E Au Apinga Manea e te Puapinga ta Tatou ka Oronga Atu
1 Kua ki te Tuatua a te Atua i te au apinga manea tei akaperepereia e tatou. (Sala. 12:6; 119:11, 14) I tetai atianga, kua taangaanga a Iesu i te au akatutuanga no runga i te au tuanga tukeke o te Patireia, e kua ui aia ki tana au pipi e: “Kua taka aina ia kotou teia au tuatua katoa nei?” I to ratou pauanga e kua marama ratou i teia au tuatua, kua tuatua a Iesu kia ratou e: “Te au tata tuatua katoa i apii meitakiia, kia tau i te basileia o te ao ra, e arite ïa ki te tangata kainga, tei apai mai i te apinga ou e te apinga taito, no roto i tana putunga.”—Mata. 13:1-52.
2 Te au apiianga Pipiria ta tatou i kite mai i te akamata mua anga tatou i te apii, mei te au apinga taito manea rai te reira. Na te rave ua anga i ta tatou uaorai apii no te au mea oonu i roto i te Tuatua a te Atua, ka kite tatou i tetai atu au tuatua mou i roto i te Pipiria, e au apinga ou e te manea kia tatou. (1 Kori. 2:7) Pera katoa, na roto i “te tavini akono meitaki e te pakari,” ka kite tatou i te au apinga ou e te manea.—Mata. 24:45.
3 Te akangateitei maata nei tatou i te au apinga manea pae vaerua, te apinga taito e te apinga ou. Ka akakeu teia ia tatou i te kimi kia rauka te terenianga e te kite, kia riro ei au puapii no te Tuatua a te Atua, ma te tua aere anga ki tetai ke i te au tuatua mou puapinga ta tatou i kite mai.
4 Apiiia mei te Akaraanga o Iesu: I te akaari mai anga aia e eaa tona manako no runga i teia au apinga manea, kua tauta pakari a Iesu i te oronga atu i te reira ki tetai ke. Noatu e kua roiroi aia, kare aia i tapu ana i te oronga atu i te au apinga manea no roto mai i tana “are vairanga.”—Ioa. 4:6-14.
5 No to Iesu aroa i te aronga putaua i te pae vaerua, kua akakeuia aia kia oronga i te au apinga manea no te au tuatua mou ora a te Atua. (Sala. 72:13) Kua tangi aia i teia aronga te pongi ra i te pae vaerua e kua akakeuia aia kia ‘apii atu ia ratou i te au tuatua e manganui.’—Mare. 6:34.
6 Aru ia Iesu: Me akangateitei tatou i te au apinga manea tei rauka mai ia tatou, mei ia Iesu rai, ka inangaro rai tatou i te akaari ki te au tangata i te au mea umere pae vaerua i roto tikai i te Pipiria. (Mase. 2:1-5) Penei ka roiroi tatou i tetai au taime, noatu ra ka tuatua maoraora ua rai tatou i te au tuatua mou i roto i te Tuatua Tapu ma te ngakau tae. (Mare. 6:34) I te ariki rekareka maataanga tatou i te au apinga manea tei rauka mai ia tatou, ka akakeu te reira ia tatou i te rave maroiroi i te angaanga orometua, na te tauta ua anga rai i te rave pu tikai anga i te reira.