Aru i te Tu Ngakau o Iesu
1. Eaa te tu ngakau ta Iesu i akaari?
1 Noatu e kare tatou i kite ana i te tamaiti a te Atua, na roto i te au rekoti tei tataia o to Iesu oraanga e te angaanga orometua, kua rauka tikai ia tatou i te inangaro iaia. (1 Pe. 1:8) Kia tau ki te anoano a tona metua, kua akaruke aia i tona turanga teitei i te rangi ra e kua aere mai ki te enua nei. Ei tangata ra, kua tavini aia ma te karapii kore ki etai ke e kua oronga aia i tona oraanga no te tangata nei. (Mata. 20:28) Te raurau maira te tuatua a te Atua ia tatou e: “Kia okotai rai o kotou tu ngakau e to te Mesia ra to Iesu.” Akapeea tatou i te aru anga i tona vaerua akaatinga karapii kore?—Philipi 2:5-8.
2. Eaa te akaaoanga ta te au Kerititiano e manganui e aro atu ana, e eaa te ka tauturu ia ratou i te autu i te reira?
2 Me Manako Roiroi Ana: Noatu e e tangata apa kore a Iesu, kua roiroi ana rai aia. I tetai atianga, “roiroi akerā [aia] i te aerenga,” kua oronga aia i te akakitekite anga meitaki ki tetai vaine Samaria. (Ioane 4:6) E manganui te au Kerititiano te aro nei i te akaaoanga aiteite. I muri ake i tetai epetoma i te angaanga roiroi tikai, penei e mea ngata i te kite i te maroiroi i te piri atu i roto i te angaanga tutu anga. Inara, me rave putuputu tatou i te reira, ka kite mai tatou e te akaoraora ra te angaanga orometua Kerititiano ia tatou i te pae vaerua.—Ioane 4:32-34.
3. Akapeea tatou i te aru anga i to Iesu inangaro i te apii?
3 I tetai atu atianga, kua aere atu a Iesu e tana au pipi ki tetai ngai motutaa e rauka ai no tetai taime poto ua i te akaangaroi. Inara, kua kitea mai e tetai urupu maata e kua oro atu i te aravei ia ratou. Kare oki i riri ana, “kua tangi atura [Iesu] ia ratou” e kua akamata i te ‘apii atura ia ratou i te au tuatua e manganui.’ (Mareko 6:30-34) Te umuumu katoaia ra te tu aiteite i te akamataanga e te akonoanga i te au apii Pipiria. Te umuumuia ra te tautaanga putuputu e te inangaro tikai no te tangata. Me kare koe e akono ana i tetai apii Pipiria i teianei, auraka e tuku i te au i te tautaanga i te kimi i tetai.
4. Akapeea te painia tauturu i te tauturu anga ia tatou i te aru i te tu ngakau o Karaiti?
4 Tuku i te Au Inangaro Pae Vaerua Na Mua: Ka rauka te painia tauturu i te tauturu ia tatou i te akara maata atu ki runga i te au angaanga pae vaerua. Kua tata tetai tuaine mapu e: “Kua akamaroiroi mai tetai metua vaine o tetai o toku au taeake ia maua roa ai i te painia tauturu kiaia e tai marama. Kua mataora tikai au e kua kapiti atu maua kiaia. Kua rekareka au i te kite meitaki atu anga i te au taeake e te au tuaine, e kare i roa ana mei toku uaorai pamiri rai ratou. Kua rekareka katoa au e kua maata mai tetai tuatau i te tuatua atu ki tetai ke no runga ia Iehova e i te apii atu ia ratou i te au tuatua mou umere o te Patireia. Kua akariro pouroa teia au mea iaku kia manako ngakau piri vaitata atu kia Iehova e tana akaaereanga.”—Sa. 34:8.
5. Eaa ra tatou ka tamou ua atu rai i te tauta i te aru i te tu ngakau o Iesu?
5 Te aro pouroa nei tatou i tetai tamaki anga i rotopu i to tatou uaorai kopapa apa e to tatou inangaro i te akamareka ia Iehova. (Roma 7:21-23) Ka tau tatou kia kopae i te vaerua inangaro kore o te ao nei. (Mata. 16:22, 23) Ka rauka ia Iehova i te tauturu ia tatou i te autu no runga i teia na roto i tona vaerua tapu. (Gala. 5:16, 17) Ia tatou e tapapa atu nei i to tatou akaoraanga i roto i to te Atua ao ou tuatua tika, kia aru tatou i te tu ngakau o Iesu na te tukuanga i te au inangaro Patireia e te au inangaro o tetai ke i mua atu i to tatou uaorai.—Mata. 6:33; Roma 15:1-3.