Rauka Ainei ia Koe i te Akamaata Atu i Taau Tutuanga?

1. Eaa te tu rapurapu te anoanoia ra i roto i te angaanga tutuanga, e no teaa ra?

¹ Te kite anga i te inangaro ta te manganui e akaari maira no te tuatua meitaki o te Patireia, kua ikuiku a Iesu i tana au pipi kia ‘pure ki te Atu o te mou, kia unga mai i tetai aronga ei rave i taua mou nana ra.’ (Mata. 9:37, 38) I te mea e tei te au ora openga tatou no te tuatau kokotianga, te maata atura te rapurapu anga no ta tatou angaanga i to mua ana. Te aiteanga i reira, kia akamanako ua rai tatou na roto i te pure akapeea tatou me piri maata atu ki roto i te angaanga tutuanga.​—Ioa. 14:13, 14.

2. Akapeea tetai i te ariu mai anga ki te kapiki anga kia maata atu te aronga angaanga i roto i te ngai tutuanga?

² Akamaata Atu i te Tutuanga: Ma ta Iehova arataki anga e te tauturu anga, e manganui tei kite mai e ka rauka ia ratou i te painia. (Sala. 26:2, 3; Phili. 4:6) Kua tauta pakari tetai pae i te tavini ei au painia tauturu e tai me kore e maata atu te au marama i roto i te mataiti. Kua riro teia ei mataara meitaki no te akamaata atu i ta ratou angaanga orometua. Te mataora tei rauka mai no te painia tauturu, kua akakeu i te manganui kia akamanako kia riro ei au painia tamou.​—Anga. 20:35.

3. Me i painia ana koe i mua atu ana, eaa taau e inangaro ra i te akamanako i teianei?

³ Ka Rauka ia Koe i te Akamata Akaou i te Painia?: Me i painia ana koe i mua atu ana, kare ekoko e te manako akaperepere ra koe i taua tuatau ra. I manako ana ainei koe na roto i te pure me ka rauka ia koe i te painia akaou? Te au turanga i akamutu ei koe i te painia penei kare e riro akaou ei arairai anga. Penei kua tae te tuatau noou i te painia mataora akaou.​—1 Ioa. 5:14, 15.

4. Eaa te tikaanga manea tei orongaia mai kia tatou katoatoa?

⁴ Te raveia nei te angaanga kokotianga e kare e roa atu ka oti. (Ioa. 4:35, 36) E akara matatio tatou katoatoa i to tatou uaorai turanga i teianei, kia akamanako me ka rauka ia tatou i te akatanotano i ta tatou au angaanga o te au ra ravarai kia piri maata atu ki roto i te angaanga tutuanga. Me kite mai tatou e kare e rauka ia tatou i te akamaata atu i ta tatou tutuanga, ka rauka ainei ia tatou i te kimi i tetai au mataara kia akameitaki atu? (Mare. 12:41-44) E tikaanga manea tikai tei akanooia i teianei ki mua i te katoatoa, te akatika ra to ratou au turanga kia taangaangaia e Iehova i roto i teia tautaanga puapinga!​—Sala. 110:3.