Akakite te Au Makatini i te Patireia
1 Ei Au Kite o Iehova, kua kite meitakiia tatou no ta tatou tutu anga maroiroi i te Patireia o te Atua. E tuanga puapinga tikai ta te nga makatini Punanga Tiaki e te Awake! e tua nei tatou i te tauturu i te au mirioni ua atu tangata kia kite i to te Atua au akakoroanga. E tuatua meitaki tikai ta te reira karere, no te mea te akakite ra te reira e ko te Patireia anake o te Atua i te rangi te manakonakoanga no te tangata ravarai.
2 Te akono ra nga makatini i te au anoano tikai o te tangata—te pae ngakau, te pae pirianga tangata, e te pae vaerua. Ma te tu akono tau e te au puapinga ngutuare tangata e kino ua atura i te au ngai ravarai, te tauturu nei Te Punanga Tiaki e te Awake! i te tangata kia akameitaki atu i to ratou tu oraanga na te akaari anga kia ratou e akapeea te taangaanga i te au kaveinga Pipiria. Ka rekareka roa tatou i te akaari aere i te au makatini ia Okotopa.
3 E Inangaroia Tikai te Reira: Ka rauka Te Punanga Tiaki e te Awake! i roto i te au reo vaitata rai e o te tangata katoatoa i teia ao. No teia oki, i kite meitakiia ai ta tatou makatini. Teia tetai au tumu i inangaroia ai te reira e te tangata:
◼ Ei nga tianara tiratiratu e te tuatua mou, te akaari taka ua maira te reira i te tuke i rotopu i te meitaki e te kino.
◼ Te oronga ra te reira i te manakonakoanga no tetai parataito tuatua tika ki mua, tei akatumuia ki runga i ta te Atua taputou e ka riro te enua na tona Patireia e tutara.
◼ E maata te au tumu manako tuke tuke e orongaia maira, e inangaroia ra e te tangata o te au turanga e te au peu katoatoa.
◼ E poto ua te au atikara, tau ei apiianga, e tika, e kare e papakitai e kare e akaoko.
◼ Ka akatupu te au akatutuanga manea i te inangaro, e te mama ua i te tatau i te nga makatini no te taka meitaki i te tu o te tataanga.
4 E Tua kia Totoa te Reira: Te tuaanga meitaki i te makatini tei runga tikai te reira i to tatou tu aruaru i te akapapa i ta tatou au tuatua akamataanga, i to tatou taime, e te akaaere anga i ta tatou angaanga tutu anga. Kua orongaia atu te au tamanakoanga tau i roto i te nga itiu o te Our Kingdom Ministry o Aperira 1996 e Okotopa 1996, te ka tau kia akara e kia taangaanga akaouia
5 Akamatau ia Koe Uaorai ki te Au Makatini: Ia koe e tatau ra i te itiu okotai, akamanako e koai te ka inangaro i tetai kopi. Akara i te au manako me kore te au irava ka tau kia taiku koe i roto i taau tuatua akamataanga. Akamanako i tetai uianga kia ui koe ei akamata i te pukapukaanga e ei akakeu i te inangaro i roto i te tumu manako.
6 Akatano i te Tuatua Akamataanga ki te Tangata: Akapapa i tetai tuatua akamataanga tau, ka rauka kia akatanoia no tetai tane, tetai vaine, tetai tangata pakari, me kore tetai mapu, noatu me e tangata matauia me kore e tangata ke.
7 Kia Akamanako ua Rai i te Punanga Tiaki e te Awake! I te mea ka o ua te au makatini ki roto i te kiri, me kore i te pute, ka rauka ua kia apai tatou i tetai au kopi me aere tatou ki tetai ngai me kore ki te okooko. Oronga i te reira me tuatua ki te kopu tangata, te tangata tupu, te au oa angaanga, te au oa apii, me kore te au puapii. Akataka i tetai ra i te epetoma no te akakitekite aere i te makatini.
8 Akaari i te Rekareka no te Au Makatini: Kare roa e ngaro to te reira puapinga. Kare te roaanga o te tuatau e akaiti mai i te puapinga o ta te reira karere. E tika, me tauta pakari tatou i te oronga i ta tatou au makatini katoatoa, kare e tumu tau no te au itiu takere kia putunga i runga i ta tatou au paata.
9 E Puapinga te Akakitekite i te Pae Mataara: Tetai mataara meitaki roa atu teia no te oronga i te au makatini ki te tangata e manganui. E angaanga putuputu ana tetai au papuritia ki runga i te au mataara maata i te au ra okooko.
10 E Uua te Au Ngai Pitiniti: Me akakitekite mei tera toa ki tera toa, e iti ua rai ta tatou aronga kare i te kainga. E mako ua te maataanga o te aronga pitiniti, e e maata te ariki rekareka mai ana i te au makatini. Akaari i te au atikara ka tau no te pitiniti ka atoroia.
11 E Puapinga to te Ara Makatini: I te mea te neneiia nei te au makatini e rua taime i te marama, e mea tau kia atoro akaou i te au tangata tatau i te reira e te oronga i te au itiu ka aru mai. Kia atoro putuputu tatou, kare no te oronga ua i te au makatini mari katoa ra i te akatupu i te inangaro o tera tangata i roto i te Pipiria. E tumu meitaki tikai te ara makatini no te au apiianga Pipiria ka puapingaia mai.
12 Rave i te Maataanga ka Rauka ia Okotopa: Kua rauka i Te Punanga Tiaki e te Awake! te irinakianga o te au mirioni ua atu aronga rekareka i te tatau. E puapinga tikai te reira i te akakiteanga i te Patireia e kia akapapu tatou i te apai i te reira e i te oronga i te reira i te au tuatau ravarai. Kia riro te marama ia Okotopa ei mea takake roa no te tuaanga i te makatini!