Kia Maroiroi i Roto i te “Akakite Meitaki Anga Atu”
1, 2. Eaa taau i umere no runga i to Paulo manako no te tutu aere anga i te tuatua meitaki, e ka akapeea tatou i te aru anga i tana akaraanga no te “akakite meitaki anga atu”?
1 Mei ia Iesu rai e etai atu au tavini tiratiratu i taito, e tangata tutu maroiroi te apotetoro ko Paulo no te tuatua meitaki, i te “akakite meitaki anga atu” noatu eaa te tu. Noatu tei roto i te are tapekaanga, “e āriki maira [aia] i te tangata ravarai e aere atu kiaia ra, Tuatua maira i te basileia o te Atua, e apii maira i te au tuatua o te Atu ra o Iesu Mesia ma te mataku kore, e kare rava e tangata i akakore atu.”—Anga. 28:16-31, akaaite ia NW.
2 Ka rauka katoa ia tatou te maroiroi i te “akakite meitaki anga atu” i te au taime ravarai. Ka o mai te akakitekite anga atu ki te tangata ta tatou ka aravei i te aere anga atu ki reira e mei ko mai i te Uruoaanga Tapere “E Akakaka i te Atua” e i roto i te oire i raveia ai.—Anga. 28:23; Sa. 145:10-13.
3. Akapeea e rauka ai ia tatou i te kopae kia kore e riro ta tatou akakitekite ua anga ei tautaanga puapinga kore ua?
3 Akakoro Koreia me Kore e Akakitekite Ua Anga? E tuke ainei tetai? Ae. Ko tetai tei akakoro koreia ka tupu poitirere ua mai me kore kare i manakoia ana, mei te mea atura e kare i paraniia me kore ra kare e puapinga roa ana. Kare takiri e ko tera te akatakaanga no ta tatou angaanga orometua. Mei ia Paulo tikai, e mea puapinga kia tatou te oronga anga i te kaka ki te Atua na roto i ta tatou akakitekite anga, e e mea tau rai e ko to tatou akakoroanga kia oronga i te akakiteanga i te tuatau tei tau i te au ngai ta tatou e aere ra i te taime orote. Inara, ko te tu o ta tatou tuatua anga ki etai ke ka tano rai kia akatakaia e ei mea akakitekite ua anga—koia oki e maru, e mata katakata, e te tu oaoa. E openga meitaki ta teia tu ka akatupu.
4. Eaa i rauka ai ia Paulo kia akakitekite i ko i tona ngai nooanga?
4 Akapapa i te Oronga i Tetai Akakiteanga: Kua inangaro tikai a Paulo i te akatupu i tetai tuatau no te akakitekite iaia i roto i te are tapekaanga i Roma. Mei tona ngai e noo ra, kua akamata aia i te pati atu i te au arataki ngati Iuda ki tona are. (Anga. 28:17) Noatu oki, e e putuputuanga Kerititiano tetai i Roma, kua kite ra a Paulo e ko te iti tangata ngati Iuda i roto i te oire e meangiti ua ta ratou i kite no runga i te akarongo Kerititiano. (Anga. 28:22; Roma 1:7) Kare roa aia i tapupu ana i te “akakite meitaki anga atu” no runga ia Iesu Mesia e te Patireia o te Atua.
5, 6. Eaa te au tuatau e vai nei kia tatou no te akakitekite ua anga, e eaa te au akapapaanga ka rauka ia tatou kia rave i te reira ma te puapinga tikai?
5 E akamanako ua ana i te au tangata pouroa taau ka aravei i roto i toou au aere anga ko tei meangiti ua to ratou kite no runga i te Au Kite o Iehova. Penei e kare roa ratou i kite e te rave aere nei tatou i te au apiianga Pipiria oronga ua i te kainga. E akara i te au tuatau no te akakitekite aere ki te aronga taau ka aravei i te au ngai taau e aere ra, te tapu i te ngai akaangaroianga, te tito penitini, te okooko, te noo anga i te motera, te kaikai i te au are kai, na runga i te au apinga akaoro o te papuriki, e te vai atura. Akapapu na mua ake eaa taau ka tuatua i te akamata atu i tetai pukapukaanga e te oronga i tetai akakiteanga poto ua. Penei i te au ra ki mua ka rauka ia koe i te apiipii na te akakitekite ua anga ki toou au tangata tupu, te kopu tangata, te au oa angaanga, e tetai atu au aronga taau i matau.
