“E Akapera Kotou ei Manako Anga Iaku”
Kia Akamaaraia to Iesu Mate Anga a te Aperira 2
1. Eaa ra a Aperira 2, 2007, ei ra puapinga maata ei?
1 A te Aperira 2, 2007, ka akaputu mai te au mirioni ua atu tangata takapini i te ao katoa, i te akamaara i to Iesu mate akaatinga. Kua mate a Iesu ei tangata turuturu no te turanga ngateitei o tona Metua i te rangi, i te oronga anga i te akapapuanga e kua akaapa pikikaa a Satani te Tiaporo e ka tavini ua te au tangata ravarai i te Atua no te au akakoroanga noinoi. (Iobu 2:1-5) E akamaara katoa mai ana te Kaikai Anga Aiai a te Atu ia tatou e na roto i tona mate ei tangata apa kore, e te ara kore, kua “oronga [a Iesu] i tona ora ei oko no te tangata e manganui.” (Mata. 20:28) No reira, kua akaue a Iesu i tana au pipi e: “E akapera kotou ei manako anga iaku.” (Luka 22:19) Kua akakeu ainei te arikianga no teia apinga aroa akaperepere maata a te Atua ia koe kia akamata i te au akapapaanga kia akamaara i teia angaanga puapinga maata rava no te aroa?—Ioane 3:16.
2. Akapeea tatou i te akonokonoanga i to tatou ngakau no te Akamaaraanga?
2 Akonokono i Toou Ngakau: Na te akamanakoanga i tei tupu i te au ra openga tataki tai o to Iesu oraanga tangata, ka rauka ia tatou i te akonokono i to tatou ngakau no teia akonoanga no te Akamaaraanga. (Ezera 7:10) I te tauturu ia tatou no runga i teia, ka kiteaia tetai papaanga o te tatauanga Pipiria takake i roto i te Examining the Scriptures—2007 e i runga i te 2007 Calendar. Te aru vaitata ra teia papaanga ki te au ra i tupu ei te au tupuanga no runga i to Iesu mate anga kia tau ki ta tatou karena e taangaanga ra i teia tuatau. Te au ra e te au tuatau te taikuia ra i roto i te au tataanga Pipiria, kua akatumuia ki runga i te karena ngati Iuda, i te tare anga i te au ra mei te opunga ra ki tetai opunga ra. Kua akamanakoia teia tareanga tuke e kua akatutuia mai i roto i te papaanga tatauanga Pipiria no te Akamaaraanga. Te uriuri anga i te reira akakiteanga e te akamanako oonuanga na roto i te pure i te oonu o to te Atua aroa, ka tauturu ia tatou kia puapinga maataia mei te akonoanga i te Akamaaraanga.
3. Akapeea tatou i te tauturuanga i te aronga inangaro e te aronga tei paruparu i te pae vaerua kia puapingaia mei te Akamaaraanga?
3 E Pati Atu i Tetai kia Aere Mai: Kua akakite mai te kapi i roto ake i Ta Tatou Angaanga Patireia o Peperuare i tetai akakiteanga takake kia pati atu i te au tangata ki teia tupuanga puapinga maata. Kua rave ainei koe i te au akanoonooanga kia piri maata atu ki roto i teia angaanga? Kua tata ainei koe i tetai papaanga o te au taeake taau ka pati atu, e kua akamata ake ainei koe i te aravei atu ia ratou? E akono i te au parani kia tae vave atu i te aiai o te Akamaaraanga no te turou mai anga i te aronga taau i pati atu e pera katoa i tetai atu aronga tei inangaro. Penei ka inangaro koe i te noo i te pae ia ratou, i te akapapuanga e e Pipiria e e puka imene ta ratou. E akaaravei atu ia ratou ki tetai ke i roto i te putuputuanga. I muri ake i te porokaramu e tauta i te pau atu i ta ratou au uianga. E pati atu ia ratou kia aere mai ki te tuatua papuriki takake te ka orongaia i roto ia Aperira 15. Kia akapapu katoa te aronga pakari tikai e te aronga tei kapiti mai ana ki te putuputuanga inara kua paruparu i te pae vaerua kia patiia atu ratou ki te Akamaaraanga e te tuatua takake.
4. Akapeea tatou i te tauturuanga i te au tangata kia tere tamou ua atu rai ki mua i te pae vaerua i muri ake i te akonoanga i te Akamaaraanga?
4 Tauturu i te Aronga Ou e te Aronga Paruparu kia Tere ki Mua: Ka akamarama poto ua te vaa tuatua no te Akamaaraanga i ta tatou akanooanga no te apii Pipiria e ka akamaroiroi i te aronga ou kia apii ua atu rai no runga ia Iehova. Ka rauka ia koe i te taangaanga i tana au pauanga ei tumuanga no te oronga anga i te tauturu pae vaerua ki te aronga taau i pati atu. Me kare ratou e apii ra i te Pipiria, e akapapu kia atoro viviki atu ia ratou i muri poto ua mai i te Akamaaraanga e e akatutu atu i te akanoonooanga no te apii Pipiria kare e tutaki. Kia rauka i te tere meitaki ki mua i te pae vaerua, ka inangaro katoaia ratou kia aere atu ki te au uipaanga putuputuanga. (Ebera 10:24, 25) I te akamanakoanga i teia, e akamaroiroi ia ratou kia akamata i te aere putuputu mai. Ka inangaro te aronga pakari i te atoro i te au Kerititiano paruparu tei aere mai ki te Akamaaraanga e kia akamaroiroi atu i te au manako tei orongaia mai i roto i te akoanga. Penei ka akamaroiroi teia ia ratou kia akamata akaou i ta ratou angaanga i roto i te putuputuanga.
5. Akapeea tatou e puapingaia ai no te akonoanga i te Akamaaraanga?
5 Te oronga maira te akonoanga Akamaaraanga i tetai atianga kia akamanako meitaki tikai i ta Iehova e ta Iesu i rave no tatou. Ka akaoonu te reira akamanako oonu anga i to tatou aroa no raua e te akakeu ra i to tatou tu. (2 Kori. 5:14, 15; 1 Ioane 4:11) Ko te taime teia i te akamata i te akapapa ia tatou uaorai e te aronga inangaro no teia atianga puapinga maata e te “akakite [nei tatou] i te matenga o te Atu.”—1 Kori. 11:26.