Kia Riro ei Tauturu Tau i ko i te Ngutupa
1. Eaa te puapinga ka rauka me angaanga kapiti tatou e tetai tokorua i roto i te angaanga orometua?
1 I tetai atianga, kua tono a Iesu e 70 pipi kia tutu aere, e kua “tataki toko rua atura i te tono anga ia ratou.” (Luka 10:1) Kare e ekoko, kua riro teia akanoonooanga ei tikaanga no tana au pipi kia tauturu e kia akamaroiroi i tetai e tetai ia ratou e tutu aere ra. Me aru tatou i tetai papuritia ki te angaanga orometua, akapeea ra tatou i te tauturu anga atu?
2. Me te tuatua ra to tatou tokorua, ka akapeea tatou me akarongo e eaa te tumu?
2 Na te Akarongo Anga: Akarongo meitaki me akamata toou tokorua i te tuatua atu ki te tangata ngutuare. (Iako. 1:19) Me tatauia tetai irava, e aru i te tatauanga i roto i taau uaorai Pipiria. Akara i te tangata e tuatua ra, me ko toou tokorua me ko te tangata ngutuare. Me akarongo meitaki koe ki te pukapukaanga, penei ka akamaroiroi teia i te pu ngutuare kia akapera rai.
3. Eaa ra te taime ka inangaro to tatou tokorua kia tuatua atu tatou?
3 Na te Kite Anga i te Taime Tau i te Tuatua: Me te oronga ra toou tokorua i tana tuatua, ka akangateitei tatou iaia na te vaoo anga iaia kia tuatua. (Roma 12:10) E mea tau eiaa tatou e tamanamanata atu. Me ngaropoina iaia eaa tana ka tuatua me kore me tuku mai te pu ngutuare i tetai patoianga me kore i tetai uianga, e ka pati tauturu mai to tatou tokorua, e tauta tatou i te turu atu i tana tuatua, eiaa ra e tuatua atu i tetai tumu tuatua ke. (Mase. 16:23; Kohe. 3:1, 7) Me ka tuatua tatou, kia riro ta tatou tuatua ei tauturu i te akakitekiteanga e orongaia ra.—1 Kori. 14:8.
4. Eaa te ka tauturu kia rauka to tatou rekareka e kia manuia i roto i te angaanga orometua?
4 I te oti anga te au pipi e 70 i te tutu aere, ‘kua oki akaou maira ratou ma te rekareka.’ (Luka 10:17) Ka rekareka katoa rai tatou e ka manuia i roto i te angaanga orometua, me akarongo tatou e me kite tatou e eaa te taime tau no te tuatua me tauturu tatou i te aronga e aru ra tatou ki ko i te au ngutuare.