Tetai Akakoroanga Puapinga no te Mataiti Tavini Anga Ou
1. Eaa tetai akakoroanga ta tatou ka akamanako atu no te mataiti tavinianga ou?
1 Ka anoanoia tatou kia akanoo i te au akakoroanga kia tere ki mua i te pae vaerua. Eaa taau au akakoroanga uaorai i akanoo no te mataiti tavinianga ou? Tetai akakoroanga meitaki tikai koia oki kia painia tauturu e tai marama e tere atu. I te mea e e umuumu ana teia angaanga mataora i tetai paranianga i mua atu, e taime meitaki teia i te akamanako atu no te tuatau ki mua. Eaa ra ka akamanako ei te painia tauturu ei akakoroanga?
2. Eaa tatou ka akamanako ei te painia tauturu ei akakoroanga?
2 Au Tumu kia Painia Tauturu: I te painia tauturu anga te akamareka ‘maata atura’ tatou i to tatou Metua i te rangi na te akamaata anga i to tatou taime i roto i te angaanga orometua. (1 Tesa. 4:1) Me akamanako tatou i te au apinga pouroa ta Iehova i rave no tatou, ka akakeuia to tatou ngakau kia akakite atu ki tetai ke no runga iaia. (Sa. 34:1, 2) Te kite maira a Iehova e te akaperepere maira i te au atinga uaorai ta tatou e akono ra kia maata atu ta tatou angaanga i roto i te angaanga orometua. (Ebera 6:10) I te kite anga e te akamareka ra tatou ia Iehova na roto i ta tatou angaanga pakari, te oronga maira i te rekareka maata kia tatou.—1 Para. 29:9.
3, 4. Akapeea tatou e puapinga ai mei te painia tauturu anga?
3 Tei matauia, te maata atu taau rave anga i tetai apinga, te mama rava atuia e te maata atu te mataora i te raveanga i te reira. I te akamaata atu anga i te taime i roto i te angaanga orometua, ka ngoie ua ia koe i te tuatua atu i ko i te au ngutupa. Ka tukatau mai koe i te akamataanga i te au pukapukaanga e te taangaanga anga i te Pipiria. Te maata atu i taau uriurianga i toou irinakianga, te ketaketa rava atu anga o te reira. E manganui tei kare i akono ana i tetai apii Pipiria, kua rauka ra ia ratou i te akamata i tetai, ia ratou e painia tauturu ra.
4 Penei ko te painia tauturu anga katoa te akamaroiroianga te anoanoia ra kia autu atu i te tu apikepike i te pae vaerua. Kua kite mai tetai taeake tei painia tamou ana i mua atu e, e maata roa tona taime ki tana angaanga moni, e kua manako mai aia i te painia tauturu e tai marama. Kua karanga aia e: “Kare roa au i irinaki ana e kua akamaroiroi maata tikai teia marama okotai iaku i te pae vaerua! Kua iki mai au i te painia tauturu ua atu rai, e kua taki atu teia iaku kia painia tamou akaou.”
5. Akapeea tatou i te autu anga i te au manako tukatau kore?
5 Autu te Au Arairai Anga: Penei e emiemi ana tetai pae kia piri atu no te mea te manako ra ratou e te ngere ra ratou i te tu kite ei aronga tutu aere. Me te akatupu ra teia ia koe kia ekoko, ka rauka ia Iehova i te tauturu ia koe mei tana rai i rave kia Ieremia. (Iere. 1:6-10) Noatu e “reo murare oki, [to Mose] e te ngunguau,” kua taangaanga a Iehova iaia kia akatupu i Tona anoano. (Exodo 4:10-12) Me kare koe e tukatau roa ana, e pure kia Iehova no te tu mataku kore.
6. Akapeea e rauka ai i te painia tauturu noatu te au maki me kore te maata i te angaanga?
6 E emiemi ana ainei koe i te piri atu no te maki me kore no te maata i te angaanga? Me e tangata maki koe, ka rauka ia koe i te painia tauturu me rave marie ua koe i taau ka rauka. Me e maata taau angaanga, penei ka kite mai koe e ka rauka ia koe i te tuku atu i tetai au angaanga kare e puapinga roa ana ki tetai marama ke. Kua rauka i tetai pae te angaanga tinamou ra i te akanoo i tetai tuatau kia painia tauturu na te pati anga e tai me kore e rua ra orote.—Kolosa 4:5.
