Tatanu i te Au Tu Meitaki, Kokoti i te Au Akameitakianga Maata
1. Eaa i puapinga ai kia akara meitaki i taau akonoanga matauia i te pae vaerua?
1 I toou riro mai anga ei Kerititiano, kua tauta pakari ana paa koe i te akatupu i tetai akonoanga matauia i te pae vaerua tei kapiti mai i te apiianga Pipiria, te au uipaanga Kerititiano, te angaanga orometua e te pure. No ta Iehova akameitakianga i taau au tautaanga, kua tupu koe i te pae vaerua. Penei i teianei kua pou tetai au mataiti mei toou papetito angaia mai. Te tamou marie ra ainei koe i te au tu pae vaerua meitaki taau i akatupu ia koe e riro maira ei Kerititiano?
2. Akapeea tatou i te puapinga angaia mei te tatau anga Pipiria i te au ra ravarai?
2 Akara Meitaki i Taau Akonoanga Matauia: E tu matau ainei noou te tatau i tetai tuanga o te Tuatua a te Atua i te au ra? Kare e aiteia te au akameitakianga maata ta tatou ka kokoti me akapera! (Iosua 1:8; Sa. 1:2, 3) Te tuatau ia Iseraela taito, ka tatau te ariki tataki tai i tana kopi o te Ture “e ope ua atu tona au rā i te ora anga nei.” Eaa te au puapinga? Ka akatupu aia i te ngakau akaaka e ka kite i te mataku ia Iehova kia kore e ariu ke mei Tana au akauenga. (Deu. 17:18-20) Teia tuatau katoa, ka tauturu te tatau anga Pipiria i te au ra ravarai ia tatou kia vai apa kore e te kino kore i roto i teia ao viivii, e te kino. Ka tauturu katoa te reira ia tatou kia tau meitaki tikai no te angaanga orometua.—Philipi 2:15; 2 Timo. 3:17.
3. Eaa te au akameitakianga ta tatou ka kokoti no te tae putuputu anga ki te au uipaanga?
3 E peu matau na Iesu i te aere ki te tunako, te ngai e uriuriia ana te au Tuatua Tapu. (Luka 4:16) Kare e ekoko kua akaketaketa teia iaia i te aro atu anga i te au tu ngata tana ka taii atu. Ka akaketaketa katoaia tatou e te au ikuikuanga pae vaerua e orongaia maira i ko i te au uipaanga putuputuanga pera te “akamaroiroianga” tau. (Roma 1:12, NW) Ka riro te uipa kapiti anga ma to tatou au taeake ei tauturu ia tatou kia akakoromaki i te au tu ngata i teia au tuatau openga. (Ebera 10:24, 25) E peu matau ainei naau kia tae ki te au uipaanga katoatoa?
4. Akapeea te piri anga ki roto i te angaanga orometua i te au epetoma i te akapuapinga anga ia tatou?
4 Te akakite maira te rekoti akauruia kia tatou e kua piri ana te au apotetoro ki te akakitekite aere anga i te tuatua meitaki “i te au ra ravarai i roto i te iero e mei tera are ki tera are.” (Anga. 5:42, NW) Noatu kare tatou e tutu aere ana i te au ra ravarai, ka rauka ainei ia tatou i te akariro ei tu matau i te piri atu ki roto i tetai au tuanga o te angaanga orometua i te au epetoma? Me akapera, papu e ka tukatau roa atu tatou i te taangaanga i te Tuatua a te Atua, e ka mataora tatou i te au tu akamaroiroi i te akakite aere anga i te tuatua mou o te Pipiria ki etai ke.
5. Eaa ra i puapinga maata ai te pure putuputu kia Iehova?
5 Kua akameitaki maataia te peroveta ko Daniela no te tavini anga ia Iehova ma te “tamou ra” i tona oraanga katoa. Te kapiti maira teia i te tu matau o te pure putuputu anga kia Iehova. (Dani. 6:10, 16, 20) Mei te reira rai, ia tatou e uri putuputu ra kia Iehova na roto i te pure ngakau tae, ka akameitaki mai aia ia tatou ki tona vaerua tapu. (Luka 11:9-13) Pera katoa, ka ariu mai a Iehova na te akapiri vaitata mai anga kia tatou, te akatika anga kia rekareka tatou i tetai pirianga vaitata tikai kiaia. (Sa. 25:14; Ia. 4:8) E akameitakianga maata tikai! No reira, kia angaanga maroiroi ua atu rai tatou, i te tamou marie anga i to tatou au tu meitaki i te pae vaerua e te kokoti anga i te au akameitakianga maata no ko mai ia Iehova.