E Au Kite Tatou i te Au Taime Pouroa

1. Eaa ta tatou ka mou mai mei te papaanga o ta Iesu akakitekiteanga ki te vaine i ko te rua vai?

¹ Kua roa a Iesu i te aaere ua anga. Kua roiroi aia e kua kaki vai. Te aere anga tana au pipi i te oko kai, kua noo aia i te akangaroi i ko i tetai rua vai i vao i te oire o Samaria. Kare a Iesu i aere ki Samaria i te tutu aere; i na reira atu ra aia ki Galilea i te rave i tana angaanga orometua. Noatu ra, kua taangaanga aia i te taime i te akakitekite ki tetai vaine i aere mai te tiki vai. (Ioa. 4:5-14) Te tumu? No te mea e “kite mou e te tuatua-mou” a Iesu no Iehova i te au taime ravarai. (Apo. 3:14) E aru tatou ia Iesu, na te riro anga ei Au Kite no Iehova i te au taime pouroa.​—1 Pete. 2:21.

2. Akapeea tatou me akapapa no te akakitekite aere ua?

² Kia Papa Ua: Ka papa ua tatou i te akakitekite aere ua me apai tatou i tetai au puka. Maata te papuritia e apai ana i te au aenga pepa e te oronga i te reira ki te au tiaki toa, te aronga tito penitini, e etai atu ta ratou ka aravei. (Kohe. 11:6) Tetai tuaine e aere ua ana mei tera ngai ki tera ngai, e apai ana aia i tetai Pipiria meangiti e te puka, ta te Pipiria e Apii Maira, i roto i tana kiri, e e tauta ana aia i te pukapuka atu ki te aronga e noo ra i te pae mai iaia.

3. Akapeea e rauka ai ia tatou i te akamata i tetai pukapukaanga?

³ Akamata i te Pukapuka: Me akakitekite aere ua, kare e anoanoia tetai tumu manako Tuatua Tapu i te akamataanga. Kare a Iesu i akakite ana e koia te Mesia i te akamata anga i te pukapuka atu ki te vaine i te rua vai. Kua pati ua aia i tetai vai inu, tei akakeu iaia kia tuatua mai. (Ioa. 4:7-9) Kua riro taua ravenga ra ei tauturu i tetai tuaine kia akamata atu i tetai pukapukaanga i te uiia mai anga kiaia e me e reka ana aia i te akamaara i te ra orote. Kare aia i tuatua e kare aia e piri ana ki te reira no te mea e Kite aia no Iehova, mari ra kua karanga atu aia e, “Kua iki rai au eiaa e akamaara i te reira.” E mea matau kia uiia mai e eaa te tumu, e atianga tau tikai i reira tera no te tuaine kia akakitekite atu.

4. Eaa te tumu i akakeuia ai koe e Mataio 28:18-20?

⁴ Noatu kua oti ta Iesu angaanga orometua maroiroi i te enua nei, te manako ua mai nei rai aia i te angaanga tutu aere e raveia nei mei tana rai i rave. (Mata. 28:18-20) Mei ia Iesu rai, to tatou Akaraanga, e Au Kite papa ua tatou i te akakite i to tatou akarongo ki te katoatoa i tetai ua atu taime.​—Ebe. 10:23.