Riro te Tuatua Mou Pipiria ei Akamerengo i Toku Inangaro no te au Pauanga

TOKU ORAANGA I MUA ANA:

Kua anauia au i Baku, i Azerbaijan, ko au te rua o tetai nga tamaine. Toku papa e Muslim e toku mama e ngati Iuda. Kua inangaro tikai toku nga metua ia raua uaorai, e kua āriki raua i ta tetai e tetai akonoanga. E turuturu ana toku mama i toku papa me akakore aia i te kai i te tuatau Ramadan, e e turuturu ana toku papa i toku mama me akono aia i te oroa Pasa. Tei roto i to matou ngutuare te Koran, te Torah e te Pipiria.

E manako ana au e e Muslim au. Noatu e kare roa au e ekoko ana e e Atua tetai, e au tumu manako tetai e manakonako ua ana au. Kua ui au kiaku uaorai e, ‘Eaa ra te Atua i anga ai i te tangata, e no teaa ra tetai tangata ka makiia ai i tona oraanga katoa e oti, ka tamamaeia i roto i te ai era e tuatau ua atu?’ No te mea kua karanga te tangata e na te Atua i akatupu i te au mea ravarai, kua manako mai au e, ‘Penei e reka ana te Atua i te akara i te tangata e tamamaeia nei?’

I toku 12 mataiti, kua akamata au i te pure namaz, e pure teia ta te Muslim e rave ana e rima taime i te au rā ravarai. I taua tuatau ra, kua tuku a Papa ia maua ko toku tuakana ki tetai apii na te ngati Iuda. Kua tamou maua i te peu Torah e te reo Epera i ko i te apii. Mua ake i te apii i te au rā ravarai, e pure ana matou i te au pure a te akonoanga ngati Iuda. No reira, i te popongi e pure ana au i te namaz i te kainga, e i te apii e pure ana au i te pure ngati Iuda.

Inangaro tikai au i te kite i te au pauanga tau ki taku au uianga. Kua ui putuputu au ki te au rabi i te apii e: “Eaa ra te Atua i anga ai i te tangata? Eaa to te Atua manako i toku papa Muslim? E tangata meitaki aia, inara eaa te tangata i karanga ai e kua viivii aia? Eaa te Atua i anga ai iaia?” Te au pauanga ta ratou i akakite mai, e mea papu kore tikai.

KUA TAUI TE PIPIRIA I TOKU ORAANGA:

I te mataiti 2002, kua akakoreia toku akarongo i roto i te Atua. Koi neke ua ake matou ki Tiamani, e okotai epetoma i muri mai, kua maki akangoruia toku papa e kare e kite mai i te tangata. Kua pure ua ana au no tetai au mataiti kia meitaki ua toku ngutuare tangata i te pae kopapa. Papu meitaki iaku e e mana to te Atua i runga ake i te ora e te mate, no reira kua pati akatenga au i te au rā ravarai kia ora mai toku papa. Manako au e, ‘E apinga meangiti ua ta te Atua ka rave kia akatupu i te patianga ngakau tae a tetai tamaine.’ Kua papu iaku e ka akatika aia i taku pure. Inara kua mate toku papa.

Poitirere tikai au i te tu manako kore o te Atua e kua taitaia maata au. Manako au e ‘Kare paa e tano ana taku pure me kore kare e Atua.’ Kua manamanata tikai au e kare i rauka ana iaku i te rave akaou i te pure namaz. Kare roa au i mārama ana i tetai ua atu akonoanga, no reira irinaki au e kare e Atua.

E ono marama i muri mai, kua topapa te Au Kite o Iehova i toku ngutupa. No te mea kare maua ko toku tuakana e irinaki ana i te akonoanga Kerititiano, inangaro maua kia akaari e kua tarevake ratou. Kua ui maua kia ratou e: “Akapeea te au Kerititiano i te akamori anga ia Iesu, te satauro, ia Maria, e te au itoro mei te mea e te patoi ra te reira i te Ture Ngauru?” Kua akaari mai te nga Kite mei te Tuatua Tapu i te akapapuanga taka meitaki e e kopae ana te au Kerititiano mou i te akamori i te itoro, e ka anoanoia te au tangata ravarai kia pure ki te Atua anake ua. Poitirere tikai au i te akarongo anga i teia.

