E Aru i to Iehova Tu Meitaki
1 Muri ake i te mataora o te kite anga i tetai opunga ra manea me kare i tetai kaikaianga reka, kare ainei tatou e akakeuia kia akameitaki ia Iehova, te Tumu o te au tu meitaki ravarai? Te akakeu ra tona tu meitaki ia tatou kia inangaro i te aru iaia. (Sa. 119:66, 68; Ephe. 5:1) Akapeea ra tatou i te akaari anga i te tu meitaki?
2 Ki te Aronga Irinaki Kore: Tetai mataara ka rauka kia aru tatou i to Iehova tu meitaki koia oki na te akaari anga i te manako ngakau tae no te aronga kare e pirianga kia tatou i roto i te akarongo. (Gala. 6:10) Na te akaari anga i te tu meitaki na roto i te au mataara mako e akatupu i te manako tau no runga i ta ratou akara mai anga i te Au Kite o Iehova e te karere ta tatou e apai ra.
3 Ei akaraanga, iaia e tiaki ra i ko i te kiriniki i te aremaki, kua noo tetai tungane painia mapu ua ki te pae i tetai vaine pakari te akara anga e maki kino atu i to te maataanga o tetai papaki i reira. I te tae anga tona taime no te aravei i te taote, kua tuku aia i teia vaine nei kia apai i tona ngai. I muri mai kua aravei akaou aia iaia, i teia taime i ko i te makete, kua rekareka tikai aia i te kite anga iaia. Noatu oki e kare aia i ariki ana i te tuatua meitaki i mua ana, kua karanga ra aia e kua kite aia i teianei e e aroa tikai to te Au Kite o Iehova i to ratou tangata tupu. Kua akamataia atu i reira tetai apiianga Pipiria kiaia.
4 Ki to Tatou Au Taeake: Te aru katoa ra tatou i to Iehova tu meitaki me oronga tatou ia tatou uaorai i te tauturu atu i te au taeake akarongo. I te au tuatau tumatetenga, ko tatou tetai o te aronga mua i te aere i te tauturu i to tatou au taeake. Te akaari ra rai tatou i taua tu vaerua ra me tauturu tatou i te aronga e anoano apinga akaoro ra i te aere ki te au uipaanga, te atoro i te aronga makimaki, e te akamaora atu i te aroa no te aronga kare tatou i matau tikai i roto i te putuputuanga.—2 Kori. 6:11-13; Ebera 13:16.
5 Tetai mataara ta Iehova e akaari ana i te tu meitaki koia oki i roto i tana “akakore mai i te ara.” (Sa. 86:5) I te aruanga iaia, ka tau ia tatou kia akatutu i to tatou tu meitaki na te oronga anga atu i te akakore anga ara ki etai ke. (Ephe. 4:32) Ka tauturu teia i te akariro i to tatou pirianga ma to tatou au taeake akarongo ei mea ‘meitaki e te mataora.’—Sa. 133:1-3.
6 Kia riro ua rai te maata o to Iehova tu meitaki i te akakeu ia tatou kia pupu ua mai te akapaapaaanga nona e kia maringiringi ua te rekareka. E kia akakeu te reira ia tatou kia tauta i te aru i tona tu meitaki i te au mea ravarai ta tatou ka rave.—Sa. 145:7; Iere. 31:12.