Te Angaanga Orometua Kerititiano—Ta Tatou Angaanga Mua
1 Pouroa tatou e au angaanga tuke tuke ta tatou ka anoanoia i te rave. Ko te takinga meitaki i to tetai uaorai ngutuare tangata e umuumuanga tu-Atua ia. (1 Timo. 5:8) Inara, auraka te angaanga tei kapitiia mai ki taua umuumuanga tu-Atua ra kia puapinga maata atu i te angaanga tutu aere anga i te Patireia e te akariro anga i te tangata ei pipi.—Mata. 24:14; 28:19, 20.
2 Kua oronga mai a Iesu i te akaraanga no tatou kia aru i te ‘na mua i te kimi i te basileia.’ (Mata. 6:33; 1 Pe. 2:21) Noatu te iti ua o te au mea i te pae kopapa, kua rave ra aia ma te katoaanga tikai i te anoano o tona Metua. (Luka 4:43; 9:58; Ioane 4:34) Kua akamaroiroi aia iaia uaorai i te oronga i tetai akakiteanga i te au tuatau ravarai. (Luka 23:43; 1 Timo. 6:13) Kua raurau aia i tana au pipi kia pera rai i te mou anga i taua tu inangaro pakari ra i roto i te angaanga kokoti anga mou.—Mata. 9:37, 38.
3 Aru Anga ia Iesu i Teia Tuatau Nei: Ka rauka ia tatou i te aru i ta Iesu akaraanga na te tauta anga i te noo i tetai oraanga apiapi kore te akamouia ra ki runga i te angaanga orometua Kerititiano. Me kua tu tatou i te au apinga e anoanoia ra no te oraanga, e akono tatou i te ako a te Pipiria auraka e akaputu kia maata e kia maata ua atu rai te au apinga o teianei ao. (Mata. 6:19, 20; 1 Timo. 6:8) E meitaki maata atu to te umuumu kia akamaata atu i ta tatou tuanga i roto i te angaanga tutu aere anga! Me aro atu tatou i te au turanga ngata, kia akamaroiroi tatou ia tatou uaorai mei ta Iesu rai i rave, na te kore anga e akatika i te au manamanata o te oraanga kia akaparuparu i ta tatou angaanga mua o te akakite aere anga i te tuatua meitaki o te Patireia.—Luka 8:14; 9:59-62.
4 Te tuku nei te aronga e maata te au apainga i te ngai mua ki te angaanga tutu aere anga. Kua akakite tetai tungane e ngutuare tangata maata tona, e ngai angaanga meitaki tana, e ko tetai tangata pakari e tavini ra i roto i te putuputuanga Kerititiano e: “Kiaku ko te angaanga orometua taku angaanga mua.” Tetai tuaine painia kua karanga e: “E meitaki maata atu te painia i tetai ua atu ngai angaanga puapinga.”
5 Noatu eaa to tatou au turanga, kia aru ua rai tatou i ta Iesu akaraanga. Akapeea? Na te tuku anga i te angaanga orometua Kerititiano e ko ta tatou angaanga mua.