Akameitaki i to Iehova Aroa Takinga Meitaki
Te Matenga o Karaiti Kia Akamaaraia ia Mati 24
1. Akapeea a Iehova i te akaari anga mai i te takinga meitaki no tatou?
1 Kua kapiki akera te tata taramo e: “Kia akameitaki oki ratou ia Iehova i tona ra [“takinga meitaki,” NW] e te au angaanga taka ke nana i te tamariki a te tangata nei.” (Sa. 107:8) E maata roa atu to te Atua aroa takinga meitaki i tona aroa maru ua no te tangata. Te taka meitaki ra te reira i roto i te tuatua akapaapaa akauruia: “Kua turu mai to takinga-meitaki iaku, e Iehova.” (Sa. 94:18) E takinga meitaki umere tikai ta Iehova i akaari mai i te oronga anga mai i tana Tamaiti anau tai no tatou!—1 Ioane 4:9, 10.
2. Akapeea tatou me akaari i ta tatou akameitakianga kia Iehova?
2 I te Akamaaraanga i te Matenga o Karaiti e vaitata maira, akapeea tatou me akameitaki i “te Atua [“takinga meitaki.” NW]”? (Sa. 59:17) Ka inangaro tatou tataki tai i te akataka i tetai taime i te manakonako no runga i to Iesu au ra openga i te enua nei. (Sa. 143:5) Ka puapinga katoaia te aru i te papaanga no te tatauanga Pipiria takake no te Akamaaraanga, mei tei papaia i roto i te Examining the Scriptures Daily—2005 e, me ka rauka, kapiti mai i te tatauanga e te kimikimianga i roto i te pene 112-16 o te puka Te Tangata Maata Rava Atu ma te au puka ke atu tei akatumuia ki runga i te Pipiria. Akamanako meitaki no runga i te au irava e tatau ra koe, auraka e tivata. (1 Timo. 4:15) Kare te akamanakoanga i te Tuatua a te Atua na roto i te pure e akamatutu anake ua i to tatou ngakau mari ra te akakite katoa ra i to tatou aroa no Iehova.—Mata. 22:37.
3, 4. (a)Akapeea tatou me aru i te tu o to tatou au taeake i Riperia? (e) Koai taau e manako ra i te pati ki te Akamaaraanga?
3 Akamaroiroi i Etai ke Kia Akameitaki i te Atua: Te mataiti i topa, e 16,760,607 i te ao katoa nei tei tae mai ki te Akamaaraanga. I roto i tetai oire i Riperia, kua tata atu te au taeake i tetai reta ki te tangata maata o te oire, i te akakite kiaia i to ratou akakoroanga kia akono i te Kaikai Anga Aiai a te Atu ki roto i tona oire. Kua oronga mai te tangata maata i te tikaanga no te au taeake kia taangaanga i te ngai tueporo i reira no te akakoroanga e kua maaniia tetai akakiteanga no te reira i roto i taua ngai ra, te pati anga i te tangata kia tae mai. Noatu oki e rima rai au papuritia i roto i taua oire ra, e 636 tei tae mai!
4 Pera katoa rai, ka inangaro tatou i te tauturu i te manganui ua atu ka rauka ia tatou kia kapiti mai kia tatou i te akono anga i te Akamaaraanga. Kore ei e maani i tetai papaanga no te aronga taau e inangaro ra i te pati? Te oronga atura te au akatutuanga i muri ake i te nga kapi o muri i te Awake! o Mati 8 e te Punanga Tiaki o Mati 15 i tetai patianga. Kia taangaanga katoaia te au patianga no te Akamaaraanga. Taipi me kare e tata meitaki i te taime e te ngai o te akamaaraanga ki runga i te pepa, e ka akaruke ei e tai ki te tangata taki tai taau ka pati. Ia Mati 24 e vaitata maira, atoro akaou i te akamaara e i te akapapu ki te au tangata tataki tai i tetai ua atu au akanoonooanga.
5. Akapeea tatou me akamaroiroi i te aronga apiipii Pipiria kia tae mai?
5 Akapeea tatou me tauturu i te aronga apiipii Pipiria kare i aere mai ake ki te au uipaanga kia tae mai e kia puapinga maata atu mei teia akakoroanga? Akapou i tetai au miniti i te apiianga okotai i te akatupu i te arikianga rekareka no te puapinga o te akonoanga. Ka kiteia te apiianga meitaki ki roto i te Punanga Tiaki o Mati 15, 2004, kapi 3-7, e te puka Reasoning, kapi 266-9.
6. Eaa i puapinga ai te ariki atu i etai ke i ko i te Akamaaraanga?
6 Ariki Atu i te Au Manuiri: I ko i te Akamaaraanga, aravei atu i te au manuiri e e ariki atu ia ratou. (Roma 12:13) Akapapa kia noo kapiti ma te aronga taau i pati, e te akapapu e e Pipiria ta ratou e tetai puka imene. Ka inangaro tatou i te aravei atu tikai i tetai ua atu au taeake e te au tuaine maroiroi kore tei tauta kia tae mai. Penei ka riro to tatou manako aroa i te tauturu ia ratou kia taokotai putuputu akaou mai ki te putuputuanga. (Luka 15:3-7) I roto i teia atianga tapu tikai, kia rave katoatoa tatou i ta tatou ka rauka i te akamaroiroi i etai ke kia kapiti mai kia tatou i te oronga anga i te akameitakianga kia Iehova no tona “takinga-meitaki maata.”—Sa. 31:21.