Kia Tuatua Akamatutu Atu i Roto i Taau Apiianga
1. Eaa te o putuputu mai ana ki te taangaanga tukatau anga i te Tuatua a te Atua i roto i te angaanga orometua?
1 Te au orometua tukatau mei te apotetoro ko Paulo, kua marama ratou e eaa te o maira ki roto “i te akono meitaki anga i te tuatua mou,” i to te taiku ua i te au Tuatua Tapu. (2 Timo. 2:15, NW) Me taangaanga i te Tuatua a te Atua, ka akapeea tatou me taangaanga i te “tuatua akamatutu” i roto i ta tatou apiianga?—Anga. 28:23.
2. Akapeea tatou te tauturu anga i te tangata kia maata atu te akangateitei no te Tuatua a te Atua?
2 Akaari i ta te Tuatua a te Atua e Akakite Ra: Mea mua, e taki i te manako ki roto i te Pipiria na roto i te tu te ka akatupu i te akangateitei no te tu pakari o te Atua. Penei na to tatou tu irinaki i te Tuatua a te Atua e akakeu i te aronga e akarongo maira ia tatou, kia akarongo meitaki ki te tatauanga o tetai irava. (Ebe. 4:12) Penei e karanga tatou e: “Rauka iaku te tauturu maata i te kite i to te Atua manako no runga i teia mea. Akara ana ra i ta tana Tuatua e akakite maira.” Me ka rauka, akaari i ta te Tuatua a te Atua e akakite ra na te tatau tika atu anga mei roto i reira.
3. Me oti te tatau i tetai irava, eaa te ka anoanoia ei tauturu i te tangata e akarongo maira ia tatou kia marama i te aiteanga o te reira?
3 Te rua, akamarama i te irava tei taangaangaia. Maata te tangata e ngata ana kia marama i tetai irava i te taime mua i tatauia mai ei. Maata te taime ka anoanoia kia akamarama i te irava kia papu e eaa te aiteanga. (Luka 24:26, 27) E akaari i te au manako maata. Penei na te ui anga i tetai uianga e akapapu e kua marama aia i te reira.—Mase. 20:5; Anga. 8:30.
4. Eaa te takainga openga ka anoanoia kia rauka i te tuatua akamatutu atu i roto i ta tatou apiianga?
4 Uriuri no Runga i te Au Tuatua Tapu: Te toru, e tauta kia taeria te manako e te ngakau. Tauturu i te pu ngutuare kia kite e peea aia me taangaanga i te irava kiaia uaorai. Na te uriuri anga no runga i te au Tuatua Tapu e akamatutu i tetai tangata kia taui i tona aerenga manako. (Anga. 17:2-4; 19:8) Ei akaraanga, me oti te tatau ia Salamo 83:18 ka rauka ia tatou kia uriuri e peea te kite anga i te ingoa o tetai tangata i puapinga ai i roto i te akatupu anga i tetai pirianga. I reira, penei e ui e, “I toou manako e ka riro te kite anga i to te Atua ingoa i te akaoonu roa atu i te aiteanga o ta tatou pure?” Na te akapiri atu anga i te irava ki te oraanga o te pu ngutuare na roto i teia tu, te akaari maira te reira i te puapinga o te irava. Ka riro taua tu apiianga akamatutu mei roto i te Tuatua a te Atua ei akavaitata mai i te aronga ngakau tika kia akamori i te Atua mou e te ora, ko Iehova.—Iere. 10:10.