Kapiti Atu ki Roto i te Rekareka no te Orongaanga!
“E mea meitaki i te oronga atu i te rave mai.”—ANGAANGA 20:35.
1. Akapeea ta Iehova ra akakite anga i te rekareka no te orongaanga?
TE REKAREKA i te kiteanga i te tuatua mou e te au akameitakianga ka tupu ei au mea puapinga maata mei ko mai i te Atua ra. Te aronga tei kite ra ia Iehova e manganui ta ratou au tumu no te rekareka anga. Inara noatu e te vaira te rekareka i te raukaanga tetai apinga aroa, te vai katoa ra oki te rekareka anga i te orongaanga i tetai. Ko Iehova Tei Oronga mai i “te au mea memeitaki i o maiia ra,” e koia “te Atua mataora ra.” (Iakobo 1:17; 1 Timoteo 1:11, NW) Te oronga ra aia i te au apiianga ora ki te katoatoa te akarongo maira, e te mareka ra aia i te akarongo anga o te aronga tana e apii atura, mei te au metua rai e rekareka ra me akarongo mai ta ratou tamariki ki te apiianga aroa ra.—Maseli 27:11.
2. (a) Eaa ta Iesu i tuatua no te orongaanga? (e) Eaa te mataora anga ka rauka ia tatou me ka apii tatou ia etai ke i te tuatua mou o te Pipiria ra?
2 Aiteite katoa, iaia i runga i te enua nei kua mataora a Iesu i te kite anga i te au tangata e akarongo papu atura ki tana apiianga. Kua taiku mai te apotetoro ko Paulo i ta Iesu tuatuaanga: “E mea meitaki i te oronga atu i te rave mai.” (Angaanga 20:35) Te mataora anga e rauka mai ia tatou i ta tatou apii anga ia etai ke i te tuatua mou Pipiria ra kare ia i te merengo anga ua i te akatika anga o etai ra ma to tatou au irinaki anga akonoanga ra. E mamao ke atu i te reira, e mea rekareka no te kiteanga e te oronga ra tatou i tetai apinga tika tikai e te puapinga mutu kore oki. Na te orongaanga i te apinga pae vaerua, ka rauka ia tatou kia tauturu i te au tangata kia akapuapinga ia ratou uaorai i teianei e mutu kore ua atu.—1 Timoteo 4:8.
Ka Apai Mai te Orongaanga i te Rekareka
3. (a) I akapeea ta nga apotetoro ko Paulo raua ko Ioane akakite anga i to raua rekareka i te tauturuanga ia etai ke ra i te pae vaerua? (e) Eaa ra te orongaanga i te tuatua mou no te Pipiria ki ta tatou tamariki i riro ei ei akakite anga aroa?
3 Ae, mei ia Iehova raua ko Iesu i rekareka i te oronga anga i te apinga vaerua, kua pera katoa te au Kerititiano. Kua kitea e te apotetoro ko Paulo te rekareka i te kiteanga e kua tauturu aia ia etai ke ra kia kite i te tuatua mou o te Tuatua a te Atua ra. Kua tata aia ki te putuputuanga i Tesalonia: “Eaa oki to matou irinaki anga, e te rekareka anga, e te korona rekareka anga? Kare aina ko kotou i mua i te aroaro o to tatou Atu ra, ko Iesu Mesia kia tae mai aia ra? Koia ïa, ko kotou to matou kakā e to matou rekareka.” (1 Tesalonia 2:19, 20) Mei te reira katoa oki te apotetoro ko Ioane, i te taikuanga ki tana au tamariki pae vaerua ra, kua tata: “Kia kite au e, te aere ra taku au tamariki na te tuatua-mou, kare oku e rekareka anga maata atu.” (3 Ioane 4) E tamanako, katoa, i te rekareka anga te vaira i te tauturuanga i ta tatou uaorai tamariki kia riro ei tamariki pae vaerua na tatou! Te akonoanga i te tamariki ra “e apii ra ia ratou kia pakari ma te ako a te Atu ra” ko tetai akakite anga aroa ia na te au metua ra. (Ephesia 6:4) Na te reira te akaari ra te au metua e te akamanako ra ratou i te meitaki mutu kore no ta ratou tamariki. Me akarongo mai ratou, ka kite te au metua i te rekareka anga maata e te merengo anga oki.
