Ka Rauka ia Koe te Akakitekite Aere Ua!

1. (a) Eaa te akakitekite aere ua? (e) Eia aronga i teia uipaanga tei akarongo mua i te tuatua mou na roto i te akakitekite aere ua?

¹ Eia aronga i roto i taau putuputuanga tei akarongo mua i te tuatua mou na roto i te akakitekite aere ua? Penei ka poitirere koe i te pauanga. Te o maira ki te akakitekite aere ua, te oronga anga i te tuatua meitaki ki te tangata e aravei ana tatou i roto i ta tatou angaanga i te au ra ravarai​—me teretere aere, atoro atu i te kopu tangata me kore te au tangata tupu, me kore te okooko, e pera i te apii, i te ngai angaanga, e te vai atura. I roto i tetai pupu e 200 tuma Kite papetitoia, kua akarongo mua e 40 patene ia ratou i te tuatua mou, na roto i te akakitekite aere ua! No reira, e puapinga tikai teia ravenga tutu aere.

2. Eaa te au akaraanga no te akakitekite aere ua ka kite mai tatou i roto i te Tuatua Tapu?

² Te aronga tutu evangeria i te anere mataiti mua, e akakitekite putuputu aere ua ana. Ei akaraanga, iaia e aaere ra na roto ia Samaria, kua akakitekite atu a Iesu ki tetai vaine e uti ra i te vai i ko i te ruavai o Iakoba. (Ioa. 4:6-26) Kua akamata a Philipa i tetai tuatuaanga ki tetai tangata mana Etiopia e tatau ra mei te puka o Isaia na te ui anga e: “Te kite na koe i taau e tatau na?” (Anga. 8:26-38) I te tapekaia anga i Philipi, kua akakitekite atu a Paulo ki te tiaki mouauri. (Anga. 16:23-34) Muri mai, iaia i akamouauriia i roto i te are, kua “āriki maira [a Paulo] i te tangata ravarai e aere atu kiaia ra, Tuatua maira i te basileia o te Atua, e apii maira i te au tuatua o te Atu ra o Iesu Mesia.” (Anga. 28:30, 31) Ka rauka katoa ia koe te akakitekite aere ua, noatu e e akama ua koe. Akapeea ra?

3. Eaa te ka tauturu ia tatou kia autu i te tu akama?

³ Akamataia: E ngata ana i te maataanga ia tatou te akamata i te au tuatuaanga ki te aronga kare tatou i kite. Noatu te aronga e piri ana tatou, penei ka manga akama rai tatou i te tuatua atu i te tuatua mou. Tera ra, ka akakeu ia tatou kia tuatua atu, me akamanako oonu tatou i te tu meitaki o Iehova, te tuatua mou akaperepereia tana i oronga ki tona au tavini, e te turanga kino o te tangata i roto i teianei ao. (Iona 4:11; Sala. 40:5; Mata. 13:52) Tera tetai, ka rauka ia tatou te pati kia Iehova kia tauturu ia tatou i te ‘akatoatoa kia rauka te tu mataku kore.’ (1 Tesa. 2:2, NW) Kua tuatua tetai tangata apii Gileada e: “E kite putuputu ana au e e tauturu ana te pure me kite au i te tu ngata i te tuatua ki te tangata.” Me emiemi koe i te tuatua, e pure i tetai pure muteki, poto ua.​—Nehe. 2:4.

4. Eaa te akakoroanga ta tatou ka akanoo no tatou uaorai i te akamataanga, e no teaa ra?

⁴ Mei ta te ingoa e akakite maira, kare te akakitekite aere ua e umuumu mai kia akamata tatou i te tuatuaanga na te au tuatua pakari me kore na roto i tetai irava. Penei ka tauturu ia tatou e tetai akakoroanga kia akamata ua i tetai tuatuaanga ma te kore e manako e kia oronga atu i tetai akakitekiteanga i te reira taime. Manganui te au papuritia tei ripoti mai e i te rauka anga ia ratou teia takainga, kua tukatau ratou i reira i te oronga atu i te tuatua meitaki i te pae openga. Me kare te tangata e inangaro i te tuatua mai, kare e anoanoia i te maro iaia kia tuatua. Akaoti maru i te tuatuaanga e e neke atu.

5. Eaa tei tauturu i tetai tuaine akama ua kia akakitekite aere ua?

⁵ Iaia e okooko ra i ko i te makete, kua akara meitaki ua atu tetai tuaine akama ua na mua, e kua katakata atu. Me katakata mai te tangata, ka tuatua poto ua atu aia. Me ariu meitaki mai te tangata, e oronga ana teia i te tukatau kiaia kia komakoma ua atu. E akarongo meitaki ana aia e e tauta ana i te akamanako i te tuanga tau o te tuatua meitaki ta te tangata ka reka mai. Na te taangaanga i teia tu, e maata tana au puka i tua aere e kua akamata katoa aia i tetai apii Pipiria.

