Tamou Marie i te Taokotai Anga i te Tuatau Openga Nei

“Kia tau ua ra ta kotou akonoanga i te evangelia . . . , te tāpu meitaki ra kotou ma te vaerua okotai, e te ngakau okotai, i te uapou anga kotou ravarai i te akarongo i te evangelia nei.”​—PHILIPI 1:27.

1. Eaa te tuke anga i rotopu i te Au Kite o Iehova e to teianei ao?

KO TEIA “taua tuatau openga ra.” Kare e ekoko anga, tei konei, kua “tupu te kino maata.” (2 Timoteo 3:1-5) I teia “tuatau openga” nei, ma tona oripu anga te taiate tangata nei, te taka meitaki ra te tuke anga takiri o te Au Kite o Iehova no to ratou tu au ua e te taokotai anga. (Daniela 12:4) Inara te umuumuia ra te aronga tataki tai o teia pamiri o te ao katoa nei no te aronga akamori ia Iehova kia akono pakari kia tamou marie i teia taokotai anga.

2. Eaa ta Paulo i tuatua no te tamou marieanga i te taokotai anga, e eaa te uianga ta tatou ka akamanako?

² Kua akamaroiroi te apotetoro ko Paulo i te au taeake Kerititiano kia tamou marie i te taokotai anga. Kua tata aia: “Kia tau ua ra ta kotou akonoanga i te evangelia a te Mesia ra: e kia aere atu au e akara ia kotou na, e kare ïa, kia akarongo ra au i te tuatua ia kotou e, te tāpu meitaki ra kotou ma te vaerua okotai, e te ngakau okotai, i te uapou anga kotou ravarai i te akarongo i te evangelia nei: E auraka rava e vi i to kotou au enemi: e akairo vai ua ïa te reira no to ratou mate, kareka ia kotou, e akairo ora ïa, te ora no ko mai i te Atua ra.” (Philipi 1:27, 28) Te akaari taka meitaki maira te au tuatua a Paulo e ka tau tikai tatou kia angaanga kapiti ei au Kerititiano. E, no reira, eaa te ka tauturu ia tatou kia tamou marie i to tatou taokotai anga Kerititiano i teia au tuatau timataanga nei?

E Kauraro ki te Anoano Tu-Atua

3. I naea e i akapeea te riro anga te au Kenitara peritome koreia mua ra ei au pipi na Karaiti?

³ Ko tetai mataara no te tamou marie i to tatou taokotai anga ko te kauraro ki te anoano tu-Atua i te au tuatau ravarai. Penei ka umuumuia tetai akatikatika anga i to tatou manako no teia. E akamanako i te au pipi ngati Iuda a Iesu Karaiti ra. I te tutu mua anga a te apotetoro ko Petero ki te au Kenitara peritome koreia ra i te mataiti 36 T.N., kua tuku atu te Atua i te vaerua tapu ki rungao i teia au tangata no te pa enua ra, e kua papetitoia ratou. (Angaanga, pene 10) Mei mua mai i te reira ra, ko te au ngati Iuda anake ra, e te au pipi ou no te enua ke ki te akonoanga ngati Iuda, e te au Samaria tei riro ei au pipi na Iesu Karaiti ra.​—Angaanga 8:4-8, 26-38.

4. I muri ake i te akatakaanga i tei tupu kia Korenelio ra, eaa ta Petero i tuatua, e eaa te timata anga ta teia i akatupu mai no te au pipi ngati Iuda a Iesu?

⁴ I te kite anga te au apotetoro e etai atu au taeake i Ierusalema ra i te riro anga ei pipi a Korenelio e etai atu au Kenitara ra, kua inangaro ratou kia akarongo atu i ta Petero ripoti. I muri ake i te akatakaanga i tei tupu kia Korenelio e etai atu au Kenitara tei akarongo ra, kua taopenga atu te apotetoro ma te au tuatua e: “E aite akera oki ta te Atua i oronga mai kia tatou [te au ngati Iuda] nei i tei akarongo i te Atu ia Iesu Mesia, i tana i oronga atu [i te vaerua tapu] kia ratou [te au Kenitara tei akarongo] ra; koai oki au ka tika ia kia māro atu i te Atua?” (Angaanga 11:1-17) Kua akanoo mai teia i tetai timataanga i te au pipi ngati Iuda a Iesu Karaiti ra. Ka kauraro ainei ratou i to te Atua anoano e ka ariki ei i te au Kenitara akarongo ra ei au taeake akamori no ratou? Me kare ka akakinoia ainei te taokotai anga o te au tavini o Iehova i te enua nei?

