Oronga i te Au Makatini tei Akakite i te Tuatua Mou
1. Eaa te tuanga a Te Punanga Tiaki e te makatini E Ara!?
1 Te Punanga Tiaki Akakiteanga i te Patireia o Iehova e tona tokorua te makatini, E Ara!, ko te tuanga maataia o te angaanga tutu anga i te Patireia e te akariroanga i te tangata ei pipi. (Mata. 24:14; 28:19, 20) E mataora ana tatou i te oronga putuputu i teia nga tianara tau meitaki e rua, ia tatou e piri atura ki roto i te au tuanga tukeke o te tavinianga Patireia.
2. Eaa te au tauianga e kitea ra i roto i Te Punanga Tiaki e te makatini E Ara!, e eaa te tumu?
2 I roto i te au mataiti kua kite mai tatou i te au tauianga ki te tu maata e te tataanga o roto i te au makatini e pera katoa i te au ravenga e taangaanga ana tatou i te tua anga i te reira. Kua raveia teia au tauianga ma te akakoroanga kia marekaia e kia puapingaia roa atu te au makatini, e kia taeria e te karere Patireia te ngakau o ‘te tangata katoatoa kia ora kia rauka te kite i te tuatua-mou.’—1 Timo. 2:4.
3. Akapeea te au makatini i te taangaanga angaia i roto i te angaanga orometua?
3 Mei ia Tianuare 2006, kua karape tatou i te taangaanga i te au akatutuanga tukeke no te itiu okotai i te marama o te makatini Awake! I teianei ka akapera katoa tatou i te oronga anga i te itiu toru marama ki te papuriki o Te Punanga Tiaki Akakiteanga i te Patireia o Iehova i roto i ta tatou angaanga orometua. Te akaraanga no te au orongaanga no te makatini tataki tai ka kiteaia i te kapi openga o Ta Tatou Angaanga Patireia. E akatutu ua ana teia i tetai o te au atikara mua i roto i te makatini inara i tetai au taime e akatutuia ana tetai au atikara tikai e rekaia ra e te tangata. Ka puapinga maata rava atu te au tamanakoanga tei neneiia me kite meitaki tikai tatou i te atikara e akatutuia ra e ka taangaanga i ta tatou uaorai au tuatua kia tano ki te orongaanga ki ta tatou ngai tutu anga.
4. Eaa ka puapinga ai i te taangaanga i tetai atu au akatutuanga tuke rai mei te au orongaanga tei akanooia i roto i Ta Tatou Angaanga Patireia?
4 Noatu e kua kapiti mai Ta Tatou Angaanga Patireia e rua akatutuanga no te makatini tataki tai, ka rauka ua i te taangaanga i tetai akatutuanga tuke takiri. Tetai tumu no te rave anga i te reira koia oki e reka roa atu tetai au atikara i roto i taau ngai tutu anga. Me kore penei kua manako koe e ka rauka ia koe i te taangaanga i tetai orongaanga meitaki atu na te taangaanga anga i tetai atikara taau e reka maata ra.
5. I mua ake ka akapapa ai i tetai orongaanga no te atikara ka akaariia, eaa taau ka rave?
5 Akapapa i Taau Orongaanga: Te mea mua, kia matau meitaki tikai koe i te atikara taau i iki i te akaari. Penei kare koe e matau ua rai i te au atikara pouroa i roto i te makatini i mua ake ka akamata ai koe i te oronga i te reira i roto i te angaanga tutu anga. Inara, kia akaata koe i te tu maoraora e te ngakau tae no runga i te au atikara taau i iki i te akaari. Ka rauka anake ua ia koe te reira me kite meitaki tikai koe i te akakiteanga taau ka oronga.
6. Akapeea tatou me akapapa i ta tatou uaorai orongaanga?
6 Aru mai, kia rauka te taui ua i te akapapaanga i taau au tuatua akamataanga. Penei i te akamataanga i tetai pukapukaanga, ka rauka ia koe i te ui atu i tetai uianga te akakeu ra i te inangaro, tei piri atu ki te atikara. E irinaki ua rai ki runga i te mana o te Tuatua a te Atua kia akakeu i te ngakau. (Ebe. 4:12) E iki i tetai irava tau tei piri atu ki te manako taau ka akakite atu, penei e irava tei tataia me kore tei taikuia i roto i taau atikara e akaari ra. E akamanako e ka akapeea i te akapiri atu anga i te irava ki te atikara.
7. Akapeea tatou i te akameitaki atu anga i ta tatou au orongaanga?
7 Te Au Atianga: Kia puapinga tikai tetai orongaanga, ka anoanoia kia taangaangaia te reira. E piri atu ki te putuputuanga i te oronga anga i te makatini i te Maanakai. E oronga i te au makatini ki te au tangata tei ariki i te au puka i mua ana. Kia oronga ua rai i te au makatini ki taau aronga apii Pipiria e ki etai au tangata ka aravei atu koe me akono koe i tetai atoro akaouanga. Penei ka rauka ia koe i te oronga i te au makatini ki te au tangata taau ka pukapuka atu me aere koe i te oko apinga, ia koe e teretere ra, me kore e tiaki ra i ko i te opati o te taote. Kia akameitaki atu i taau orongaanga ia koe e taangaanga ra i te reira i roto i te marama.
8. I teea au mataara i takake rava ai Te Punanga Tiaki e te makatini E Ara!?
8 E tu takake rava to te nga makatini Te Punanga Tiaki e te makatini E Ara! Te akateitei ra te reira ia Iehova e ko tei Ngateitei i te ao katoa e pini ua ake. (Anga. 4:24) E akapumaana ana te reira i te tangata ma te tuatua meitaki o te Patireia o te Atua e te akamaroiroi ra i te akarongo i roto ia Iesu Karaiti. (Mata. 24:14; Anga. 10:43) Kapiti katoa mai, e akara ana te reira i te au tupuanga i te ao nei, i teia e akatupu nei i te totou Pipiria. (Mata. 25:13) E tauturu i te au tangata i roto i taau ngai tutu anga kia puapingaia mei teia au tianara na te akapapaanga i te oronga i te reira i te au atianga tau ravarai!
9. Akapeea tatou i te akanooanga i tetai tumuanga no tetai atoro akaouanga?
9 Me rauka ia koe i te oronga i tetai makatini, me kore kua rauka ua ia koe tetai pukapukaanga pae vaerua ki tetai tangata, kia papa ua koe ma tetai uianga me kore tetai akakiteanga te akakeu ra i te manako, te ka taki atu ki tetai atoro akaouanga e tetai pukapukaanga pae vaerua akaou. Me maroiroi tatou i te ruruanga i te au ua tuatua mou, ka papu ia tatou e ka akatuera a Iehova i te ngakau o te aronga tei inangaro tikai i te kite e te tavini atu Iaia.—1 Kori. 3:6.