6. Akapeea tatou me akamata i tetai tuatuaanga i roto i te ngai ka tau kia akakitekite aere ua?

⁶ Akamata i te Tuatuaanga: Eaa ta tatou ka tuatua i te akamata i tetai tuatuaanga? I te tuatuaanga a Iesu ki tetai vaine i ko i te ruavai, kua akamata aia na te pati anga ki taua vaine ra i tetai vai inu. (Ioa. 4:7) Penei ka rauka ia tatou te akamata i tetai tuatuaanga na tetai akaaraveianga oaoa me kore na tetai uianga. Ia koe e tuatua ra, penei ka kite mai koe i tetai atianga kia akamata i tetai manako Tuatua Tapu e penei kia ruru i te ua o te tuatua mou. (Kohe. 11:6) E puapinga ana tetai pae na te akakiteanga i tetai tuatua e akakeu ra i te manako kia ui mai i tetai uianga e kia kite i te pauanga. Ei akaraanga, ia koe e tiaki ra i te taote, penei ka akamata koe i tetai tuatuaanga i te karanga anga e, “Ka rekareka roa au me kare au e maki akaou.”

7. Akapeea te tu akara meitaki i te tauturu anga ia tatou kia akakitekite aere ua?

⁷ Ka rauka katoa ia tatou te akamata i te au tuatuaanga me e tu akara meitaki to tatou. Me kite tatou i tetai metua e tana au tamariki mako, penei ka akameitaki tatou iaia e ka ui atu e, “Eaa tei tauturu ia koe kia riro ei metua meitaki?” Kua akarongo tetai tuaine i te au tumu manako e uriuriia ra e tetai aronga i te angaanga, e kua akakite atu aia i tetai tuatua taka meitaki akatumuia ki runga i te au mea e rekaia ra e tona au taeake angaanga. Tona kite anga e ka akaipoipo tetai vaine i ko i tana ngai angaanga, kua oronga atu aia i tetai makatini E Ara! e uriuri ra e akapeea i te parani i tetai akaipoipo. Kua taki atu teia ki tetai atu au uriurianga Pipiria.

8. Akapeea tatou i te taangaanga anga i ta tatou au puka i te akamata i te au tuatuaanga?

⁸ Tetai mataara i te akamata i te au tuatuaanga, koia oki na te tatau anga i ta tatou au puka i te ngai ka kitea mai tatou. E eeu ana tetai taeake i Te Punanga Tiaki me kore te makatini E Ara! ki tetai atikara e tumu manako rekaia e e akamata ana i te tatau i te reira. Me kite aia i tetai tangata i te pae mai e akara maira i tana makatini, e ui ana aia i tetai uianga me kore e tuatua ana i tetai manako poto no runga i te atikara. E taki putuputu ana teia ki tetai pukapukaanga me kore akakitekiteanga. Te akaruke ua i tetai o ta tatou au puka ki te ngai ka kiteaia, penei ka akakeu i te manako o te aronga angaanga me kore o te au taeake apii kia ui mai no runga i te reira.

9, 10. (a) Akapeea tatou i te akatupu anga i te au atianga kia akakitekite aere ua? (e) Akapeea i rauka ai ia koe te rave i teia?

⁹ Akatupuia te Au Atianga: No te tu rapurapu o te angaanga tutu aere, eiaa tatou e akamanako i te akakitekite aere ua e, ko tetai mea ka tupu ua mai. Mari ra, ka anoanoia tatou kia akatupu i te au atianga i te akakitekite, ia tatou e rave ra i ta tatou angaanga i te au ra ravarai. Akamanako vave i te au tangata taau ka aravei, e e akamanako e penei ka akapeea koe i te akamata i tetai pukapukaanga oaoa. Kia papu e te vai ua ra taau Pipiria e te au puka taau ka akaari atu ki te aronga e inangaro maira.​—1 Pete. 3:15.