5. Eaa ta te au apotetoro e etai atu taeake i rave no te tika e kua oronga te Atua i te tataraara ki te au Kenitara ra, e eaa ta tatou ka kite mei teia tu manako mai?

⁵ Te na ko maira te tataanga: “E kite akera ratou [koia te au apotetoro e etai atu taeake] i taua au tuatua ra, kua tuku marie maira ratou, e akakakā atura i te Atua, na ko akera, Kua oronga katoa mari te Atua i te tataraara ora ki te etene.” (Angaanga 11:18) Na te reira tu manako i akaora e i akatupu i te taokotai anga o te au pipi a Iesu ra. I roto i tetai tuatau poto ua, kua tupu viviki te angaanga tutuanga i roto i te au Kenitara ra, me kare te au tangata o te pa enua, e kua vai ta Iehova ra akameitakianga ki runga i taua au angaanga ra. Ka tau katoa oki a tatou uaorai kia tuku marie me ka patiia mai ta tatou rave kapiti anga no te akanoo anga i tetai putuputuanga ou me kare me ka raveia tetai akatikatika anga teokaratiki i raro ake i te arataki anga a te vaerua tapu o te Atua ra. Ka mareka mai a Iehova i to tatou kapiti anga ma te ngakau e ka tauturu oki ia tatou kia tamou marie i to tatou taokotai anga i teia tuatau openga nei.

E Mou Marie i te Tuatua Mou

6. Eaa te tupu anga no te tuatua mou ki runga i te taokotai anga o te aronga akamori ia Iehova ra?

⁶ Ei tuanga no to Iehova aronga pamiri akamori, ka tamou marie tatou i te taokotai anga no te mea pouroa tatou “te apiiia e Iehova” e te mou ngaueue kore ra i te tuatua mou akakiteia maira. (Ioane 6:45; Salamo 43:3) I te mea te akatumuia ra ta tatou au apiianga ki runga i te Tuatua a te Atua, ka tuatua tatou katoatoa ma te rotai anga. Ka ariki mataora ua tatou i te kaikai vaerua te orongaia maira e Iehova na roto i “te tavini akono meitaki e te pakari.” (Mataio 24:45-47) Te tauturu maira taua apiianga tau tikai ra ia tatou kia tamou marie i to tatou taokotai anga i te ao katoa nei.

7. Me e rave anga ngata to tatou tataki tai i te kiteanga i tetai tumu, eaa ta tatou ka tau kia rave, e eaa ta tatou kare e tau kia rave?

⁷ Ka peea me e tumu ngata tetai no tatou tataki tai kia kite e kia ariki oki? Ka tau tatou kia pure no te pakari e kia kimi i roto i te au Tuatua Tapu e te au puka Kerititiano ra. (Maseli 2:4, 5; Iakobo 1:5-8) Penei ka tauturu te uriuri anga manako ma tetai o te aronga pakari. Me ka kore e kite meitakiia te tumu, penei e mea meitaki kia akaruke uaia te reira. Penei ake a tetai tuatau ka neneiia tetai atu akakite anga no runga i taua tumu ra, ei reira e akatereia atu ei to tatou maramaanga. Inara, e tarevake, kia tauta i te akariro ia etai ke i te putuputuanga ra kia ariki mai i to tatou uaorai manakoanga tuke ra. Ka riro teia ei ruruanga tataka keanga, kare i te rave anga kia akaora i te taokotai anga. Mei teaa ra te meitaki atu me ‘te aere ra tatou na te tuatua-mou’ e kia akamaroiroi ia etai atu kia rave pera oki!​—3 Ioane 4.

8. Eaa te tu manako tau ra ki te tuatua mou?

⁸ I te anere mataiti mua ra, kua tuatua a Paulo: “Teianei oki te kite makiri ua nei tatou, mei te mea e i na roto i te io; kareka i reira, e mata ïa, e e mata; i teianei te kite papaki tai nei au; kareka i reira, e kite pu tikai au, mei iaku katoa oki i kite tikaia nei.” (1 Korinetia 13:12) Noatu rai e kare te au Kerititiano mua ra i kite tikai i te au tumu ra, kua vai taokotaiia ratou. I teianei e maata atu te taka meitaki to tatou kite i te akakoro anga a Iehova e tana Tuatua no te tuatua mou. E no reira kia akameitaki tatou no te tuatua mou ta tatou i rauka mai na roto i te “tavini akono meitaki.” E kia akameitaki tatou e na Iehova i arataki ia tatou na tana akaaerenga. Noatu rai e kare ia tatou te kite pu i te tika i mua ana, kare tatou i pongi ana me kare i kaki ana i te pae vaerua ra. Kareka ra, kua akono mai to tatou Tiaki, ko Iehova, kia taokotaiia tatou e kua utuutu meitaki mai ia tatou.​—Salamo 23:1-3.