4. Eaa te tupuanga tei akakite maira i te rekareka no te orongaanga i te pae vaerua ra?
4 E orometua painia tamou a Dell e e metua vaine o tetai toko rima. Kua tuatua aia: “Te kite meitaki ra au i ta te apotetoro ko Ioane au tuatua no te mea te akameitaki maata ra au e e a o taku au tamariki te ‘aaere ra i te tuatua mou.’ Kua kite au e te apai maira te reira i te ngateitei e te kaka kia Iehova me taokotai te au pamiri i te akamori anga mou, no reira te manako ngakau merengo oonu ra au i te kiteanga i tana akameitakianga ki runga i taku au tauta anga kia akanoo i te tuatua mou ki roto i taku tamariki. Te manako anga manea no te oraanga mutu kore ki roto i te Parataito ma taku pamiri te akaki maira iaku ma te manakonako anga e te akakeu maira iaku kia akakoromaki noatu te au tu ngata e te au arairai anga ra.” E mea reka kore ra, kua akaateaia tetai o nga tamaine a Dell mei te putuputuanga no te aruaruanga i te aerenga tau kore i te Kerititiano ra. Inara, te rave maroiroi ra a Dell kia tamou marie i tetai tu akono papu. “Te manako nei au e a tetai ra ka oki akaou mai taku tamaine kia Iehova ma te tu akaaka e te ngakau tae,” tana i tuatua. “Inara te akameitaki nei au i te Atua e ko te maata anga o taku tamariki te rave ua atura i te tavini tiratiratu anga iaia. Ko te rekareka anga taku e manako ngakau nei kua riro ei tumu tikai no te maroiroi kiaku nei.”—Nehemia 8:10.
Akariroanga ei Au Oa Mutu Kore
5. Ia tatou e oronga ra ia tatou uaorai i te angaanga no te akariroanga i te tangata ei pipi, eaa te kiteanga ka oronga mai i te merengo anga kia tatou?
5 Kua arataki atu a Iesu i tana au pipi kia akariro i te tangata ei au pipi Kerititiano e kia apii atu ia ratou no runga ia Iehova e tana au umuumuanga. (Mataio 28:19, 20) Kua tauturu noinoi kore atura Iehova raua ko Iesu i te au tangata kia apii i te arataa tuatua mou ra. No reira ia tatou e oronga ra ia tatou uaorai ki roto i taua angaanga no te akariroanga i te tangata ei au pipi, tei ia tatou te merengo anga i te kiteanga e te aru ra tatou i te akatauanga a Iehova raua ko Iesu, mei ta te au Kerititiano mua i rave ra. (1 Korinetia 11:1) Me ka rave taokotai tatou ma te Atua Mana Katoatoa e tana Tamaiti akaperepere katoa oki, ka riro ei aiteanga tika tikai to tatou au oraanga. Mei teaa ra te akameitakianga o te reira kia kapitiia atu ki roto i te au ‘oa rave angaanga no te Atua ra’! (1 Korinetia 3:9) Kare ainei i te marekaanga e ko te au angera e tuanga ta ratou i roto i teianei angaanga no te tutuanga i te evangeria?—Apokalupo 14: 6, 7.
6. Ia tatou e kapiti ra i te orongaanga i te pae vaerua, koai ma te ka riro mai ei au oa no tatou?
6 Ko te tika, na te kapitianga ki roto i teianei angaanga no te orongaanga ki etai atu i tetai apinga puapinga i te pae vaerua, ka rauka kia riro tatou kia tere atu i te au oa rave angaanga ma te Atua ra—ka rauka kia riro tatou ki roto i tetai pirianga oa mutu kore ma ia katoa ra. No tona akarongo, kua karangaia a Aberahama e oa no Iehova. (Iakobo 2:23) Ia tatou e tauta ra kia rave i to te Atua anoano, ka rauka katoa kia riro tatou ei au oa no te Atua. Me rave tatou i te reira, ka riro katoa tatou ei au oa no Iesu. Kua tuatua aia ki tana au pipi: “Kua karanga ra au kia kotou e, e oa; kua akakite oki au kia kotou i te au tuatua ravarai taku i kite i taku Metua ra.” (Ioane 15:15) E manganui te rekareka ra kia akamanakoia ratou e au oa no te au tangata mana me kare aronga opita teitei, inara ka rauka tatou kia akamanakoia ei au oa no nga peretana maata roa atu e rua i te ao katoa e pini ua ake!