¹⁰ Na te tu kite karape, kua rauka i tetai au papuritia te akatupu i te au atianga kia akakitekite aere ua. Tetai tuaine e noo ra ki roto i tetai apatimani tiaki pakariia, e taangaanga ana i te ngai tamataora anga o te apatimani i te tapiripiri i te au potopotonga o te au tutu ngai manea aere. Me akamata te tangata i te tuatua kiaia no runga i te manea o taua au tutu ra, e taangaanga ana aia i taua atianga ra i te akamata i tetai tuatuaanga e te akakite kia ratou i te taputou a te Pipiria no “te rangi ou e te enua ou.” (Apo. 21:1-4) Ka rauka ainei ia koe te akamanako i tetai au mataara te ka rauka i te akatupu i te au atianga no te akakitekite aere ua?

11. Akapeea tatou me atoro atu i tei inangaro mai ta tatou i kite i te akakitekite aere ua?

¹¹ Atoroia tei Inangaro Mai: Me akarongo mai tetai kia koe, tauta i te atoro atu i te reira. Me ka tau, penei ka karanga atu koe ki te tangata e: “Mataora tikai au i te pukapuka atu kia koe. Akapeea au e aravei akaou ei ia koe kia pukapuka akaou taua?” Tetai au papuritia e oronga atu ana i to ratou ngai nooanga e te numero terepaoni ki te tangata e te karanga atu e: “Mataora tikai au i ta taua pukapukaanga. Me ka inangaro koe i te kite maata atu i ta taua i pukapuka ai, teia te ngai e aravei ei koe iaku.” Me kare e rauka ia koe uaorai i te atoro atu i tei inangaro mai, akanoo ki te putuputuanga ka tau kia rave i te reira na te tuku atu anga i te pepa Please Follow Up (S-43) ki te tekeretere o taau putuputuanga.

12. (a) Eaa ka akono ei e ka ripoti ei i te taime ta tatou e akapou ra i te akakitekite aere ua? (e) Eaa te au tupuanga tei rauka na roto i te au akakitekite aere ua? (Akara i te pia “Tupuanga o te Akakitekite Aere Ua!”)

¹² Ka anoanoia kia ripoti tatou i te au taime tei akapouia i te akakitekite aere ua. No reira, akapapu e te rekotiia ra te reira, noatu e e au miniti meangiti ua i te ra. Akamanako i teia: Me akakitekite aere ua tetai papuritia e rima miniti i te ra tataki tai, ka taea te reira ki te 17 mirioni tuma ora i te marama okotai!

13. Eaa te ka akakeu ia tatou kia akakitekite aere ua?

¹³ E au tumu ngateitei tikai to tatou kia akakitekite aere ua​—te aroa i te Atua e te tangata tupu. (Mata. 22:37-39) Ka akakeuia to tatou ngakau ki i te akameitakianga no te au tu e te au akakoroanga o Iehova kia tuatua no runga i “te mana kakā o tona ra basileia.” (Sala. 145:7, 10-12) Ka akakeu to tatou aroa tika tikai no to tatou tangata tupu ia tatou, kia taangaanga i te au atianga tau pouroa i te akakite atu i te tuatua meitaki, koi vai ake te tuatau. (Roma 10:13, 14) Ka rauka ia tatou pouroa i te akakitekite aere ua na te akamanako meitaki anga e te akapapaanga, e penei ka kite mai i te mataora i te akakite atu i te tuatua mou ki tetai tangata e tika ra te ngakau.

[Tataanga i te kapi 4]

Penei ka rauka ia koe te tauturu me ko toou akakoroanga e kia aravei i te tangata e kia akamata i te au tuatuaanga

[Tataanga i te kapi 5]

Na roto i te tu kite karape, manganui te au papuritia e kite ana i te akatupu i te au atianga kia akakitekite aere ua

[Pia i te kapi 5]

Au Manako no te Akamata i te Tuatuaanga

◼ Pure no te tauturu kia akamata koe

◼ Iki i te aronga akara anga oaoa, kare e rapurapu ana

◼ Akara meitaki i te tangata, katakata atu, e e tuatua no runga i tetai apinga ka reka korua

◼ Kia akarongo meitaki

[Pia i te kapi 6]

Tupuanga o te Akakitekite Aere Ua!

• Iaia i ko i te ngai maani motoka e tiaki ra kia ripeaia tona motoka, kua akakitekite tetai taeake ki te aronga takapini iaia, e kua tua atu i te aenga pepa patianga kia ratou kia tae mai ki te tuatua papuriki. I ko i tetai uruoaanga i tera mai mataiti, kua akaaravei pumaana mai tetai taeake iaia, kare ra aia i kite e koai. Ko tetai o te au tane tana i oronga atu i te aenga pepa i ko i te ngai maani motoka i te mataiti i topa! Kua aere taua tangata ra i te akarongo i te tuatua papuriki e kua tuku i tona ingoa i te pati i tetai apii Pipiria. Kua papetitoia raua ko tana vaine.

