Akapumaana Anga i te Aronga e Mii Ra

Kua manako ainei koe e kare koe i kite akapeea me tauturu i tetai tangata e mii ra no tei takake atu tona akaperepere? Tetai taime kare i papu ia tatou eaa te ka tuatua me kore ka rave​—no reira kare tatou e tuatua e kare e rave i tetai mea. Inara e au mea tau tetai ka rauka ia tatou kia rave ei tauturu ia ratou.

Maataanga o te taime, ka anoano ia koe kia noo ki te pae ia ratou e kia tuatua e “te mii tikai nei au i toou turanga.” I roto i te maataanga o te au peu matauia, e mea meitaki i te takave e te mou i tona rima ei akaari e te manako ra koe iaia. Me ka inangaro te tangata e mii ra i te tuatua, e akarongo ma te tu tangi. Mea meitaki atu, e rave i tetai mea no te ngutuare e mii ra, penei te rave anga i tetai angaanga kare e rauka ia ratou i te rave, mei te tunu anga i te kai, akono anga i te tamariki, me kore te tauturu anga i te akanoonoo no te tanuanga. E mea meitaki atu teia au angaanga i to te au tuatua akarekareka anga.

I muri mai, penei ka tuatua koe no runga i tei mate, na te akamou anga i te manako ki runga i tetai o tona au tu meitaki me kore i te au tupuanga mataora. Penei ka riro taua au pukapukaanga ei akakatakata i te tangata e mii ra. Ei akaraanga, kua tuatua a Pam tei mate tana tane ko Ian, e ono mataiti i topa e: “I tetai taime, e akakite mai ana te au tangata i te au mea meitaki ta Ian i rave ana kare rava au i kite ana, e kua mareka tikai toku ngakau.”

Kua akakite mai te aronga kimikimi e i te akamataanga e oronga ana te au tangata i te tauturu, inara i muri mai, kua akangaropoinaia ratou, no te mea kua pou te taime o te au oa i te rave i ta ratou angaanga. No reira, e tauta kia aravei putuputu atu i te oa e mii ra i muri ake i te tumatetenga.a Maata te aronga e mii ra te āriki oonu ra i teia au tauturu ei akapumaana i to ratou au manako mii.

Akamanako ana i te akaraanga o Kaori, e vaine mapu Tiapani tei taitaia no tei mate atu tona mama e 15 marama i muri ake, kua mate tona tuakana. E meitaki tikai, kua turuturu ua mai rai tona au oa iaia. Tetai oa ko Ritsuko e pakarikari ake aia ia Kaori, e kua inangaro aia kia riro ei oa piri no Kaori. Kua karanga a Kaori e, “Te tikaanga kare au i mataora ana i te reira. Kare au i inangaro ana i tetai ua atu kia mono i te ngai o toku mama, e kare au e manako ana e ka rauka i tetai ua atu i te rave i te reira. Inara, no te tu e akono maira a Mama Ritsuko iaku, kua akavaitata atu au kiaia. I te au epetoma ravarai, ka angaanga kapiti maua i te ngai tutu anga e ka aere ki te au uipaanga Kerititiano. Kua pati mai aia iaku kia inu kapu ti maua, kua apai mai i tetai kai naku, e kua tata mai i te au reta e te au kāti i te au taime ravarai. Kua riro to Mama Ritsuko tu meitaki i te akakeu iaku.”

E 12 mataiti i topa te mateanga te mama o Kaori, e i teianei te rave ra raua ko tana tane i te angaanga orometua tamou. Kua akakite mai a Kaori e, “Te akaari ua maira a Mama Ritsuko i tona tu takinga meitaki. Me oki au ki te ngai i anauia ai au, ka atoro ua rai au iaia e ka mataora maua i te pukapukaanga akamaroiroi.”

Te akaraanga o tetai vaine tei turuturu putuputuia, ko Poli, koia tetai Kite o Iehova i Kupero. E tane takinga meitaki tikai ta Poli, ko Sozos, tei tuku mai i te akaraanga meitaki ei arataki Kerititiano na te pati anga i te au tamariki matiroeroe e te au takaua ki to raua kainga no te pukapukaanga e te kaikai kapiti. (Iakobo 1:27) Mea tangi ra, kua mate a Sozos i tetai maki kino i roto i te roro i tona 53 mataiti anga. Kua karanga a Poli e, “Kua takake atu taku tane tiratiratu tei akaipoipo ana maua e 33 mataiti.”

I muri ake i te tanumanga, kua neke atu a Poli raua ko tana tamaiti openga, ko Daniel e 15 ona mataiti ki Kanata. I reira, kua piri atu raua ki te putuputuanga o te Au Kite o Iehova. Kua karanga a Poli e, “Kare te au oa i roto i taku putuputuanga ou i kite i to maua oraanga e to maua turanga ngata. Inara kare ratou i emiemi i te aravei mai e te akamaroiroi ia maua ma te au tuatua pumaana e te tauturu tau. E mea puapinga tikai taua au tauturu ra i te reira taime tikai e anoano maata ra taku tamaiti i tona metua tane! Kua akaari te aronga e rave ra i te aratakianga i roto i te putuputuanga i to ratou inangaro ia Daniel. Kua akapapu tetai kia kapiti atu ia Daniel ki te au oa me kore ki te ngai kanga poro.” Te meitaki ua nei te mama e tana tamaiti i teianei.

E mea papu e maata atu te au ravenga i te oronga tauturu e te akapumaana i te aronga e mii ra. Te akapumaana katoa maira te Pipiria ia tatou na roto i te au manakonakoanga mataora no te tuatau ki mua.