7. (a) I akapeea tetai vaine i te akariro anga i tetai ei oa tikai? (e) Kua tupu ainei kia koe tetai tu aiteite?
7 Pera katoa oki, me ka tauturu tatou i te au tangata kia kite i te Atua, ka riro katoa ratou ei au oa no tatou, ma te apai maianga i tetai mataora taka ke kia tatou. Kua akamata a Joan tei noo ra ki Marike, i te apii Pipiria ma tetai vaine ko Thelma te ingoa. Noatu rai e kua rokoia a Thelma e te patoianga a te pamiri ki tana apii, kua akakoromaki aia e kua papetitoia i te mataiti i muri akera. Kua tata a Joan: “Kare to maua pirianga i ope ki reira; kareka ra, kua tupu atu te reira ki roto i tetai oaanga tei vai mai no etai 35 mataiti i teianei. E putuputu maua i te aere anga kapiti ki te angaanga orometua e te au uruoaanga. I muri akera kua neke atu au ki tetai kainga ou e 800 kiro mita te mamao atu. Inara kua rave ua a Thelma i te tuku mai i te au reta aroa maata e te akapumaana ngakau anga, i te akakite anga mai kiaku e te manako aroa maira aia iaku e te akameitaki maira no toku riro anga ei oa nona e ei akatauanga e no te apiianga iaia i te tuatua mou no te Pipiria maira. Te raukaanga taua pirianga oa vaitata e te akaperepere anga ko tetai tutaki ia no te tauta anga taku i rave kia tauturu iaia kia kite ia Iehova.”
8. Eaa te tu manako papu ka tauturu ia tatou i te angaanga orometua?
8 Te manakonako anga no te kimianga i tetai tei anoano ra kia apii i te tuatua mou ka tauturu ia tatou kia akakoromaki noatu me ko te au tangata e manganui ta tatou ka aravei ka akaari meangiti ua mai me kore kare ua e manako i te Tuatua a Iehova ra. Taua tu manako kore ra ka oronga mai i tetai akaaoanga ki to tatou akarongo e te akakoromaki anga oki. Inara, na tetai tu manako papu e tauturu mai ia tatou. Kua tuatua a Fausto, tei aere maira no Guatemala mai, e: “Me akakite atu au kia etai ke ra, ka akamanako au e akapeea te meitaki me ko te peretana taku e tuatua atura ka riro mai ei taeake me kare ei tuaine i te pae vaerua. Ka akamanako au e penei ake ko tetai peretana taku ka aravei i te openga ra ka takave mai i te tuatua mou o te Tuatua a te Atua ra. Na taua manako ra e tauturu iaku kia aere ua atu i te tutu aereanga e ka apai mai i te rekareka tikai kiaku.”
Akaputuanga i te Au Apinga i te Rangi
9. Eaa ta Iesu i tuatua no te au apinga i te rangi ra, e eaa ta tatou ka kite mei te reira maira?
9 Te akariro anga i te tangata ei pipi, me ko ta tatou au tamariki me kare ko etai ke ra, kare i te mea ngoie ua. Penei ka pou te tuatau, te akakoromaki, e te tauta anga. Inara, kia maara, e manganui te mareka ra kia rave maroiroi i te akaputu anga kia maata te au apinga kopapa, te au mea kare ra e apai mai i te rekareka kia ratou e kare e vai mai e tuatau ua atu. Kua tuatua a Iesu ki te aronga i akarongo atura kiaia e e meitaki atu kia angaanga no te au apinga vaerua ra. Kua na ko atura aia: “Auraka e akaputu i te apinga na kotou i teianei ao, i te ngai e pou ei i te uu, e te pe, i te ngai e tomoia, e e keiaiaʼi e te keia. Ka akaputu ra i te apinga na kotou ki runga i te rangi, i te ngai e kore ei e pou i te uu e te pe, kare oki te keia e tomo i reira ka keiaʼi.” (Mataio 6:19, 20) Na te aruaruanga i te au akakoroanga pae vaerua—tei kapiti ra i te raveanga i te angaanga puapinga maata i te akariroanga i te tangata ei pipi—ka rauka ia tatou te merengo anga i te kiteanga e te rave ra tatou i te anoano o te Atua e nana e tutaki mai ia tatou. Kua tata te apotetoro ko Paulo: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na.”—Ebera 6:10.