• Tetai tuaine tei kite i te tuatua mou na roto i te akakitekite aere ua, kua akariro i te au tangata tana e aravei ana na roto i tana au tamariki e toru, ei ngai tutu anga takake nana. Te o maira ki roto i tana ngai tutu aere, tona au tangata tupu e te au metua tana e aravei ana i te apii, e i ko i te au uipaanga a te au metua. Me aravei aia i te tangata e akakite ana aia ma te ngakau tae e, e tauturu puapinga te Pipiria kiaia i te utuutu i tana tamariki, e oti e taui ana aia i te aerenga tuatua. Inara no te mea kua akamata aia i te tuatuaanga, mama ua i reira iaia te akao mai i te Pipiria ki roto i te uriurianga. Na te rave anga i teia, kua rauka iaia te tauturu e 12 tangata kia papetitoia.

• I te atoro anga tetai tangata okooko initurini me kore insurance i tetai tuaine, kua taangaanga te tuaine i te atianga kia akakitekite atu. Kua ui aia ki te tangata e me ka inangaro taua tangata ra kia akapapu meitaki i tona tu meitaki i te pae kopapa, tona mataora, e te oraanga mutu kore. Kua karanga te tangata e ae e kua ui e, ko teea tu initurini tana e tuatua ra. Kua akaari te tuaine i te au taputou a te Pipiria e kua oronga atu i tetai o te au puka, tei tatauia e te tangata i roto i te aiai okotai. Kua akanooia tetai apii Pipiria. Kua akamata taua tangata ra i te aere ki te au uipaanga e kua papetitoia i muri mai.

• Iaia e rere ra na runga i te pairere, kua akamata tetai tuaine i te tuatua atu ki te vaine i te pae mai iaia e kua oronga atu i tetai akakitekiteanga. I te openga o taua rereanga pairere ra, kua oake atu te tuaine i tona ngai nooanga e te numero terepaoni, e kua akamaroiroi i taua vaine ra kia pati i tetai apii Pipiria me atoroia mai aia e te Au Kite o Iehova. I tera mai ra, kua tae atu e rua nga Kite ki te ngutupa o taua vaine ra. Kua akamata te vaine i te apii i te Pipiria, kua tere viviki tikai, kua papetitoia, e kare i roa ana kua akamata aia i te apii Pipiria nana uaorai ki te au tangata e toru.

• Tetai taeake matapo e 100 ona mataiti e noo ana ki roto i te ngai e akonoia ana te ruaine, e karanga ua ana e, “Ka inangaro tatou i te Patireia.” Kua taki atu teia ki te au uianga mei ko mai i te au neti e te aronga maki kia akamarama aia e eaa te Patireia. Tetai o te au vaine e angaanga ana ki reira, kua ui kiaia e eaa tana ka rave i roto i te Parataito. Kua pau aia e, “Ka puera toku nga mata e ka aere akaou au, e ka tutungi au i toku pereoo oparapara ki te ai.” No te mea e matapo aia, kua pati aia ki taua vaine ra kia tatau i te makatini kiaia. Te atoro anga mai te tamaine a te taeake, kua pati te vaine angaanga ki te tamaine i tetai tikaanga kia apai i te au makatini ki te kainga. Kua akakite tetai neti ki taua tamaine ra e, “Te tumu tuatua ou i roto i to matou ngai akono i te ruaine koia oki: ‘Ka inangaro matou i te Patireia.’”

• Tetai tuaine e tiaki ra i roto te raini i ko i tetai are kaikai, kua akarongo atu i tetai pupu tane ruaine e noonoo ra i te pae mai, e uriuri ra i te au manako poritiki. Kua karanga tetai o te au tangata e, kare e rauka i te kavamani i te akakore i to tatou au manamanata. Kua karanga te tuaine kiaia uaorai e, ‘Teia rai toku atianga.’ Kua pure aia i tetai pure poto e kua aravei atu ia ratou. Muri ake i te akakiteanga i tona ingoa, kua akakite aia kia ratou no runga i te Patireia o te Atua, te kavamani te ka akakore i te au manamanata o te tangata, e kua oronga atu i tetai poroutia kia ratou. I reira rai kua aravei mai te manitia iaia. Manako te tuaine e ka patiia aia e te manitia kia aere. Kare ra, kua akakite te manitia kiaia e te akarongo maira aia e ka inangaro katoa aia i tetai poroutia. Kua aravei katoa mai tetai vaine angaanga e akarongo maira, ma te roimata e pururu ra. I apii ana aia i te Pipiria e kua inangaro i te akamata akaou i tana apii.