Itae Anga i te Au Tangata e Manganui te ka Rauka Mai
1. Eaa ta te au Kerititiano mua i rave i te itae anga i te au tangata e manganui te ka rauka mai?
1 Kua tauta maroiroi tikai te au pipi mua a Iesu i te akatotoa i te karere Patireia. Kua akono ratou i te au takainga tau kia rauka ua te tuatua meitaki i te au tangata e manganui te ka rauka mai. Kua tata te aronga tata Pipiria i ta ratou au tataanga akauruia i roto i te reo Ereni matauia, ko te reira oki te reo pa enua o te Patireia o Roma. Pera katoa, penei ko te aronga tutu maroiroi o te rua e te toru anere mataiti T.N. e aere atu tei taangaanga mua i te voriumu tataanga, e ngoie ua ake i te taangaangaia i te pokaikai tuatua no te kimianga i te au papaanga.
2, 3. (a) Akapeea a Isaia 60:16 i te akatupuia anga i te au tuatau i teianei? (e) Akapeea te tekinoroti i te taangaanga angaia kia akamaata atu i te akamorianga mou?
2 Taangaanga Anga i te Tekinoroti: Na roto i te peroveta ko Isaia, kua totou a Iehova: “E ngote rai koe i te u o te pa enua ra.” (Isaia 60:16) I te akatupuanga o teia totou i teia tuatau nei, te taangaanga ra te au tavini o Iehova i te au apinga te vai ua ra mei te au pa enua kia akatere i te angaanga tutu anga ki mua. Ei akaraanga, i te 1914, e au mataiti i mua roa ake i puapinga ai te au teata tuatua oriori ra i te pae moni, kua akamata te Aronga Apiipii Pipiria i te akaari i te “Photo-Drama of Creation.” Kua oronga mai teia teata e te akaariari tutu e varu ora te roa, ma te kara e te tangitangi anga, i tetai akakiteanga ririnui tikai ki te au mirioni ua atu.
3 I teia tuatau, te taangaanga ra to te Atua iti tangata i te au matini viviki te nenei anga e te au apinga akaaereia e te komupiuta kia nenei i te au Pipiria e te au puka Pipiria i roto i te au anere ua atu reo. Ko te au ravenga viviki no te apinga akaoro te neke ra i te au puka Pipiria ki te au tuanga mamao o te enua nei, itae anga i te au tangata i roto i te 235 enua. Na roto i tona vaerua, kua akakeu a Iehova i tona au tavini kia tuku i taua tekinoroti kia taangaanga meitakiia, kia rauka uaia te tuatua mou Pipiria ki te au tangata e maata atu i to mua ana i roto i te tuatua enua.
4. Eaa te au tauianga ta tetai i rave i roto i to ratou oraanga kia itae maata atu i te au tangata ma te tuatua meitaki?
4 Au Tauianga Uaorai: Kua akakeu katoaia te aronga akamori mou kia akono i te au tauianga uaorai e rauka ai i te itae maata atu i te au tangata ma te tuatua meitaki. E manganui tei akamama mai i to ratou oraanga e rauka ai i te piri maata atu ki roto i te angaanga tutu anga. Kua neke atu tetai papaki i te tavini i te ngai e maata atu te inangaro no te aronga tutu Patireia. Tetai atu kua akamaata atu i ta ratou angaanga orometua na te apiianga i tetai reo ke.
5, 6. Eaa te ka rauka i te raveia kia itae i te au tangata e manganui te ka rauka mai i roto i te ngai e angaangaia ra?
5 Kapiti katoa atu, ka rauka ia tatou i te itae maata atu i te au tangata ma te tuatua meitaki na te tutu anga i te taime e tei te kainga te au tangata e i te ngai e kiteaia ai te au tangata. Me putuputu ana te taime e kare te tangata i te kainga i tera ra i roto i te ngai e angaanga ra koe, ka rauka ainei ia koe i te taui i taau papaanga kia tutu aere i te au ora aiai? E au ngai papuriki ainei tetai e ka rauka ai i te oronga atu i tetai akakite anga? Kua tamata ake ana ainei koe i te akakitekiteanga terepaoni e na te angaanga anga i roto i te au ngai pitiniti? E akara ana ainei koe i te au atianga kia akakitekite ua atu?
6 Mei teaa tikai te akameitakianga kia tatou i te piri atu anga ki roto i te akakiteanga maata te orongaia ra no runga i to Iehova ingoa e te Patireia! Kia rave ua atu rai tatou i te oronga atu anga i te tuatua mou te oronga maira te ora mei ta te Atua Tuatua ki te au tangata e manganui te ka rauka mai.—Mata. 28:19, 20.