Eaa Taau Mea Mua?
1 E manganui te au akaaerenga akonoanga te tuatua pakari ra no runga i te raveanga i te au angaanga tauturu ua, mei te tu oronga i te au are no te apii me kare no te au umuumuanga i te pae vairakau. Inara, ia ratou e kore ra e akangaropoina i “te takinga-meitaki e te oronga,” te tuku ra te Au Kite o Iehova na mua te tauturuanga i te tangata i te pae vaerua.—Ebera 13:16.
2 Akaraanga o te Anere Mataiti Mua: Kua rave a Iesu i te au angaanga meitaki e manganui i te tuatau o tana angaanga orometua i te enua nei, inara ko tana angaanga mua koia oki ko te akakiteanga i te tuatua mou. (Luka 4:43; Ioane 18:37; Anga. 10:38) Kua akaue aia i tana au pipi kia ‘aere, e akariro i to te pa enua katoa ei pipi, . . . ma te apii atu ia ratou.’ (Mata. 28:19, 20) E kua akakite mai aia e ko te aronga i taangaanga i te akarongo ki roto iaia ka rave i te angaanga na roto i tetai turanga tei maata atu i tana i akamata ra. (Ioane 14:12) Kua tuku a Iesu i te angaanga tutu aere na mua no te mea te tauturu ra te reira i te tangata kia apii i te mataara o te ora.—Ioane 17:3.
3 Kua manako te apotetoro ko Paulo i tana angaanga tutu aere e ‘kare oki e tika kia kore,’ e umuumuanga kare e rauka iaia i te kopae. (1 Kori. 9:16, 17) Kua papa aia no te rave i tetai ua atu atinga, te tamou marie i tetai ua atu timataanga, me kare te akakoromaki i tetai ua atu turanga kino kia raukai i te akatupu i tana angaanga orometua. (Anga. 20:22-24) Kua akaari te apotetoro ko Petero e tona au taeake i te tu mei te reira rai. Noatu me ka aro atu i te tapekaanga e te au papaanga, “kare e rā i tukua ia ratou, i te apii anga atu e te tuatua anga atu ia Iesu Mesia.”—Anga. 5:40-42.
4 Akapeea tatou? Te tuku ra ainei tatou i te ngai mua no te angaanga o te akakiteanga i te tuatua meitaki o te Patireia e te akariroanga i te tangata ei pipi? Mei ia Iesu rai, te manako tika tikai ra ainei tatou i te aronga “kua mate ratou i te roiroi, e kua pueurikiriki keia, mei te mamoe tiaki kore ra”? (Mata. 9:36) Te akakite taka meitaki maira te au tupuanga i roto te ao i teianei e te totou Pipiria e te pou nei te taime no teia akatereanga! Te akara tamou anga i te puapinga o te angaanga tutu aere ka akakeu ia tatou kia rave ua atu ma te maroiroi i te angaanga tutu aere.
5 Akamanako i Toou Au Turanga: I te mea e te taui putuputu ra to tetai uaorai au turanga, e mea meitaki i te akara putuputu akaou e me ka rauka ia tatou i te rave i te au akatikatikaanga e raukai i te rave maata atu i ta tatou tuanga i roto i te angaanga tutu aere. Kua painia tamou ana tetai tuaine i te au mataiti o te 50, te 60, e te 70 inara kua manako e ka tau kia akamutu no te paruparu i te pae kopapa. Inara, kare i roa atu ana, kua meitaki mai tona oraanga kopapa. Kua akara akaou aia i tona au turanga i teianei e kua kite papu e ka rauka iaia i te painia akaou. Mei teaa atura tona mataora i te aere anga atu ki te Apii Tavini Anga Painia i te 90 mataiti? Akapeea koe? Te vaitata ra ainei koe i te ritaea me kare no te karatuati atu? Ka rauka ainei kia painia koe i te mea kua taui toou au tu oraanga?
6 I te akara anga atu a Iesu ia Mareta “kua varenga iora aia i te akono anga i te peu o te manuiri,” kua tuatua takinga meitaki atu aia e ka kokoti aia i te au akameitakianga maata atu me akangoie ua aia i te au apinga. (Luka 10:40-42) Ka rauka ainei ia koe i te akangoie i toou tu oraanga? Te anoanoia ra ainei e kia angaanga nga tokorua rava ei te tane e te vaine? Me raveia te au akatikatikaanga, ka rauka ainei e okotai ua tangata ka angaanga no te ngutuare? E manganui tei puapingaia i te pae vaerua na te raveanga i te au akatikatikaanga e raukai i te akamaata atu i tana tuanga i roto i te angaanga orometua.
7 Ka tau tatou kia aru i te akaraanga tei akanooia mai e Iesu e tana au apotetoro! Ka papu ia tatou ta Iehova akameitakianga ki runga i ta tatou titauanga kia rave maata atu i ta tatou tuanga i roto i te angaanga puapinga maata no te tutu aere anga i te tuatua meitaki o te Patireia.—Luka 9:57-62.