TUMU MANAKO I TE KAPI MUA | EAA TE APINGA AROA MAATA RAVA ATU?

“Te Apinga Aroa Maata Rava Atu Tei Orongaia Mai Naku”

Ko teia ta tetai tamaine e 13 mataiti i kite te āriki anga i tetai puakaoa nana ei apinga aroa. Karanga tetai vaine pitiniti tei manuia e kua oronga mai tona papa i tetai komupiuta nana, iaia i te apii teitei ei apinga aroa tei taui i tona oraanga. Kua manako tetai tane akaipoipo ou e ko te apinga aroa meitaki rava atu tana i āriki, ko te kati akamaaraanga mua, i to raua akaipoipoanga tei maaniia e tana vaine.

I te mataiti tatakitai, e maata te tangata e akapou ana i te taime e te maroiroi te kimi i te apinga aroa “meitaki rava atu” na tetai oa me kore kopu tangata no tetai atianga akaperepere tikai. Ka inangaro te maata anga i te akarongo i te pauanga mei tei taikuia i te akamataanga. Akapeea koe? Ka inangaro ainei koe i te oronga me kore i te āriki i te au apinga aroa tei akaperepereia?

Ka riro te reira manakonakoanga ei mea meitaki tikai, kare anake no te ka tupu ki tei āriki, mari ra ka akariro i tetai mea meitaki ki tei āriki ra. Te karanga ra te Pipiria: “E mea meitaki i te oronga atu i te rave mai.” (Angaanga 20:35) E tika, ko te mataora ka rauka penei ka akameitakiia atu me e apinga aroa puapinga tikai na tei āriki ra.

Akapeea ra koe te maani anga i taau apinga aroa ei tumuanga mataora tikai noou e tei āriki i te reira? Me kare te oronga anga apinga aroa “meitaki rava atu” e rauka, eaa taau ka rave kia āriki tikaiia taau apinga aroa?