Kia Taangaanga Tika i te Arero!

9. Akapeea e raukaʼi kia taangaanga i te arero kia akatupu i te taokotai anga?

⁹ Ko te taangaanga i te arero ei akamaroiroi ia etai ke atu ko tetai mataara puapinga maata ia i te akatupu i te taokotai anga e te vaerua taeake anga. Te reta tei akaoti ra i tetai uianga no runga i te peritome anga, tei tukuia ki vao e te pupu akaaere o te anere mataiti mua ra, ko tetai tumu ia no te akamaroiroi anga. I muri ake i te tatauanga i te reira, “kua rekareka maata i taua akamaroiroi anga ra” te au pipi Kenitara i Anetioka ra. Kua rave a Iuda raua ko Sila tei tonokia atura mei Ierusalema ma te reta ra “i te akamaroiroi anga i te au taeake ma te au akoanga e manganui e kua akatinamou atura ia ratou.” Kare e ekoko anga, e kua akamaroiroi e kua akatinamou katoa oki i taua au taeake akarongo i Anetioka ra to Paulo raua ko Banaba noo anga kia ratou ra. (Angaanga 15:1-3, 23-32, NW) E maata te ka rauka ia tatou i te rave mei te reira rai i to tatou akaputu anga no te au uipaanga Kerititiano e ‘ka akamaroiroi atu ei tetai i tetai’ i to tatou vai anga ki reira e te au pauanga akamatutu atu.​—Ebera 10:24, 25.

10. Ei tamou marie i te taokotai anga, penei eaa te ka tau kia raveia me ka rokoia tetai akakinoanga?

¹⁰ Inara, ka rauka i te taangaanga tarevake i te arero ra i te akakoko i to tatou taokotai anga. “Koia katoa te arero nei e melo mea ngiti, e akatietie maata ra tana,” ta te pipi ko Iakobo i tata. “Ka akara na i te maata o te vaie e ka i te ai mea ngiti ra!” (Iakobo 3:5) E mea makitakita na Iehova te aronga akatupu i te karo. (Maseli 6:16-19) Ka rauka i taua tu tuatua ra i te akatupu kia kore te taokotai anga. E, no reira, ka peea me e akakinoanga tetai, koia oki, te akaputuanga i te akakino ki rungao i tetai me kare te tukuanga iaia kia tuatua akakinoia? Ka tauta ra te aronga pakari kia tauturu i tei rave tarevake ra. Inara, ko tei rave i te akakino anga ma te tataraara kore ka tau ia kia akaateaia ki vao kia tamou marie ei te tu au, te tau tikai, e te taokotai anga o te putuputuanga. No te mea, kua tata a Paulo: “Auraka kotou e kapiti atu i te tangata e karangaia e taeake kia riro ei tangata . . . akakino . . . , auraka katoa e kai atu i te manga i reira.”​—1 Korinetia 5:11.

11. Eaa ra i puapinga maataʼi kia taakaaka ua me kua tuatua tatou i tetai apinga tei akatupu ra i te pekapeka i rotopu ia tatou e tetai taeake akarongo ra?

¹¹ Ka tauturu ia tatou te tavaaanga i te arero kia tamou marie i te taokotai anga. (Iakobo 3:10-18) Inara me na tetai apinga na tatou i tuatua i akatupu i te pekapeka i rotopu ia tatou e tetai taeake Kerititiano ra. Kare ainei i te mea tau kia tamata tatou i te akatupuanga i te au ma to tatou taeake, na te tataraaraanga me te tau ra? (Mataio 5:23, 24) E tika, te umuumu ra teia i te tu akaaka, me kare te manako akaaka, inara kua tata a Petero: “Kia kakauia kotou i te akaaka; ‘e patoi te Atua i tei nengonengo, e oronga mai i te meitaki no tei akaaka.’” (1 Petero 5:5) Ka akakeu te tu akaaka ia tatou kia ‘aruaru atu i te au’ ma to tatou au taeake, ma te akatikaanga e kua tarevake tatou e te raveanga i te tataraara tau ra. Na teia e tauturu kia tamou marie i te taokotai anga i te pamiri o Iehova.​—1 Petero 3:10, 11.

