“E Ao to te Tangata e Akakoromaki i te Timataanga”
1 Ka aro atu te au Kerititiano pouroa i te au timataanga. (2 Timo. 3:12) Penei e aere mai ana te au timataanga na roto i te maki, te akaaoanga i te pae moni, te akavareanga, te takinokino anga me kore na roto i tetai atu au tu e manganui. Te au timataanga tei maroia mai e Satani, kua maaniia kia akamarie ia tatou, e kia akakeu ia tatou kia kopae i ta tatou angaanga orometua Kerititiano me kore kia tapu ia tatou mei te tavinianga i te Atua. (Iobu 1:9-11) Akapeea te akakoromakianga i teia au timataanga i te taki atu anga ki te mataora?—2 Pe. 2:9.
2 Akateateamamao no te Au Timataanga: Kua oronga mai a Iehova i tana Tuatua mou, kapiti mai te rekoti o te oraanga e te au apiianga a Iesu. Na te akarongo anga ki te au tuatua a Iesu e te rave anga i te reira, te akanoo ra tatou i tetai tango ketaketa e te akateateamamao atura no te kino. (Luka 6:47-49) E rauka katoa ana to tatou maroiroi mei tetai atu au akanoonooanga—to tatou au taeake Kerititiano, au uipaanga putuputuanga, e te au puka tei akatumuia ki runga i te Pipiria mei te pupu tavini akono meitaki e te pakari. E taangaanga putuputu ana tatou i ta te Atua apinga aroa no te pure.—Mata. 6:13.
3 Kua oronga katoa mai a Iehova kia tatou tetai manakonakoanga. Me patu tatou i te akarongo ketaketa i roto i ta Iehova au taputou ka riro to tatou manakonakoanga ei “tutau no te vaerua, e mea mauti kore e te mou meitaki.” (Ebera 6:19) I te au tuatau Pipiria, kare te au pai e akaruke ana i te uapu ma te kore e tutau, noatu me te meitaki ua ra te reva. Me tupu poitirere mai ana tetai uriia, i te tukuanga i te tutau, te tapu ra i te pai kia kore e puia atu ki te ngai tokatoka i te pae tai. Mei te reira katoa, i te patu anga i teianei i te akarongo i roto i ta te Atua au taputou, ka akatinamou te reira ia tatou me tupu mai ana te au manamanata. E tupu poitirere ua mai ana te au akaaoanga. Noatu e kua arikiia te angaanga tutu anga a Paulo raua ko Banaba i te akamataanga, kua viviki te turanga i te taui i te tae anga mai te aronga ngati Iuda patoi.—Anga. 14:8-19.
4 Apai Mai te Akakoromaki i te Mataora: Kia vai ngaueue kore ua i roto i te angaanga orometua noatu te patoianga, te oronga maira kia tatou i te manako au. E rekareka ana tatou me akamanako meitakiia mai tatou no tei akangateitei koreia no Karaiti. (Anga. 5:40, 41) I te akakoromakianga i te au timataanga, te tauturu ra ia tatou kia akatupu tikai i te au tu akaaka, te akarongo, e te akakoromaki. (Deu. 8:16; Ebera 5:8; Ia. 1:2, 3) Te apii ra te reira ia tatou kia akamanako ki runga ia Iehova, kia irinaki i roto i tana au taputou, e kia kimi i te akapuanga i roto iaia.—Maseli 18:10.
5 Kua kite oki tatou e e tuatau poto ua to te au timataanga. (2 Kori. 4:17, 18) E oronga mai ana te au timataanga kia tatou i te au atianga kia akaari i to tatou inangaro maata no Iehova. Na te akakoromakianga i te reira, te oronga ra tatou i tetai pauanga ki te au akaapaanga a Satani. No reira, auraka tatou e tuku i te au! “E ao to te tangata e akakoromaki i te timataanga: kua akatika anakeia mai aia ra, e rauka ïa iaia te korona ora.”—Ia. 1:12.