10. (a) Eaa i raukai ia Iesu te au apinga meitaki i te pae vaerua? (e) Akapeea a Iesu i te oronga anga iaia uaorai, e eaa oki te puapinga maata ki tetai?
10 Me rave tiratiratu tatou i te akariro anga i te tangata ei au pipi, ka akaputu tatou na tatou uaorai i “te au apinga i te rangi,” kia rotai ma ta Iesu i tuatua ra. Na teia e apai mai kia tatou i te rekareka no te raukaanga. Me ka oronga noinoi kore ua tatou, ka riro tatou uaorai kia puapingaia. Kua tavini tiratiratu a Iesu uaorai ia Iehova no etai au pirioni mataiti. E tamanako ana i te au apinga tana i akaputu ki te rangi ra! Tera ra, kare a Iesu i kimi i tona uaorai meitaki. Kua tata te apotetoro ko Paulo: “Ko [Iesu] tei oronga mai iaia uaorai i ta tatou ara, kia ora tatou iaia i teianei ao kino, ko tei tau i ta te Atua, i ta to tatou Metua i inangaro.” (Galatia 1:4) Kare a Iesu i oronga noinoi kore iaia uaorai i tana angaanga orometua ra mari ra kua oronga katoa aia i tona oraanga ei oko kia raukai i etai ke ra te tika kia akaputu i te au apinga vaerua ki te rangi ra.
11. Eaa ra te au apinga aroa pae vaerua i meitaki atu ei i te au apinga kopapa ra?
11 Na te apiianga i te au tangata no te Atua, ka tauturu tatou ia ratou kia kite e akapeea ratou me akaputu i te au apinga pe kore. Eaa atu tetai apinga maata ka rauka ia koe kia oronga? Me oronga koe ki tetai oa i tetai uati okomaata, tetai motoka, me kare noatu tetai kainga, penei ka akameitaki taua oa ra e ka mataora, e ka rauka ia koe te rekareka anga no te orongaanga. Inara eaa te tu o taua apinga tei orongaia ra i te 20 mataiti? I te 200 mataiti? I te 2,000 mataiti? I tetai tua, me ka oronga koe ia koe uaorai kia tauturu i tetai tangata kia tavini ia Iehova, ka puapinga aia i taua apinga aroa e tuatau ua atu.
Kimianga i te Aronga Tei Anoano i te Tuatua Mou
12. Akapeea ta te aronga e manganui oronga anga ia ratou uaorai kia tauturu atu ia etai ke ra i te pae vaerua?
12 Kia kapiti i te rekareka i te orongaanga i te pae vaerua, kua itae atu te au tangata o Iehova ki te openga o te ao nei. E au tauatini ua atu kua akaruke i to ratou kainga e te pamiri kia rave i te tavinianga mitinari i te au enua tei anoanoia ra ratou kia apii i te au reo ou e te au peu oki. Ko etai kua neke atu ki etai ngai i to ratou uaorai au enua tei umuumuia ra kia maata atu te aronga akakitekite i te Patireia. Inara ko etai atu kua apii i tetai reo ke, i te akatueraanga i etai au ngai ou no te tutu aereanga i to ratou uaorai ngai ki te au tangata ke ra. Ei akatauanga, i muri ake i te akonoanga e rua tamariki te tavini ra i teianei i te opati maata o te Au Kite o Iehova i te ao nei, kua akamata nga tokorua i New Jersey, U.S.A., i te painia e te apii i te reo Tinito. Tere atu i te toru mataiti, kua akono raua e 74 apii Pipiria ma te au tangata tuatua reo Tinito tei aere ra ki tetai kaoreti i te pae mai. Ka rauka ainei ia koe kia akatotoa atu i taau angaanga orometua na roto i tetai tu kia kiteai te rekareka maata atu i te angaanga no te akariroanga i te tangata ei pipi?