12. Akapeea tatou me taangaanga i te arero kia akatupu e kia tamou marie i te taokotai anga o te au tangata o Iehova ra?

¹² Ka rauka ia tatou i te akatere atu i te vaerua pamiri i roto i te aronga o te akaaerenga a Iehova ra me ka taangaanga tika tatou i to tatou arero. I te mea ko ta Paulo te reira i rave, kua rauka iaia kia akamaaraara atu i to Tesalonia: “Kua kite oki kotou i ta matou ako anga atu e te akapumaana anga atu e te akaue anga atu ia kotou ravarai mei te metua i tana tamariki, Kia tau to kotou aerenga i te Atua ra.” (1 Tesalonia 2:11, 12) I tana akanoo anga i tetai akaraanga meitaki no teia tu, kua rauka ia Paulo i te raurau i te au taeake Kerititiano kia tuatua “akapumaana atu i te ngakau taitaia.” (1 Tesalonia 5:14) E tamanako ana i te maata o ta tatou ka rave na te taangaanga i te arero kia akapumaana, kia akamaroiroi, e kia akamatutu ia etai atu. Ae, “te tuatua ra i tuatuaia i te tuatau e tau ei, e meitaki roa ïa.” (Maseli 15:23) Pera katoa oki, te tauturu ra taua tu tuatua kia akatupu e kia tamou marie i te taokotai anga i te au tangata o Iehova ra.

E Rave i te Akakore Anga Ara!

13. Eaa ra i tau ei kia rave tatou i te akakoreanga ara?

¹³ Te akakoreanga i te ara a tetai tei tataraara maira e mea meitaki ia me kia tamou marie tatou i te taokotai anga Kerititiano ra. E kia peea te putuputu ta tatou akakore anga tau i te ara? Kua tuatua a Iesu kia Petero: “Kare . . . kia taki itu ua, Kia itu ra ngauru i te taki itu anga.” (Mataio 18:22) Me kare tatou e akakore i te ara te patoi ra tatou i te meitaki no tatou uaorai. No teaa ra? No te mea, ko te riri e te utuutuanga i te akamoupuku ka akakore i te au no to tatou manako. E me ka matauia tatou no te au tu takinga kino e te kore e akakore i te ara, penei ka apai mai i te kopae ke anga ki runga ia tatou uaorai. (Maseli 11:17) Te mouanga i te akamoupuku e akamareka koreanga i te Atua e ka taki atu ki te ara kino. (Levitiku 19:18) Kia maara e kua tipuia te upoko o Ioane Papetito i te ravenga paraniia e Herodia rave kino ra, tei ‘riri iorā iaia.’​—Mareko 6:19-28.

14. (a) Eaa ta Mataio 6:14, 15 apii mai ia tatou no runga i te akakoreanga ara? (e) Ka tau tikai ainei tatou kia tiaki no tetai tataraanga ara i mua ake ka akakore ei i te ara a tetai ra?

¹⁴ Te kapiti ra ta Iesu pure akaraanga i teianei au tuatua: “E akakore mai i ta matou ara; te akakore nei oki matou i ta tei ara katoa ia matou nei.” (Luka 11:4) Me kare tatou e akakore i te ara, te akono ra tatou i te tu kino e, a te tuatau ki mua kare te Atua ko Iehova e akakore akaou mai i ta tatou au ara, no te mea kua tuatua a Iesu: “Kia akakore oki kotou i ta etai ke ra ara, e akakore katoa to kotou Metua i te ao ra i ta kotou; Kia kore ra kotou e akakore i ta etai ke ra ara, kare katoa oki to kotou Metua i te ao ra e akakore mai i ta kotou ara.” (Mataio 6:14, 15) No reira me te anoano tika ra tatou kia rave i ta tatou tuanga i te tamou marieanga i te taokotai anga i roto i te pamiri akamori ia Iehova, ka akakore ra tatou i te ara, penei na te akangaropoina ua i tetai tarevake tei tupu mai no te manako kore ua e kare no tetai manako kino ra. Kua tuatua a Paulo: “E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei [“ia Iehova,” NW] i akakore i ta kotou na, e akapera katoa kotou.” (Kolosa 3:13) Me te akakore ra tatou i te ara a tetai, te tauturu ra tatou kia tamou marie i te taokotai anga meitaki o ta Iehova akaaerenga.