6 Ka anoano koe i tetai au puka ei taangaanga no te akakitekite ua anga. Ko teaa? Penei ka taangaanga koe i te aenga pepa Ka Inangaro Ainei Koe kia Kite Maata Atu i te Pipiria? E akara i te au parakarapa mua e rima, tei reira te akakite anga mai i te au tumu tukeke no te tatau anga i te Pipiria. E akaari i te kuponi i muri no te pati i tetai apiianga Pipiria oronga ua i te kainga. Me aravei koe i tetai tangata ka akarongo mai, e oronga atu i te poroutia Umuumu. I te tapapa anga e ka aravei atu i tetai au tangata tuatua reo ke, e apai i te puka rikiriki Good News for All Nations. Te akamarama maira te kapi 2 e ka akapeea i te taangaanga i te reira i te oronga anga i tetai akakiteanga. Me na runga i te motoka, penei ka rauka ia koe te apai i tetai atu au puka apii matauia no te aronga tei akaari mai i te inangaro tikai i roto i te karere o te Patireia.
7, 8. Eaa te akamatakiteanga ta tatou ka akono no runga i to tatou uaorai tu e te akaraanga i to tatou aere anga e te akaangaroianga?
7 E Akamanako i Toou Tu e te Akaraanga: E akapapu meitaki tatou e kare to tatou tu pera katoa to tatou kakau e te akamaneaanga e oronga i te manako tarevake ki etai ke me kare ra i tetai tumu kia ‘tuatua akaapa’ i te akaaerenga a Iehova. (Anga. 28:22) Ka tau teia kare anake ua e ki te tae anga ki te uruoaanga mari katoa ra i te aere anga atu e no te tuatau akaangaroianga a muri ake. Te akamatakite maira te Punanga Tiaki, o Aukute 1, 2002, kapi 18, parakarapa 14, e: “Auraka to tatou akara anga ei mea akaariari tuke roa, akameamea ua, akaariari i te au tuanga o te kopapa, me kare te au tu ou. Kapiti katoa, ka tau tatou kia kakau i te tu te akaata ra i te ‘akatapuanga i te Atua.’ Na te reira e oronga mai i te kai no te manako, kare ainei? Kare ia i te tumu ua no te kakauanga tau i te aereanga ki te au uipaanga putuputuanga e i muri akera ka titiri atu ei ki te matangi i etai atu taime. Ka tau to tatou uaorai akaraanga kia akaata tamou i te tu tapu, te tu akono teitei no te mea e au Kerititiano tatou e te au orometua e 24 ora i te ra.”—1 Timo. 2:9, 10.
8 Ei tu mako e te tu ngateitei to tatou kakau. Mei te mea e te akaari ua maira rai to tatou tu e te akaraanga i to tatou irinakianga i roto i te Atua, kare roa tatou e manako i te unui ki muri mei te akakitekite ua anga no te mea e kare to tatou akaraanga e tau ana ei au orometua.—1 Pe. 3:15.
9. Eaa te puapinga tei rauka ia Paulo i te akakitekite anga i Roma?
9 E Uua te Akakitekite Ua Anga: I nga mataiti e rua ia Paulo i roto i te are tapekaanga i Roma, kua kite aia i te au tu meitaki tei tupu mei tana au tautaanga i te akakitekite aere. Kua ripoti mai a Luka e “kua akarongo maira tetai pae i taua au tuatua i karangaia ra.” (Anga. 28:24) Kua akamanako meitaki a Paulo i te puapinga tikai o tana “akakite meitaki anga atu” i tona tata anga e: “Kua riro te au mea i rokoia mai ei au nei ei akatupu i te evangelia nei; E kua kitea oki toku nei tapeka angaia i te Mesia nei e kako rava ake te are ariki, e te au ngai katoa nei; E manganui to te au taeake i te Atu nei, tupu akenei to ratou kite, ko au i tapekaia nei, kua maata atura to ratou maroiroi kia apii i te tuatua ma te mataku kore.”—Philipi 1:12-14.