13. Eaa taau ka rave me ka anoano koe e kia uua maata mai taau angaanga orometua?
13 Penei te inangaro ra koe kia akono i tetai apii Pipiria inara kare i rauka ia koe te rave i tetai. I etai enua e mea ngata kia kitea te aronga te inangaro ra. Penei te au tangata taau e aravei ra kare e akaari mai i te inangaro i te Pipiria. Me koia ia, penei ka rauka ia koe te taiku i toou anoano kia putuputu atu i roto i te pure, i te kiteanga e ko Iehova raua ko Iesu Karaiti te inangaro maata maira i te angaanga e penei ka taki atu ia koe ki tetai peretana mei te mamoe rai te tu. E kimi i te au manako mei ko mai i te aronga i toou putuputuanga tei kite karape ra me kare te uua maira ta ratou angaanga orometua. E mou i te terenianga e te au manako te orongaia ra i te au uipaanga Kerititiano. Kia puapingaia i te akoanga a te au akaaere tutaka aere e ta ratou vaine oki. I runga ravao, auraka e akamutu ua. Kua tata te tangata pakari ra: “Ei te popongi ka ruru ei i taau ua, e ei te aiai auraka e tāpu ua i to rima: kare oki koe i kite i te ka tupu, me ko teia, me ko tera, peneiake ko te meitaki kapipiti katoa ra.” (Koheleta 11:6) I teianei, kia maara i nga tangata tiratiratu ra ia Noa raua ko Ieremia. Noatu rai e tokoiti ua tei akarongo papu mai ki ta raua tutu aerenga, kua puapingaia ta raua angaanga orometua. I runga ravao, kua akamareka te reira ia Iehova.
Raveanga i te Meitaki tei Rauka ia Koe
14. Akapeea to Iehova manako anga no te aronga kua ruaine ia i roto i te tavini anga iaia ra?
14 Penei ake kare toou au turanga e akatika ia koe kia rave i te maata taau i anoano ra i roto i te angaanga orometua. Ei akatauanga, te ruaine penei ka kotinga i taau ka rauka kia rave i te tavini anga ia Iehova. Inara, kia maara i ta te tangata pakari i tata ra: “E korona kakā te upoko inaina, kia rokoia atu tei te arataa tuatua-tika ra.” (Maseli 16:31) Kia Iehova, ko tetai ora anga katoa tei akapouia i te tavini anga kiaia e mea manea ia. Pera katoa, te tuatua ra te au Tuatua Tapu: “E ruaine ua atu rai kotou, ko au [ko Iehova] nei rai au; e tae ua atu ki te inaina anga o to kotou upoko naku kotou e apai; naku i anga, e maranga kotou iaku; naku ra oki kotou e apai, e naku e akaora.” (Isaia 46:4) Te taputou maira to tatou Metua aroa i te rangi ra kia akatinamou e kia turu oki i tona aronga tiratiratu ra.
15. Te irinaki ra ainei koe e te kite maira a Iehova i toou au turanga? No teaa ra?
15 Penei te akakoromaki ra koe i te maki, te patoianga mei ko mai i tetai tokorua akarongo kore ra, te au apainga teiaa a te pamiri, me kare etai atu manamanata ngata. Te kite maira Iehova i to tatou au kotinga anga e te au turanga, e te aroa maira aia ia tatou no ta tatou au tauta anga maata kia tavini iaia. Ko te tika te reira noatu me e meangiti mai ta tatou i rave i ta etai ke ra. (Galatia 6:4) Te kite ra Iehova e tu apa ua to tatou, e te manako tika ra aia i tana i manako mai ia tatou kia rave. (Salamo 147:11) Me rave tatou i tei meitaki ia tatou, ka tau tatou kia akapapu e e okomaata tatou i ta te Atua ra akara anga e kare aia e akangaropoina i ta tatou au angaanga no te akarongo.—Luka 21:1-4.
