iairo. I mua ake ka akatuakaou mai ei a Iesu iaia, kua akakite aia e te moe ua ra taua tamaine ra.​—Luka 8:52.

No runga i te mate o Lazaro e te tamaine a Iairo, kua akaaite a Iesu i te mate mei te moe rai. Tano tikai teia akaaiteanga. No teaa ra? No te mea me moe tetai tangata, kare aia e kite e eaa te au mea e tupu ra, e kare katoa aia e kite i te mamae e te turanga taitaia. (Koheleta 9:5; akara i te pia, “Mei te Moe Tinainai Rai te Mate.”) Kua marama meitaki te au pipi mua a Iesu i te turanga tikai o te aronga tei mate. No reira te akakite ra te Encyclopedia of Religion and Ethics e: “Ki te au pipi a Iesu, me mate tetai tangata, te moe ra aia, e ko te vaarua, ko te ngai akangaroi anga . . . no te aronga tei mate no to ratou akarongo.”a

E mea pumaana tikai kia tatou i te kite e te moe ua ra te aronga tei mate i roto i te vaarua e kare ratou e kite ana i te turanga taitaia. No reira, kua kite tatou e eaa te ka tupu me mate tatou, e kare e tau kia mataku tatou.

“KIA MATE TE TANGATA NEI, KA ORA AKAOU AINEI AIA?”

Noatu e reka ana tatou i te moe meitaki i te po, koai ra ïa te ka inangaro i te moe roa e tuatau ua atu? Eaa to tatou manakonakoanga no runga i te aronga te moe ra i roto i te vaarua te ka akaora akaouia mai​—mei ia Lazaro rai e te tamaine a Iairo?

Kua ui katoa a Iobu i taua uianga ra i te vaitata anga aia i te mate. Kua ui aia e: “Kia mate te tangata nei, ka ora akaou ainei aia?”​—Iobu 14:14.

Te tuatua anga a Iobu ki te Atua Mana Katoatoa, kua pau rai aia i tana uaorai uianga, i te na ko anga e: “Naau e kapiki mai, e naku e io atu kia koe: e tangi rai koe ki te angaanga a to rima ra.” (Iobu 14:15) Papu tikai ia Iobu e te tapapa ra a Iehova i te ra e akatuakaou mai ei Aia i Tona tavini tiratiratu. Kua puapinga kore ua ainei tera manakonakoanga no Iobu? Kare.

Te au tangata ta Iesu i akatuakaou mai, e akapapu anga tera e na te Atua i oronga i te mana kia Iesu. Tika rai, te karanga ra te Pipiria e tei ia Iesu i teianei “te taviri o te mate.” (Apokalupo 1:18) No reira, mei te mana rai tei orongaia kia Iesu kia akatuakaou mai ia Lazaro, tei iaia katoa te mana i te akatuakaou mai i te tangata a te tuatau ki mua.

Te taiku putuputu maira te Pipiria i teia tuakaouanga tei taputouia mai. Kua akapapu tetai angera ki te peroveta ko Daniela e: “Ka akaangaroi oki koe, e ka tu atu rai koe i to tuanga i te openga o te au rā.” (Daniela 12:13) Kua akakite a Iesu ki te au Sadukea, te au arataki ngati Iuda tei patoi i te taputou no runga i te tuakaouanga, e: “Te tarevake nei kotou i te kite kore i te tuatua i tataia ra, e te mana o te Atua.” (Mataio 22:23, 29) Te akakite ra te apotetoro ko Paulo e: “Te irinaki nei au ki te Atua, . . . e e tuakaouanga to tei mate, te aronga tuatua-tika e te aronga tuatua-tika kore.”​—Angaanga 24:15.

AEA E AKATUAKAOUIA MAI EI TEI MATE?

Aea teia tuakaouanga o te aronga tuatua tika e te aronga tuatua tika kore e tupu ei? Kua akakite te angera ki te tangata akarongo mou ko Daniela, e ka tu mai aia “i te openga o te au rā.” E kua irinaki katoa a Mareta e ‘ka akatuakaouia mai tona tungane i te rā openga.’​—Ioane 11:24.

Te kapiti maira te Pipiria i teia “rā openga” ki te tuatau e tutara ai a Karaiti i te Patireia. Kua tata a Paulo e: “E iaia [Karaiti] oki te au, e kia ope rava te au enemi katoa i te tukuia e ia ki raro ake i ona vaevae. E taua enemi openga ra, ko te mate, e akakoreia ïa.” (1 Korinetia 15:25, 26) E tumuanga tau tikai teia no tatou kia pure kia tae mai te Patireia o te Atua e kia akonoia to te Atua anoano i te enua nei.b

Mei ta Iobu rai i kite, to te Atua anoano, kia akatuakaou mai i te aronga tei mate. Me tae mai taua ra, ka akakoreia te mate. E kare rava tetai tangata e karanga e, ‘Ka akaope ainei te mate i te au mea ravarai?’