10. Eaa te puapinga tei rauka i tetai nga tokorua i te akakitekite anga i te mataiti i topa?
10 I te mataiti i topa, i muri ake i te oti anga te uruoaanga tapere, kua kite tetai nga tokorua i tetai tupuanga uua i te akakitekite ua anga atu ki tetai vaine tua kai tei ui kia raua no runga i to raua nga kati no te uruoaanga. Kua akakite atu raua kiaia no runga i te uruoaanga e no runga katoa i te manakonakoanga ta te Pipiria e oronga mai nei no te tangata i te tuatau ki mua. Kua oake raua i te aenga pepa Ka Inangaro Ainei Koe kia Kite Maata Atu i te Pipiria? kiaia e te akamarama atu i te akanoonooanga no te apiianga Pipiria oronga ua i te kainga. Kua karanga mai te vaine e ka inangaro aia i tetai tangata kia atoro atu iaia, kua akakiki i tona ingoa e te ngai nooanga ki muri i te aenga pepa, e kua pati i nga tokorua kia rave i te au akanoonooanga. Eaa ra te puapinga taau ka rekareka i teia mataiti nei na te “akakite meitaki anga atu” ma te maroiroi?
11. Eaa te au tu ka tau tatou kia akono i roto i te akatupu anga i te tuatua meitaki na te “akakite meitaki anga atu” i teia mataiti?
11 E Akatupu Meitaki i te Tuatua Meitaki: E akamanako ana e mei teaa ra te mataora o Paulo i tona akarongo anga e te aru ra te au taeake Kerititiano i tana akaraanga maroiroi! Kia rave ua atu rai tatou i te katoatoa o ta tatou ka rauka i te akatupu i te tuatua meitaki na te akakitekite ua anga no runga i to tatou irinakianga Pipiria ia tatou katoa e puapingaia nei mei te uruoaanga tapere o teia mataiti.
[Pia i te kapi 4]
Au Puka ka Anoanoia no te Akakitekite Ua Anga
■ Ka Inangaro Ainei Koe kia Kite Maata Atu i te Pipiria? (aenga pepa)
■ Eaa ta te Atua e Umuumu Maira ia Tatou? (poroutia)
■ Good News for All Nations (puka rikiriki)
■ Etai atu au puka apii matauia
[Pia i te kapi 5]
Auraka e Akangaropoina ia Ratou!
Akangaropoina iaai ma? I te aronga pouroa tei tae mai ana ki te Akamaaraanga i te matenga o Karaiti me kare i te akoanga puapinga. Kua pati ainei tatou ia ratou kia tae mai ki te uruoaanga tapere o teia mataiti? Penei me maru te akamaroiroianga, e maata ratou, te ka tae mai. Ia ratou e rekareka ra i te kapitianga akamaroiroi i ko i te uruoaanga e te porokaramu akamatutu i te pae vaerua, ka akapiri vaitata roaia atu ratou kia Iehova e tona akaaerenga. Kore ei e pati atu ia ratou e ka akara ai eaa te ka tupu? Oronga i te au akatakaanga pouroa ta ratou ka anoano, kapiti atu i te au ra o te uruoaanga, te au akakiteanga e ka akapeea e tae ei ki te ngai o te uruoaanga, te au taime akamata anga e te akaopenga anga o te au tuanga, e te akakiteanga mou mua o te porokaramu tei tataia ki muri ake i te kapi openga o te itiu o te Awake! o Tiunu 8, 2003.