Oronga te Manakonakoanga ki te Putaua
1 Kua akaari a Iesu i te inangaro maata i roto i te aronga putaua. I tetai au tuatau, kua oronga temeio aia i te tauturu materia e kua akaora i te aronga maki, inara tona manako maata tei runga i te akakiteanga i te “evangelia” ki te putaua. (Mata. 11:5) Te puapinga ua atu nei rai te angaanga orometua Kerititiano ki te putaua e pera katoa i etai ke.—Mata. 24:14; 28:19, 20.
2 Manakonakoanga Tikai: E taputou putuputu ana te au orometua o Kerititome ki te putaua e ka puapinga atu ratou me oronga maata ratou ki te ekaretia. Inara, te apii maira te Pipiria e ko te Patireia anake ua o te Atua te ka akakore i te tu putaua e te ka akatikatika i te au manamanata pouroa o te au tangata ravarai. (Sala. 9:18; 145:16; Isa. 65:21-23) Na te akaarianga ki te putaua i ta te Pipiria tikai e apii maira, te oronga ra tatou i te manakonakoanga e te tauturu ra ia ratou kia akamerengo i to ratou anoano pae vaerua.—Mata. 5:3.
3 Kua mata piko te au Pharisea i to Iesu tuatau i te putaua, i te kapiki avirianga ia ratou e ‘am-ha·’aʹrets, me kore “au tangata o te enua.” Inara, kua akamanako a Iesu i “to ratou toto,” me kore to ratou oraanga, ei “mea puapinga maata.” (Sala. 72:13, 14, NW) Ka rauka ia tatou i te aru ia Iesu e kia “takinga-meitaki” i te aronga putaua na te tu akono meitaki e te tu tangi aroa. (Mase. 14:31) Auraka rava tatou e tuatua akakino atu i te au tangata e noo ra i roto i te au ngai putaua me kore e akaari i te akavaavaa i te tutu atu kia ratou. Te manganui e ariu maira ki te karere Patireia, e aronga putaua.
4 Tauturu i Teianei: I to tatou apiianga i te au kaveinga Pipiria ki te aronga putaua i roto i te ngai tutuanga, te tauturu katoa ra ia ratou i teianei kia akaiti mai i te au tupuanga no te tu putaua. Ei akaraanga, te akaapa ra te Pipiria i te kona kava, te pere moni, te kope, te kai avaava, e tetai atu au angaanga te taki atura ki te putaua. (Mase. 6:10, 11; 23:21; 2 Kori. 7:1; Ephe. 5:5) E akamaroiroi ana te au Tuatua Tapu i te tu tika e kia angaanga ma te “ngakau katoa,” ko te au tu e umuumuia ra i roto i te aronga angaanga. (Kolo. 3:22, 23; Ebe. 13:18) Ko te tikaanga, i roto i tetai akakiteanga, kua manako maata te maataanga o te au pu i te tu tika e te tiratiratu ei au tu inangaro rava atuia i roto i te aronga e inangaro ra ratou kia angaanga na ratou.
5 Te kite ua maira a Iehova i te au mamaeanga o te putaua. Kare e roaia ka akaora a Iesu Karaiti i te ‘putaua ra e kapiki maira.’ (Sala. 72:12) E tae ua mai i te reira taime, tei ia tatou te tikaanga ngateitei i te akapumaana i etai ke, kapiti mai te putaua, ma te karere pumaana a te Pipiria.