Akapumaana i Tei Mii
1. Eaa tei mii ka anoano ei i te akapumaana?
1 E tupuanga taitaia tikai me mate tetai tei akaperepereia, te aronga tikai kare e manakonakoanga Patireia. (1 Tesa. 4:13) Manganui e manako ana e: ‘Eaa ra te tangata i mate ei? Ka aere ratou kiea me mate? Ka kite akaou ainei au i tei akaperepereia e au?’ Tei raro ake tetai au manako no te akapumaana i te aronga ka aravei tatou i te ngai tutuanga tei mii i tetai kopu tangata me kore oa tei mate.—Isa. 61:2.
2. Me akakite mai te tangata ngutuare e te mii ra aia, ka tauta uatu ainei tatou i te akamaata atu i tetai tuatua akakiteanga?
2 Mei Tera Are ki Tera Are: Penei ka akakite mai te tangata ngutuare e koi mate ua ake nei tetai o te pamiri. Te mata aue ra ainei aia? E maata ainei te kopu tangata mii i te ngutuare? Me ko te tuia, e meitaki atu kia kore e akamaata atu te tuatua akakiteanga. (Kohe. 3:1, 7) Penei, e mea tau kia akakite atu i to tatou tu tangi, e kia oronga atu i tetai aenga pepa, makatini, me kore poroutia tau, e oti kia akaruke meitaki atu ia ratou. I reira ka oki ei tatou a tetai tuatau meitaki atu, kia oronga maata atu i te akapumaana mei te Pipiria mai.
3. Me te tau ra te turanga, eaa te irava tau i te akaari ki te tangata ngutuare e mii ra?
3 Tetai au atianga ke, penei ka kite atu tatou e ka rauka i te akamaata atu te tuatua i te aravei mua anga. Inara kare teia i te taime akaapa atu i te au manako tarevake, ka rauka ra ia tatou te tatau atu i te au koreromotu Pipiria no te tuakaouanga. (Ioa. 5:28, 29) Me kore kia akaari tatou i ta te Pipiria e akakite ra no te turanga o te mate. (Kohe. 9:5, 10) Ka rauka katoa tetai tupuanga tuakaouanga i roto i te Pipiria ei akapumaana anga. (Ioa. 11:39-44) Tetai ravenga, kia akamanako i te au tuatua manakonakoanga a Iobu tiratiratu i roto ia Iehova. (Iobu 14:14, 15) I mua ake ka akaruke ei, oronga i te poroutia What Happens to Us When We Die?, Me Mate Tetai Taau e Akaperepere Ra, me kore tetai atu poroutia me kore aenga pepa ka tau. Me kore e akaruke i te puka ta te Pipiria e Apii Maira, e kia akaari i te manako i roto i te pene 6, e te akanoo i te uriuri maata atu i te tumu manako me oki akaou tatou.
4. Eaa tetai au atianga ke kia oronga tatou i te akapumaana?
4 Tetai Au Atianga Ke: Me ka raveia tetai tuatua tanuanga me kore akamaaraanga i te Are Uipaanga Patireia, e aronga ainei tetai kare i te Kite i reira? Kia papa ua tetai au puka ei akapumaana anga ia ratou. E ariki mareka ana tetai au kainga tanumanga i te au puka tau, kia papa ua no te au pamiri e mii ra. Tetai taime, e akatuera ana te au akakiteanga tanuanga i roto i te nuti pepa i tetai atianga kia tata i tetai reta akapumaana poto ua ki te au mema pamiri e mii ra. Tetai atianga, i muri ake te tae mai anga tetai reta ma tetai au aenga pepa ki tetai papa takaua e tana tamaine, kua aere atu raua ki te kainga o te papuritia, kua ui atu e: “Ko kotou ainei te aronga tei tuku mai i teia reta kiaku? Ina, ka inangaro au i te kite maata atu i te Pipiria!” Kua ariki teia tangata e tana tamaine i tetai apii Pipiria e kua akamata i te aere ki te au uipaanga putuputuanga.
5. Eaa tatou ka tau ei kia kite viviki uatu i te au atianga kia akapumaana i te aronga e mii ra?
5 Te akakite ra a Koheleta 7:2 e: “E mea meitaki te aere ki te are aue anga, i te aere ki te are kaingakai.” E mea matauia i te kite e e meitaki atu te tu manako o te tangata e mii ra i te akarongo ki te Tuatua a te Atua i te tangata manako tamataora ua. Ka tau tatou katoatoa kia kite viviki uatu i te au atianga tau kia akapumaana i te aronga e mii ra i tetai tei akaperepereia kua mate.