Taokotai Anga e te Tuku Anga Tika a Tetai

15. Eaa te ka tauturu i te au tangata o Iehova kia tamou marie i te taokotai anga i te akonoanga i etai au tuku anga tika ra?

¹⁵ Kua maani mai te Atua ia tatou ei au rima rave rangatira i te mea tau ma te tika e te apainga kia tuku i ta tatou tika. (Deuteronomi 30:19, 20; Galatia 6:5) Inara, te rauka ra ia tatou te tamou marie i to tatou taokotai anga no te mea te akono ra tatou i te au ture Pipiria e te au kaveinga oki. Ka akamanako tatou i te reira me te tuku ra i ta tatou tika. (Angaanga 5:29; 1 Ioane 5:3) Penei me ka tu mai tetai uianga no te tu takake. Ka rauka ia tatou te tuku i tetai tika na te maaraanga e “kare [tatou] i to teianei ao” e kua ‘tupaki tatou i ta tatou au koke ei auri arote.’ (Ioane 17:16; Isaia 2:2-4) Mei te reira katoa, me ka tuku tatou i tetai tika no to tatou pirianga ki te Au Enua, ka akamanako tatou i ta te Pipiria tuatua no te oronga i “ta te Atua ra, e apai ïa ki te Atua,” ma to tatou uaorai kauraroanga i “te aronga mana taoonga” i te au apinga a te enua ra. (Luka 20:25; Roma 13:1-7; Tito 3:1, 2) Ae, na te akamanako anga i te au ture Pipiria e te au kaveinga i ta tatou au tuku anga tika ka tauturu i te tamou marie i to tatou taokotai anga Kerititiano.

16. Akapeea ka raukaʼi ia tatou te tauturu kia tamou marie i te taokotai anga i te tuku anga i te au tika kare ra i te tika e kare oki i te tarevake i ta te Tuatua Tapu ra? E akatutu mai.

¹⁶ Ka rauka ia tatou i te tamou marie i te taokotai anga Kerititiano noatu rai i te tuku anga i tetai tika na tatou kare ra i tika e kare oki i tarevake i ta te Tuatua Tapu. Na ea? Na te akaarianga i te manako aroa no etai ke ra penei ka mamae i ta tatou tuku anga tika ra. Ei akatutu anga: I te putuputuanga i Korinetia i taito ra, kua tu mai tetai uianga no runga i te kiko manu tei tuku atingaia ki te au itoro ra. E tika ra, e kare tetai Kerititiano e piri atu ki tetai ravenga akamori itoro. Inara, kare i te ara kia kai i te toenga kiko tei akataʼe tikaia ra te toto no teia tu tei okoia ra i te makete. (Angaanga 15:28, 29; 1 Korinetia 10:25) Inara, kua taitaia te akava ngakau o tetai papaki Kerititiano no te kaianga i teianei kiko manu. No reira kua raurau a Paulo i etai atu Kerititiano kia kopae i te akamaitu anga ia ratou ra. Ko te tika, kua tata aia: “E teianei kia maitu taku taeake i te kai ra, kare rava au e kai i te puaka e tuatau ua atu, ko te maitu aea taku taeake iaku.” (1 Korinetia 8:13) No reira noatu me kare e ture me kare kaveinga Pipiria te o maira ki roto, mei teaa ra te aroa anga kia akamanako ia etai ke atu me te rave ra i te tuku anga tika te ka akatupu i te kino i te taokotai anga i to te Atua ra pamiri!

17. Eaa te mea meitaki kia raveia me ka tuku tatou uaorai i etai tika?

¹⁷ Me kare tatou i papu ko teea te mea tika kia rave, e mea pakari kia iki i tetai rave anga te ka akaruke mai ia tatou ma te akava ngakau ma, e kia tau etai atu kia akangateitei i ta tatou iki anga. (Roma 14:10-12) Inara, me ka tau tikai tatou kia akono i tetai tuku anga tika na tatou uaorai, ka tau tatou kia kimi i ta Iehova arataki anga na roto i te pure. Mei te tata taramo rai, ka rauka ia tatou i te pure ma te manako papu e: “Ka tuku mai ana i to taringa kiaku nei. . . . E mato oki koe noku, e akapuanga oki koe noku: e no toou ra ingoa, e arataki mai koe, e e akakite mai kiaku.”​—Salamo 31:2, 3.

