Pia Uianga
◼ Ka tau ainei te apiianga Pipiria ngutuare kia ripotiia ki te putuputuanga?
Me rave tetai metua Kerititiano i tetai apiianga Pipiria ngutuare e ka piri mai te tamariki kare i papetitoia, penei e okotai ora te maata o ta te metua ka ripoti i te epetoma, okotai oki akaouanga i te epetoma, e e okotai apiianga Pipiria ngutuare i te marama. Ko te tu teia noatu e ka maata atu i te okotai ora te roa o te apiianga, e ka maata atu i te okotai taime i raveia ai i te epetoma, me kore me raveia ki te tamariki tataki tai.—Akara i te puka Our Ministry, kapi 104.
Mei te mea te katoatoa i roto i te ngutuare e e au Kite papetitoia, kare i reira te ora e kare katoa te apii uaorai e ripotiia no te tavinianga koro (tera ua me te apii ra rai te tamaiti i te rua o te puka i muri ake i te papetitoanga). I pera ai teia no te mea ko te ripoti tavinianga koro a te putuputuanga te akaata maira tikai e eaa te akatupuia ra i roto i te tutu anga o te tuatua meitaki e te apii anga i te tuatua mou o te Pipiria ki te aronga kare i te au tavini papetitoia no Iehova. (Mata. 24:14; 28:19, 20) Inara, kare teia e riro i te takore i te puapinga o te rave putuputu anga i tetai apiianga mei teia.
Na te au metua Kerititiano teia apainga no te apii ki ta ratou tamariki. Te aronga ka anoano tauturu i te akanoo me kore i te akameitaki atu i ta ratou apii ngutuare kia pati ki te aronga pakari no tetai tauturu. Mei te mea e ka tau te au turanga no tetai papuritia ke kia rave i tetai apiianga Pipiria ma tetai tamaiti kare i papetitoia me kore te tamaine no tetai ngutuare Kerititiano tei piri atu ki te putuputuanga, ka tau kia araveiia atu te akaaere akatere me kore te akaaere tavini. Me akatikaia taua apii ra, ko te tangata e rave ra i te reira kia ripoti i te reira mei tana rai e rave ana i tetai ua atu apiianga Pipiria.
Ko te tereni anga i te tamariki i roto i to Iehova au mataara ka maata roa atu te taime e te tautaanga ka pou i to te ka kiteaia i roto te ripoti tavinianga koro. (Deu. 6:6-9; Maseli 22:6) E tau kia akameitakiia te au metua Kerititiano no te rave anga i ta ratou apainga teimaa i te utuutu anga i ta ratou tamariki i te “apii ra ia ratou kia pakari ma te ako a [“Iehova,” NW] ra.”—Ephe. 6:4.