Tu Taokotaianga Mou o te Kerititiano—Akapeea?
1 Eaa ra te ka taokotai i te ono mirioni e ara atu tangata mei te 234 enua e tetai 380 pupu reo? Na te akamorianga ua a te Atua ko Iehova. (Mika 2:12; 4:1-3) Kua kite te Au Kite o Iehova mei tei tupu kia ratou uaorai e ko te tu taokotaianga mou Kerititiano e tika tikai ia i teia tuatau nei. Ei “okotai oki anana” i raro ake i to tatou “okotai oki tiaki,” e akakoro rai tatou i te patoi i te tu vaerua taokotai kore o teia ao.—Ioane 10:16; Ephe. 2:2
2 Ko to te Atua akakoroanga poka kore koia oki no te au mea kite pouroa tei angaia kia taokotaiia i roto i te akamorianga mou. (Apo. 5:13) I te kite anga i te puapinga o teia, kua akariro a Iesu i te tu taokotaianga o tana au pipi ei tumu no te pure akatenga. (Ioane 17:20, 21) Akapeea e rauka ai ia tatou tataki tai i te akatupu i te tu taokotaianga o te putuputuanga Kerititiano?
3 Akapeea e Rauka ai te Tu Taokotaianga: Me kare te vaerua e te Tuatua a te Atua, kare e rauka te tu taokotaianga Kerititiano. Na te taangaanga anga tatou i ta tatou e tatau ra i roto i te Pipiria e akatika i to te Atua vaerua kia aere au ua i roto i to tatou au oraanga. Ka tauturu teia ia tatou ‘kia vai rai te taokotaianga a te vaerua ra i te ruru o te au.’ (Ephe. 4:3) Ka akakeu te reira ia tatou kia akakoromaki i tetai e tetai i roto i te aroa. (Kolosa 3:13, 14; 1 Pe. 4:8) Te akatupu ra ainei koe i te tu taokotaianga na te manakonako anga no runga i ta te Atua Tuatua i te au ra ravarai?
4 Ta tatou angaanga kia tutu aere e te akariro i te tangata ei au pipi ka taokotai katoa ia tatou. Me angaanga tatou ma etai ke i roto i te angaanga orometua Kerititiano, “te tāpu meitaki ra kotou ma te vaerua okotai, e te ngakau okotai, i te uapou anga kotou ravarai i te akarongo i te evangelia nei,” ka riro mai i reira tatou ei “aronga rave angaanga katoa i te tuatua-mou nei.” (Philipi 1:27; 3 Ioane 8) Ia tatou e rave pera ra, ka akaketaketaia i reira te tatua taokotaianga o te aroa i roto i te putuputuanga. Kore ei e pati i tetai tangata kare akenei koe i angaanga kapiti ake kia aru mai ia koe ki te angaanga orometua i teia epetoma?
5 Mei teaa ra to tatou akameitakianga kia riro ei tuanga no te akataeakeanga mou anake i te pa enua i runga nei i te enua i teia tuatau! (1 Pe. 5:9) Kare i roa akenei, e tauatini ua atu tei kite tikai i teia tu taokotaianga takapini i te ao katoa i ko i te au Uruoaanga Pa Enua “E Akakaka i te Atua.” Kia akatupu ua rai tatou tataki tai i teia tu taokotaianga akaperepereia na te tatau anga i ta te Atua Tuatua i te au ra ravarai, na te akakore anga i to tatou au manamanata i roto i te aroa, e na te tutu anga i te tuatua meitaki “ma te ngakau okotai.”—Roma 15:6.