Akapeea me Tauturu i Tei Tae Mai ki te Akamaaraanga?
1. Eaa tetai akakiteanga maata rava ka orongaia ia Mati 22, 2008?
1 Ia Mati 22, 2008, ka rauka i te au mirioni ua atu tangata tetai akakiteanga maata rava takapini i te ao katoa. Ka akarongo te aronga ka tae atu ki te Akamaaraanga no runga i to Iehova aroa maata i te oronga mai anga i te oko no te au tangata ravarai. (Ioa. 3:16) Ka kite mai ratou no te Patireia e akapeea a Iehova i te taangaanga i te reira kia akatupu i tona anoano no te enua katoatoa. (Mata. 6:9, 10) Ka kite tikai ratou i te aroa e te taokotaianga o te iti tangata o te Atua e ka kite mai i to tatou tu akamanuiri pumaana.—Sala. 133:1.
2. Akapeea tatou i te tauturu anga i te aronga apii Pipiria tei tae mai?
2 Aronga Apii Pipiria: Tetai pae tei tae mai ko te aronga ia koi akamata ua akenei i te apii i te Pipiria e tatou. E akaaravei atu ia ratou ki te au taeake e te au tuaine. E akakite i te au uipaanga i te au epetoma, e e oronga i tetai tutaka poto ua kia ratou o te Are Uipaanga Patireia. I te taime o te akoanga, ka akamaroiroi te vaa tuatua i te reira aronga kia tere ua atu rai ki mua i te pae vaerua. Ka rauka ia koe i te taiku i tana au tuatua ei tumuanga i te akamaroiroi i taau aronga apii.
3. Eaa te ka raveia kia akamaroiroi i te au papuritia paruparu tei tae mai?
3 Paruparu: Tetai aronga ka tae mai ko te au papuritia paruparu. E tauta i te aravei pumaana atu ia ratou. E kopae i te au uianga uaorai me kore i te tuatua anga i tetai apinga te ka akatupu i te akama. I muri poto ua mai i te Akamaraanga, kia atoro te aronga pakari i tetai ua atu aronga paruparu tei tae mai, kia akameitaki ia ratou i ta ratou au tautaanga kia tae mai, e kia pati pumaana atu ia ratou ki te uipaanga putuputuanga ka aru mai.
4. Akapeea tatou tataki tai i te tauturu anga i te au manuiri?
4 Au Manuiri: Tetai o te aronga tei tae mai, penei e au taeake me kore e au mema pamiri ta tatou i pati tikai atu. Penei tetai atu kua tu i tetai patianga i te tuatau o te kamupeini takake. Me kite atu koe i te au tangata e kare koe i matau, e aere ua atu e akaaravei ia koe kia ratou e e turou atu ia ratou. Penei kare ratou i aere mai ake ki tetai o ta tatou au uipaanga. I roto i taau pukapukaanga penei ka kite koe e akapeea i te aravei akaou atu ia ratou. Na tetai atoroanga uaorai me kore tetai ringi anga poto i nga mea ra i muri ake i te Akamaaraanga, ka rauka ia koe i te tatanu akaou atu i te inangaro e kia oronga i tetai apii Pipiria.
5. Eaa ta tatou ka tuatua kia akamata i tetai apii Pipiria?
5 Te akakiteanga i roto i te akoanga Akamaaraanga, ka rauka i te taangaangaia ei tumuanga kia akaari atu i te puka ta te Pipiria e Apii Maira ki tetai atoro akaouanga. Ei akaraanga, ka tatau te vaa tuatua no te Akamaaraanga ia Isaia 65:21-23. I te atoro akaouanga, penei ka taiku koe i te akoanga e ka karanga atu e, “Ka akaari atu au i tetai au akameitakianga akaou tei raukaia e te oko.” E oti e akamanako i te kapi 4-5 o te puka ta te Pipiria e Apii Maira. Me kore penei ka karanga koe e, “E manganui te manako ana e aea tatou e kite mai ei i te akatupuanga o te totou a Isaia.” E oti e akamanako i te parakarapa 1-3 i te pene 9. Tetai tuatuaanga koia oki kia taiku ua ki te au tuatua a te vaa tuatua o te Akamaraanga e e akaari atu i te puka ta te Pipiria e Apii Maira, e e akatutu i te apii.
6. Eaa te au atianga ta tatou ka kite mai me akarongo tatou ki ta Iesu akaueanga kia akamaara i tona mateanga?
6 Kia kite mai tatou tataki tai i te au atianga kia tauturu i te aronga apii Pipiria, te au papuritia paruparu, e te au manuiri te ka tae mai. (Luka 22:19) Papu e ka akameitaki a Iehova i tetai ua atu angaanga maata i roto i ta tatou tavinianga Patireia.