“No te Evangelia i Peraʼi”
1. Eaa ta te tangata tutu aere i te Patireia ka rave puareinga ua no tetai ke, e no teaa ra?
1 Kua manako te apotetoro ko Paulo e e apainga nana uaorai i te tutu aere i te tuatua meitaki ki tetai ke. (1 Kori. 9:16, 19, 23) Pera katoa, i to tatou manako anga i te oraanga mutu kore o te tangata, te akakeu ra ia tatou kia tauta pakari i te akakite atu i te tuatua meitaki kia ratou.
2. Me te tutu aere ra, eaa te au akatanotano anga ka rave puareinga ua tatou, e no teaa ra?
2 Tutu Anga i te Ngai e te Taime e Kitea ai te Tangata: Kare te ravakai meitaki e titiri ana i tana matau me kore kupenga ki te ngai e te taime e tau ra kiaia, inara ki te ngai e te taime e kitea papuia ra te ika. Mei ia tatou rai, ei “ravakai tangata,” penei ka anoanoia tetai akatanotano anga na tatou uaorai kia kitea te tangata i roto i ta tatou ngai tutuanga e kia mataora pu tikai i te angaanga puapinga i te akaputuputu mai i te “ika e manganui te tu.” (Mata. 4:19; 13:47) Ka rauka ainei ia tatou i te taangaanga i te au ora aiai avatea i te atoro i te au tangata i ko i to ratou au kainga, me kore i te au ora popongi roa i te akakitekite aere i runga i te mataara? To Paulo akakoroanga koia oki, kia ‘akakite ua atu i te evangelia,’ e kua taangaanga aia i te au atianga tau i te rave i te reira.—Anga. 17:17; 20:20, 24.
3, 4. Ia tatou e rave ra i te angaanga orometua, eaa te au mataara ka akatanotano tatou, e eaa te au tupuanga?
3 Akatano i Taau Tuatua kia Tau ki Tei Anoanoia: E taui putuputu ana te au ravakai i ta ratou au ravenga kia mou mai tetai tu ika. Akapeea tatou i te oronga anga i te tuatua meitaki o te Patireia na roto i tetai tu kia inangaroia mai e te tangata i roto i ta tatou ngai tutuanga? E akakite maru tatou i te tumu manako e manakoia ra e te maataanga o te tangata, e oti e akarongo meitaki ki ta ratou au tuatua no runga i te reira. (Iako. 1:19) Penei ka ui tatou e, eaa to ratou manako e kia akakite mai ratou i te reira. (Mase. 20:5) Na roto i teia mataara, ka rauka ia tatou i te akatano i ta tatou tuatuaanga i te tuatua meitaki na tetai ravenga te akakeu ra i to ratou uaorai oraanga. Kua akaarite a Paulo iaia uaorai ei “au mea katoa i te tangata ravarai.” (1 Kori. 9:22) Ko te akatano ngoie ua anga, ko te taviri ia i te itae i te ngakau o te tangata.
4 E mataora tikai i te akakite ki te tangata “i te tuatua meitaki o tetai mea meitaki atu”! (Isa. 52:7, NW) “No te evangelia i peraʼi” tatou, kia itae i te maataanga o te tangata.—1 Kori. 9:23.