7. Eaa i puapinga ai kia pure kia rauka i te painia tauturu?
7 Akapeea te Raveanga i te Reira: E pure koe no runga i toou inangaro kia painia tauturu. E pati kia Iehova kia akameitaki mai i taau au tautaanga kia akamaata atu i taau angaanga orometua. (Roma 12:11, 12) Ka tauturu aia ia koe i te akono i te au ikianga pakari e akapeea i te tauianga i taau papaanga. (Ia. 1:5) Me ngere koe i te inangaro, e pati kia Iehova kia tauturu mai ia koe kia kite mai i te mataora i roto i te angaanga tutu anga.—Luka 10:1, 17.
8. Akapeea te akonoanga ia Maseli 15:22 ei tauturu ia koe kia painia tauturu?
8 E uriuri ei pamiri i te akakoroanga kia painia tauturu. (Maseli 15:22) Penei ka rauka tetai mema o te pamiri i te painia tauturu me turuturu tetai pae i roto i te pamiri ia ratou. E uriuri atu ki tetai ke i roto i te putuputuanga i toou inangaro kia painia, ki te aronga tikai e aiteite to ratou au turanga ki toou. Penei ka akakeu teia i te tu maoraora kia painia tauturu.
9. Ko teea taau marama ka iki mai i te painia tauturu?
9 Ia koe e akara ra i taau karena teokaratiki no te mataiti tavinianga ou, aea e rauka ai ia koe i te painia tauturu? Me te angaanga tinamou ra koe me kore te aere ra ki te apii, penei ka inangaro koe i te akamanako i te au marama e orote tetai me kore e rima Maanakai me kore e rima Tapati i roto i te reira. Ei akaraanga, e rima epetoma katoa i roto ia Tepetema, Titema, Mati e Aukute. E rima Maanakai i roto i te marama o Me, e e rima Tapati i roto ia Tiunu. Me e maki toou, e akamanako koe i te au marama e e meitaki ua te reva. Penei ka akamanako katoa koe i te painia i te marama i papaia ai te akaaere tutaka kia atoro mai i toou putuputuanga. I tona atoroanga, ka rauka ia koe te tikaanga kia aere atu ki te tuanga mua o te uipaanga tei raveia ki te au painia tamou. I te mea ka tano atu te Akamaaraanga ki te ra 22 o Mati a teia mataiti ki mua, e au marama meitaki a Mati, Aperira, e Me no te painia tauturu. Me iki mai ana koe i te marama me kore te au marama taau e inangaro ra i te painia tauturu, e akamata i te tata i tetai papaanga te ka tauturu ia koe i te itae i te ora e umuumuia ra.
10. Eaa taau ka rave me kare e rauka i te painia tauturu?
10 Noatu me te kite maira koe e kare e rauka ia koe i te painia tauturu i roto i te mataiti tavinianga e tu mai nei, ka rauka rai ia koe i te akono tamou i tetai inangaro no te painia. Kia rave tamou ua atu rai i taau ka rauka i te rave i roto i te angaanga orometua, i te irinakianga e te mareka maira a Iehova i taau tautaanga ngakau tae kia oronga kiaia i toou maroiroi katoa. (Gala. 6:4) Kia turuturu, e kia akamaroiroi i te aronga e rauka ra i te painia tauturu. Penei ka rauka ia koe i te taui i taau papaanga kia piri atu ki roto i te angaanga orometua e tai ra akaou i roto i te epetoma ki te aronga e painia ra.
11. Eaa tatou ka anoano ei i te tu rapurapu?
11 Te marama ra te iti tangata o Iehova i te tu rapurapu o to tatou tuatau. E angaanga tetai e anoanoia ra kia raveia—ko te tutu anga i te tuatua meitaki. Te o maira te oraanga o te au tangata, e e tuatau poto ua te vai nei. (1 Kori. 7:29-31) Ka akakeu te aroa no te Atua e no te tangata tupu ia tatou kia rave i ta tatou ka rauka i roto i te angaanga orometua. Ma te tautaanga e te parani meitakianga, penei ka rauka ia tatou i te painia tauturu e tai ua marama i roto i te mataiti tavinianga ou—e akakoroanga puapinga tikaiia!