Taangaanga Meitaki i Toou Taime
1 To tatou inangaro kia akamareka ia Iehova te akakeu ra ia tatou kia akamou i to tatou au oraanga i runga i te au angaanga pae vaerua. Te ikuiku maira tana Tuatua ia tatou kia ‘na mua ra i te kimi i te basileia’ e ‘kia akapapu i te au mea puapinga rava atu.’ (Mata. 6:33; Philipi 1:10) Akapeea tatou e taporoporo marie ei i te taime no te au inangaro Patireia e kia akono i te au angaanga puapinga kore mai ki to ratou ngai?—Ephe. 5:15-17.
2 Tuku na Mua i te Au Angaanga Patireia: Akapapa i toou taime kia kore te reira e kaimoumouia i runga i te au apinga umuumu koreia. E akamata ana tetai pae na te akapapaanga i te au taime tikai i runga i ta ratou karena no te angaanga orometua. Te matakite ra ratou i reira kia kore tetai au apinga ke e tamanamanata i taua au parani. Ka rauka katoa te reira i te raveia kia taporoporo marie i te taime no te au uipaanga, apiianga uaorai, e te au uruoaanga. E akapapaanga ta te manganui no te ra tataki tai te akamata ra me kore te akamutu ra ma te tatauanga i te Pipiria. E akanoo i tetai taime tikai no te angaanga puapinga tataki tai, e auraka e tuku i tetai au apinga inangaro koreia i te tamanamanata mai.—Kohe. 3:1; 1 Kori. 14:40.
3 Kotinga i te Taangaanga i te Ao Nei: I tetai au enua, te au tamataoraanga, tarekarekaanga, akaangaroianga, te au angaanga rekaia, e tetai atu au aruaruanga e rauka ngoie uaia ana. E manganui tei akapou maata roa i te taime i te akarakara tivi me kore i te taangaanga anga i te au komupiuta. Inara, te akapou taime ua anga ma te au angaanga kangakanga e te au apinga ou ta teianei ao e oronga maira kare e ekokoanga ka taki atu ki te reka kore. (1 Ioane 2:15-17) No reira, te raurau maira te au Tuatua Tapu ia tatou e auraka e taangaanga pu ua i te ao. (1 Kori. 7:31) Na te akonoanga i te akoanga pakari, ka rauka ia koe i te akaari kia Iehova e te akamou ra tana akamorianga i te ngai mua i roto i toou oraanga.—Mata. 6:19-21.
4 Te tuatau toe no teia akatereanga o te au mea nei te vaitata atura i te pou. Te aronga tei tuku mua i te au inangaro Patireia ka mataoraia e ka rauka i to te Atua akaperepereanga. (Maseli 8:32-35; Ia. 1:25) Kia tauta tatou, i reira, i te taangaanga meitaki i teia tumuanga puapinga, to tatou taime.