Kia Tamou Marie te Taokotai Anga Kerititiano

18. Akapeea ta Paulo akatutu anga mai i te taokotai anga o te putuputuanga Kerititiano ra?

¹⁸ I roto ia 1 Korinetia pene 12, kua taangaanga a Paulo na te kopapa tangata e akatutu mai i te taokotai anga o te putuputuanga Kerititiano. Kua akaketaketa mai aia i te akono kapipiti anga e te puapinga maata o te au mema tataki tai. “Naringa oki ratou katoa e melo okotai ra, teiea iora te kopapa i reira?” ta Paulo i ui. “I teianei ra, manganui te melo, okotai ra kopapa. Kare oki te mata e tika kia karanga ki te rima e, Kare ua atu rai koe iaku nei: e te upoko kia karanga ki te vaevae e, Kare ua atu rai korua iaku nei.” (1 Korinetia 12:19-21) Mei te reira katoa oki, kare tatou katoatoa i roto i te pamiri akamori ia Iehova e rave i te angaanga okotai. Inara, te taokotaiia ra tatou, e te anoano ra tatou tetai i tetai.

19. Akapeea tatou ka puapingaiaʼi mei ta te Atua ra au apinga vaerua, e eaa ta tetai taeake kua ruaine maira i tuatua no teia tu?

¹⁹ Mei te kopapa te anoano ra i te kai, te utuutu anga, e te arataki anga te anoano ra tatou i te au apinga vaerua ta te Atua e oronga maira na tatou na roto mai i tana Tuatua, tona vaerua, e tana akaaerenga oki. E puapingaiaʼi i teia au apinga, ka tau tikai tatou ei tuanga no to Iehova ra pamiri i te enua nei. I muri ake i etai mataiti e manganui te tavini anga i te Atua ra, kua tata tetai taeake: “Te akameitaki maata nei au e kua noo au i roto i te kite i te au akakoro anga a Iehova mei taua tuatau mua maira i mua ua ake i te 1914 kare ra i marama meitaki te au mea katoatoa . . . kia tae mai ki teia tuatau te kaka marama mai nei te tuatua mou mei te ra i te avatea tikai. Me e apinga tetai tei puapinga maata roa kiaku nei, ko te tika ia o te piri vaitataanga ki te akaaerenga akara mataia a Iehova ra. Na te tupu anga mua mai kiaku nei i apii iaku kia kite i te tau kore o te irinaki anga ki te manakoanga tangata ua nei. I te oti anga te akanoo toku manako ki runga i taua tumu ra, kua akapapuia toku manako kia vai tamou ma te akaaerenga tiratiratu ra. Akapeea atu oki e raukaʼi i tetai te akaperepere anga e te akameitakianga a Iehova?”

20. Eaa ta tatou ka tau kia tamanako papu kia rave no to tatou taokotai anga ei au tangata no Iehova?

²⁰ Kua kapikiia e Iehova tona au tangata kia aere mai ki vao i te poiri e te tu taokotai anga kore o teianei ao. (1 Petero 2:9) Kua apai mai aia ia tatou ki roto i te taokotai anga akameitakiia ma ia katoa uaorai e ma to tatou au taeake akarongo oki. Ka vairai teia tu taokotai anga i roto i te akatereanga ou o te au mea te vaitata mai nei i teianei. No reira, i teia tuatau openga kino maata nei, e ‘kakau ia tatou uaorai ma te aroa’ e kia rave i te au mea ravarai te ka rauka ia tatou ei akatupu kia tamou marie to tatou taokotai anga meitaki.​—Kolosa 3:14.

Akapeea Koe me Pau?

◻ Eaa ra ka raukaʼi i te raveanga i to te Atua ra anoano e te mouanga i te tuatua mou kia tauturu ia tatou kia tamou marie i te taokotai anga?

◻ Eaa ra te piri anga o te taokotai anga ki te taangaanga tika i te arero ra?

◻ Eaa ra te o atura ki te akakoreanga ara?

◻ Akapeea e raukaʼi ia tatou te tamou marie i te taokotai anga i ta tatou uaorai tukuanga tika?

◻ Eaa i tau ei kia tamou marie i te taokotai anga?

[Tutu i te kapi 16]

Mei ta teia tiaki akono kapiti anga i tana anana, pera katoa Iehova te akono taokotai anga i tona iti tangata

[Au Tutu i te kapi 18]

Na te tataraaraanga ma te akaaka me akatupu tatou i te tarevake, te tauturu ra tatou i te akamaata i te taokotai anga