Angaanga te ka Akaanga i te Roi
1 Ka akaanga te karere Pipiria i te roi o te katoatoa tei ariki e tei akono i te reira i roto i to ratou oraanga. (Sa. 19:7, 8) Ka tauturu te reira ia ratou kia matara mai mei te au apiianga tarevake e te au angaanga kino e te oronga mai i tetai manakonakoanga no te tuatau ki mua. Inara, kare ko te aronga anake ua tei rauka te tuatua meitaki te ka puapingaia. Te aronga tei akakite i te tuatua mou akaangaroi o te Pipiria ki etai ke atu ka akaanga katoaia to ratou uaorai roi.—Maseli 11:25.
2 Akaoraoraia e te Angaanga Orometua: Kua karanga a Iesu e ko te aronga tei ariki i te amo o te riro anga ei pipi Kerititiano, tei kapiti mai i te angaanga tutu aere e te akariro anga ei au pipi, ka ‘kiteaia te akaangaroianga i to [ratou] au meta.’ (Mata. 11:29, NW) Kua kitea katoaia e ia te tu oraora o te akakitekite atu ki etai ke. Mei te kai rai te tu o te reira kiaia. (Ioane 4:34) I te tono anga aia i te au pipi e 70 kia tutu aere, kua rekareka ratou ia ratou e kite ra e te turuturu ra a Iehova i ta ratou au tautaanga.—Luka 10:17.
3 Manganui te au Kerititiano i teia tuatau e akaoraoraia nei rai na roto i te piri atu anga ki roto i te angaanga tutu aere. Kua karanga tetai tuaine e: “E akaangaroi tikai te angaanga orometua no te mea te oronga maira te reira i te manako tika e te akakoroanga ki toku oraanga. Kua riro mai te au manamanata uaorai e te au taitaia i te au ra ei mea meangiti ua me rave atu au i te angaanga.” Tetai orometua maroiroi ke mai kua karanga e: “Te angaanga orometua . . . te akariro ra kia tika tikai a Iehova kiaku i te au ra ravarai e te oronga maira i te au kiaku e te tu mataora i roto roa tei kore e rauka na roto i tetai atu au ravenga.” E akangateiteianga tikai no tatou te riro ei au ‘oa rave angaanga no te Atua’!—1 Kori. 3:9.
4 E Maru ta Karaiti Amo: Noatu oki e te akoia maira te au Kerititiano kia ‘uapou ua atu ia ratou uaorai,’ kare ra a Iesu e titau mai ana kia maata atu te ka oronga i ta tatou ka rauka. (Luka 13:24) E tika tikai e, kua pati mai aia ia tatou kia ‘aere ki raro ake i tana amo ma ia.’ (Mata. 11:29, NW, tara.) Te aronga e tauta ra i te akono i te au turanga ngata kia papu e ko ta ratou angaanga ngakau tae, noatu e e meangiti ua, e mea mareka meitakiia ia i te Atua.—Mareko 14:6-8; Kolosa 3:23.
5 Mei teaa atura te akaangaroi anga kia tavini i tetai Atua e ariki rekareka maira i ta tatou ua atu ka rauka i te rave no tona ingoa! (Ebera 6:10) Kia tauta ua atu rai tatou i te oronga i to tatou katoaanga kiaia.