Kua Akatereia Atu te Tuatau no te Akameitaki ia Iehova
1. Eaa te akanooanga ou te ka tauturu ia tatou kia “akameitaki maata ia Iehova”?
1 Teia Mati i topa akenei, kua akamataia tetai akanooanga ou, kia rauka i te au papuritia i te painia tauturu e 30 ora i roto ia Mati e Aperira, e i te marama ka atoro mai te akaaere kotinga mei tei matauia. Me ka pou iaia e rua marama ki konei i te putuputuanga, ka rauka i te au papuritia tei inangaro i te 30 ora, kia iki i tetai o teia nga marama kia painia tauturu. Ka rauka i te au painia kia piri ki te katoaanga o te uipaanga tana e rave ana na te au painia tamou e te au painia takake. Me kare e taeria e tatou te 50 ora, ka rauka rai ia tatou i te ‘akameitaki ia Iehova’ ei au painia tauturu e 30 ora, e a taime i te mataiti!—Sala. 109:30; 119:171.
2. Eaa te mataora maata ka rauka i te aronga ka painia tauturu i te taime ka atoro mai te akaaere kotinga?
2 Taime Atoro Mai a te Akaaere Kotinga: Teianei e maata atu te ka rauka kia painia tauturu i te taime ka atoro mai te akaaere kotinga, e kia mataora i te akamaroiroianga ka rauka mai me angaanga kapiti kiaia i roto i te angaanga orometua. (Roma 1:11, 12) Kare e kore e maata te au painia tauturu te ka akataka i tetai ra i roto i te epetoma kia angaanga kapiti e ia. Te aronga e angaanga moni ana i te au ra o te epetoma, ka rauka ia ratou te pati me ka tika iaia kia angaanga kapiti e ratou i te Maanakai me kore i te Tapati. Tetai, e akamaroiroianga maata tikai no te au painia tauturu kia tae ki te uipaanga a te au painia tamou e te au painia takake!
3. No teaa ra te tuatau o te Akamaaraanga i riro ei ei taime meitaki i te painia tauturu?
3 Marama o Mati e Aperira: Te aronga tei piri ana ki te akanooanga mua no te painia tauturu e 30 ora, e tai marama i te tuatau o te Akamaaraanga, ka rauka ia ratou i teianei i te akamaata atu i ta ratou ‘atinga akameitaki i te Atua’! (Ebe. 13:15) E nga marama meitaki tikai a Mati e Aperira i te akamaata atu i to tatou taime i roto i te angaanga orometua, i te painia tauturu. I te au mataiti ravarai, me tae ki taua au marama ra, e mataora ana tatou i te piri ki roto i te kamupeini i te pati i te tangata kia tae mai ki te Akamaaraanga. Tetai, no te mea e maata te akamaata atu ana i to ratou taime i roto i te angaanga orometua i te tuatau o te Akamaaraanga, ka rauka ia tatou kia angaanga kapiti e te au papuritia tukeke. Muri ake i te Akamaaraanga, ka oki akaou tatou ka atoro i te aronga tei ariki mai i te karere, i te akamaroiroi ia ratou kia tae mai ki te akoanga takake na te katoatoa. Ka akakeu ainei toou ngakau ia koe kia taangaanga i teia au atinga i te painia tauturu?—Luka 6:45.