Auraka e Akangaropoina i te Aronga Tei Paruparu
1. Eaa tatou ka tauta atu ei i te akamaroiroi i te aronga tei paruparu?
1 Kua kite ainei koe i tetai tangata tei paruparu i te pae vaerua? Penei kare aia e piri akaou mai ana ki te putuputuanga e kua aere ke atu aia. Penei kua aravei ana koe i te reira tangata ia koe e piri atura ki roto i te angaanga orometua mei tera are ki tera are. Kia akamaara tatou e e taeake rai te reira tangata no tatou i te pae vaerua. Ka inangaro tatou i te akapapu i to tatou inangaro nona e i te tauturu iaia kia oki mai ki te putuputuanga e ki ‘te tiaki e te akaaere o to tatou au meta.’—1 Pe. 2:25, NW.
2. Akapeea tatou i te oronga anga i te akamaroiroianga ki tetai tangata tei paruparu?
2 Akaari i te Inangaro: Penei ka rauka tetai ringi anga me kore aravei anga poto ua, i te akapapu ki te reira tangata tei paruparu e kare tatou i akangaropoina iaia. Eaa ta tatou ka tuatua? Penei ka akamaroiroi tatou na te akakite ua anga ki te tangata e te akamanako ra tatou iaia. Kia akamou maoraora ua te pukapukaanga e kia akamaroiroi. (Philipi 4:8) Penei ka rauka ia tatou i te taiku atu i tetai manako ta tatou i rekareka mai mei tetai uipaanga ua akenei. Ka rauka katoa ia tatou i te pati atu iaia ki tetai uipaanga me kore ki tetai akaputuputuanga e tu mai nei e e oronga i te tapao i tetai ngai nona me kore i tetai mataara nona.
3. Akapeea tetai tuaine i te akamaroiroi akaouia anga?
3 Kua araveiia tetai tuaine paruparu no tetai 20 mataiti e tere atu i roto i te ngai tutu anga. Noatu e kare aia i inangaro ana i te ariki mai i tetai apii Pipiria, kua oki atu te tuaine tei aravei iaia, e kua akaruke atu i te au makatini ou. I muri ake i te uruoaanga tapere, kua akakite atu te papuritia i tetai au manako maata no te uruoaanga ki te tuaine paruparu, e i te openga iora kua akamaroiroi akaouia aia.
4. Akapeea tatou i te akonoanga i tetai tangata tei akamata akaou i tona akapirianga na te aere mai anga ki te au uipaanga?
4 Me Oki Akaou Mai Tetai Tangata: I te akamataanga tetai taeake paruparu i te oki akaou mai ki te au uipaanga, akapeea tatou i te akonoanga iaia? I na, akapeea a Iesu i te akonoanga i tana au pipi i muri ake i to ratou akarukeanga iaia no tetai tuatau poto ua? Kua taiku pumaana atu aia ia ratou ei “au taeake” nona e kua akaari i te irinaki i roto ia ratou. Kua oronga katoa aia i tetai angaanga puapinga maata na ratou. (Mata. 28:10, 18, 19) I muri poto ua akera, te angaanga maroiroi ra ratou i te akakitekite i te tuatua meitaki “ma te kore e akamutu.”—Anga. 5:42, NW.
5. E taiku mai i nga turanga ka tau tatou kia akakite atu ki te aronga pakari no runga i tetai tangata tei paruparu.
5 I mua ake ka oronga ai koe i te apii atu i te Pipiria ki tetai tangata paruparu me kore i mua ake ka pati atu ei koe i tetai taeake tei paruparu no tetai tuatau roa kia aru mai ia tatou i roto i te angaanga orometua, kia kimi tatou i te aratakianga mei te aronga pakari. Me aravei tatou i tetai papuritia paruparu i roto i te angaanga tutu anga, kia akakite atu tatou ki te aronga pakari kia rauka ia ratou i te oronga i te tauturu tei anoanoia.
6. Eaa te rekareka ta tatou ka kite mai mei te tauturuanga i te aronga tei paruparu?
6 Mei ta te Pipiria rai e akataka meitaki maira, ko te aronga ua tei oro i te oroanga ki te openga ra ka ora ia. (Mata. 24:13) No reira, e akamanako i te aronga tei akaturori keia me kore tei aere ke atu. Me akatutu marie tatou i to Iehova aroa na te akaarianga i te inangaro ngakau tae i roto i te reira au tangata ra, penei ka kite mai tatou i te rekareka i te kite anga ia ratou i te akamata akaouanga i ta ratou tavinianga tapu i te pae ia tatou.—Luka 15:4-10.