I reira kua ui maua e: “Akapeea i reira te Toru Tai? Me ko te Atua a Iesu, akapeea aia i te ora anga i te enua nei e oti kua tamateia e te tangata?” Kua pau mai raua mei roto i te Pipiria e kua akamārama mai e kare te Atua e ko Iesu e kare katoa raua e aiteite ana. Kua akamārama mai te nga Kite e ko teia te tumu i kore ei ratou e irinaki i te Toru Tai. Poitirere tikai au e kua manako e, ‘E tuke akerai teia au Kerititiano.’

Noatu ra, kua inangaro au i te kite i te tumu i mate ei te tangata e eaa ra te Atua i akatika ua ai i te tamamaeanga. Kua akaari mai te nga Kite i te puka Te Kite te ka Arataki ki te Ora Mutu Kore,a tei roto i reira te au pene e pau maira i taku au uianga. I taua taime rai, kua akamata raua i te apii i te Pipiria kiaku.

I te au taime e apii ra matou, kua kite mai au i te pauanga ki taku au uianga tei akatumuia ki runga i te Pipiria. Kite mai au e ko Iehova te ingoa o te Atua. (Salamo 83:18) Ko tona tu puapinga maata roa atu koia oki ko te aroa. (1 Ioane 4:8) Kua anga aia i te tangata no tona inangaro kia oronga kia ratou i te apinga aroa koia oki, ko te ora. Kua mārama au e noatu e kua akatika te Atua i te kino kia tupu, te rikarika ra aia i te reira e ka takore takiri aia i te reira. Kua kite mai au e kua tupu te tumatetenga ki te tangata no te meameaau anga a Adamu raua ko Eva. (Roma 5:12) Tei tupu mai no te reira meameaau anga, ko te mate o tei akaperepereia mei toku papa rai. Inara, ka akakore te Atua i te reira au tumatetenga i roto i te ao ou, e ka akatuakaouia mai te aronga tei mate.​—Angaanga 24:15.

Kua riro te tuatua mou Pipiria ei akamerengo i toku inangaro no te au pauanga. Kua akamata au i te irinaki akaou i te Atua. Iaku e kite maata maira i te Au Kite o Iehova, kua mārama mai au e e taokotaianga taeake ratou i te ao katoa. Kua umere au i to ratou tu taokotai e te aroa. (Ioane 13:34, 35) Kua riro taku i tamou mai no runga ia Iehova i te akakeu iaku kia tavini iaia, no reira au i iki ei kia riro mai ei Kite no Iehova. Kua papetitoia au i te rā 8 o Tianuare, 2005.

KUA PUAPINGAIA AU:

Kua taui takiri toku oraanga no te au pauanga taka meitaki a te Pipiria. Kua riro te au akamārama anga papu tikai i roto i te Tuatua a te Atua i te oronga mai i te tu au noku. Kua mataora e kua pumaana au i te manakonakoanga kia kite akaou i toku papa na roto i te tuakaouanga tei taputouia i roto i te Tuatua a te Atua.​—Ioane 5:28, 29

Kua pou te ono mataiti i toku akaipoipo anga mataora ki taku tane akamori i te Atua ko Jonathan. Kua kite mai maua e te taka meitaki ua ra te tuatua mou no runga i te Atua e e māmā ua i te mārama, pera katoa kua riro te reira ei mea akaperepereia e maua. Ko teia te tumu i mareka ai maua i te akakite i to maua akarongo e to maua manakonakoanga ki etai ke. I teia tuatau, kua kite mai au e kare te Au Kite o Iehova e “tuke” ana, mari ra e au Kerititiano mou ratou.