Akamaroiroi Anga i Tetai e Tetai i Roto i te Angaanga Orometua

¹ E rekareka ana tatou pouroa me rauka te ‘tuatua akamaroiroi me tuatuaia i te tuatau tau tikai.’ (Mase. 25:11) Me angaanga kapiti tatou ki etai ke i roto i te angaanga orometua, akapeea tatou i te akapapu e te akatupu ra ta tatou pukapukaanga i te akamaroiroianga?

² Pukapukaanga Akamaroiroi: Mei teaa atura te akamaroiroi anga me kapiti mai te au mea pae vaerua i roto i ta tatou pukapukaanga ia tatou e piri atura ki roto i te angaanga tutu anga! (Sala. 37:30) Ka rauka ia tatou i te tuatua no runga i ta tatou oronga anga me kore akakite anga i te au tupuanga rekareka ta tatou i kite mai i roto i te ngai tutu anga. (Anga. 15:3) E manako umere ainei ta tatou i rauka mai mei ta tatou tatauanga uaorai o te Pipiria, te au makatini ou, me kore tetai uipaanga putuputuanga? Penei ka uriuri tatou i tetai au manako tei orongaia i roto i tetai akoanga papuriki ta tatou i rongo ua akenei i ko i te Are Uipaanga Patireia.

³ Penei ka taitaia tatou me patoi mai tetai tangata ngutuare e kare i rauka ia tatou te autu anga. E mea puapinga no tatou kia akono i nga mea miniti i muri ake i te akarukeanga i te ngutupa, kia uriuri ki to taua taeake e akapeea me akono i te reira turanga no te tuatau ki mua, penei na te akara anga i te puka Reasoning. E me e apinga tetai ta tatou i reka mai no runga i te oronga anga a to tatou taeake, ka rauka ia tatou i te akamaroiroi atu iaia na te oronga anga i te akameitakianga ngakau tae.

⁴ E Rave Ua: E aronga ainei tetai i roto i to tatou pupu apii puka e kare tatou i angaanga kapiti ua akenei kia ratou? Na te patianga i tetai tangata kia aru mai ia tatou i roto i te angaanga orometua, penei ka “rauka te akamaroiroianga.” (Roma 1:12, NW) E mataora ana te au painia tamou e te au painia tauturu me e aronga tetai i te angaanga kapiti atu, i te popongi roa tikai me kore i te aiai avatea, e e iti ua te au papuritia e piri atu ana ki roto i te angaanga orometua. Ka rauka ia tatou i te tauturu i te au painia na te aru kapiti anga ia ratou i roto i te angaanga orometua. E papuritia makimaki ainei tetai e te kotinga ra tona turanga oraanga i tana e rauka ra i te rave i roto i te angaanga orometua? I te akanooanga i te reira tangata kia aru mai ia tatou, penei i runga i tetai apii Pipiria, ka riro ei tauturu maata.​—Mase. 27:17.

⁵ E akamaroiroi ua ana rai te akameitakianga e te au tuatua no te ariki rekareka, i roto katoa i te au mea rikiriki ua. Kia akamanako tatou i te reira i te angaanga atu anga ki tetai ke i roto i te angaanga orometua, i te mea e te inangaro ra tatou kia ‘akatupu ua rai i te meitaki tetai ki tetai.’​—1 Tesa. 5:11.