Akamori i te Atua Mou Anake te Ka Taangaangaia no te Apii Pipiria a te Putuputuanga
1, 2. Na te apiianga i te puka Akamori i te Atua e tauturu ia tatou i roto i teea mataara?
1 I roto ia Mati ka akamata tatou i te taangaanga i te puka Akamori i te Atua Mou Anake i ko i ta tatou Au Apii Pipiria a te Putuputuanga. Ka oronga mai te reira i te tumu no te au uriurianga akakeuanga e te puapinga tikai.
2 Ta tatou uriurianga i te Akamori i te Atua Mou Anake ka tauturu ia tatou kia akaoonu atu i to tatou aroa e te ariki rekareka no Iehova e tana akaaerenga. Akapeea tatou e puapinga pu tikai ei mei ta tatou apii i te puka Akamori i te Atua?
3, 4. Eaa te au tikaanga ka tau te akaaere kia akamanako?
3 Raveanga i te Apii: No te mea ka uriuri tatou apa ua i te pene i te epetoma tataki tai, ka anoanoia te au akaaere apii Pipiria kia akatuanga meitaki i te ora. Ka inangaroia ratou eiaa e tapupu i te apii i te au parakarapa akamataanga kia maata te taime no te au apii oonu atu, te ka kiteaia rai i roto i te pene. Na te uriuri poto anga i te pia no te uriuri akaou i te openga o te apii tataki tai e tauturu i te aronga tei tae mai kia tamou i te au tumu manako maata.
4 Te au uianga tei tataia i roto atu no te akamanako oonu anga e te uriuri anga ka kiteaia i roto i tetai apa o te au pene o te puka Akamori i te Atua. Ka kitea tetai akaraanga i te kapi 48-9. Kare e anoanoia taua au uianga ra kia tatauia e te au parakarapa. Me uriuriia te reira e te putuputuanga, ka tau te tangata akaaere kia tatau e kia uriuri i te au irava tei taikuia me ka rava te taime.
5. Eaa te orongaanga kia puapingaia te apii ta tatou ka rave, e akapeea te puka i te oronga anga mai i te au puapinga e toru?
5 Akapapa Vave: Te akapapa meitaki anga no te apii e maata atu te o maira i te akaira ua i te au pauanga. Na te akamanako oonu anga na roto i te pure i te au irava tei taikuia e tauturu ia tatou kia akapapa, kare anake ua i ta tatou ka tuatua, pera katoa ra, te mea puapinga atu, to tatou ngakau. (Ezera 7:10) Ka rauka ia tatou pouroa i te akamaroiroi tetai e tetai na te tuatua anga ma te ngakau akaaka. (Roma 1:11,12) Te raurau atu nei matou kia akapapa vave te katoatoa no te apii Pipiria, te akapou anga i te taime i te akara i te au irava. Ka tauturu teia i te katoatoa kia oronga e kia rauka te puapinga maata mei te apii. Kia riro ta tatou au uriurianga akatumuia ki runga i teia puka, e to te reira akaketaketa anga i runga i te au tumu tuatua mei te Pipiria uaorai, e akavaitata rotai ia tatou i roto i te akamorianga taokotai, tauturu i te aronga ngakau tika kia piri mai kia tatou i te akamorianga iaia e, tei maata rava atu, kia rauka ia ratou i te akatupu atu i to tatou ariki rekareka anga no Iehova, te Atua mou anake, tei Ngateitei i te Ao Katoa e Pini Ua Ake, e te Metua aroa o tana tamariki katoatoa. Kia puapinga pu tikai tatou katoatoa mei teia orongaanga meitaki i te pae vaerua.