16. Na roto i teea tu i rave kapiti ei te putuputuanga katoa i te akariroanga i tetai ei pipi?
16 Kia maara, katoa oki, e ko te angaanga akariroanga tangata ei pipi ko tetai tauta angaia na te pupu. Kare na te tangata okotai e akariro i tetai ei pipi, kare katoa oki tetai topata ua okotai e akamaroiroi i tetai ngangaere. E tika ra penei na tetai Kite i aravei i tetai peretana inangaro e i akono te apii Pipiria kiaia. Inara me aere mai taua tangata ou ra ki te Are Uipaanga Patireia, ka riro na te putuputuanga katoa ra e tauturu iaia kia kite i te tuatua mou. Na te pumaana o te taeake anga e akaari i te mana o te vaerua o te Atua ra. (1 Korinetia 14:24, 25) Te tamariki e te au mapu ka oronga i te au pauanga akamatutu, i te akaarianga ki te peretana ou ra e e tuke to tatou aronga ou mei te aronga mapu o te ao nei. Te aronga maki, te aronga paruparu, e te aronga ruaine i te putuputuanga ka apii i te aronga ou ra e eaa te o atura ki te akakoromaki anga. Noatu eaa to tatou mataiti me kare au kotinga, pouroa tatou te rave ra i tetai tuanga puapinga i te tauturuanga i te aronga ou ra i te tupu oonu anga to ratou inangaro i te tuatua mou o te Pipiria ia ratou e tere atura ki te papetitoanga. Te au ora ravarai ta tatou e akapou ra i te angaanga orometua, te oki akaou anga takitai, te tuatua anga takitai ma tetai peretana inangaro ra i te Are Uipaanga Patireia, penei te akara anga meangiti ua ra, inara ko tetai tuanga ia no te angaanga mana ta Iehova e rave nei.
17, 18. (a) Kapiti atu ki te raveanga i te angaanga no te akariroanga i te tangata ei pipi, akapeea tatou me kapiti atu ki roto i te rekareka no te orongaanga? (e) Na te kapitianga ki roto i te rekareka no te orongaanga, koai ta tatou e aru ra?
17 Inara, i te pae atu i te kapitianga i te angaanga puapinga maata no te akariroanga i te tangata ei pipi, ko tatou ei au Kerititiano ka kapiti katoa ki roto i te rekareka anga no te orongaanga na roto i etai atu tu. Ka rauka ia tatou te akatakake i te au moni ei tauturu i te turu anga i te akamori ma e te tauturu oki i te aronga te ngere ra. (Luka 16:9; 1 Korinetia 16:1, 2) Ka rauka kia akara tatou i etai atu tuatau kia akaari i te tu maoraora kia etai atura. (Roma 12:13) Ka tauta tatou kia “takinga-meitaki tatou i te tangata ravarai, kia maata atura ki to te ngutuare o te akarongo ra.” (Galatia 6:10) E na roto i te au tu mama ua e te puapinga maata, ka rauka ia tatou kia oronga atu ki etai atu—i tetai reta, tetai tuatuaanga terepaoni, tetai apinga aroa, tetai rima tauturu, tetai tuatua no te akamaroiroi anga.
18 Na te orongaanga, ka akaari tatou e te aru ra tatou i to tatou Metua i te rangi ra. Ka akakite katoa tatou i to tatou aroa taeake, koia te akairo akatakaanga i te au Kerititiano mou ra. (Ioane 13:35) Na te maaraanga i teianei au apinga ka tauturu ia tatou kia kapiti atu ki te rekareka anga no te orongaanga.
Ka Rauka Ainei ia Koe te Akataka?
• Akapeea a Iehova raua ko Iesu te akanoo anga i te akatauanga no te orongaanga i te pae vaerua?
• Penei akapeea tatou i te akariroanga i etai ei au oa mutu kore?
• Penei eaa te au takainga ta tatou ka rave kia akariro i ta tatou angaanga orometua kia puapinga maata?
• Akapeea e raukai i te katoa i roto i te putuputuanga kia kapiti atu i te rekareka no te orongaanga ra?
[Au Tutu i te kapi 13]
Me akarongo te tamariki i te terenianga, ka kite te au metua i te rekareka maata e te merengo anga
[Tutu i te kapi 15]
I te akariroanga ei pipi, ka rauka ia tatou te akariro i tetai ei au oa tikai
[Tutu i te kapi 16]
Na Iehova tatou e apai i te ruaine anga
[Au Tutu i te kapi 17]
Na roto i te au tu mama ua e te puapinga maata, ka kite tatou i te rekareka i te orongaanga