Te Akangateitei ra Ainei Koe i te Tuatua a te Atua?
1 I roto i tetai ao e putuputu ana i te akangateitei kore i te Pipiria, te akakitekite maroiroi ra te au Kerititiano mou i te Tuatua a te Atua. Akapapuia e “te au tuatua tapu katoa i tataia ra, e mea akauruia mai e te Atua,” te ariki ra tatou i ta Iesu Karaiti i akakite kia Iehova na roto i te pure e: “Ko te tuatua aau na te tuatua-mou.” (2 Timo. 3:16; Ioane 17:17) Akapeea tatou i te akangateitei meitaki anga i te Tuatua a te Atua?
2 Tamou i te Au Irava: Kare e ekoko e kua maroiroi a Iesu i te apii anga i te Tuatua a te Atua. Kua tauturu teia iaia i te apii atu mei te au Tuatua Tapu i roto i te au ngai katoa o tana angaanga orometua. (Luka 4:16-21; 24:44-46) Akapeea tatou i te akamaaraanga i te au putunga irava? Ka rave tatou teia na te tatauanga i te Pipiria i te au ra tataki tai e te akamanako oonu anga i reira ki runga i tetai irava ta tatou i kite mai ei akamaroiroianga tikai me kore ei tauturuanga no te angaanga orometua. I te akapapaanga no te au uipaanga, kia akara e kia tatau tatou i te au irava taikuia no roto mai tikai i te Pipiria e penei kia akapapa i tetai pauanga no runga i te reira. I te aere atu anga ki te au uipaanga, kia aru kapiti atu tatou i roto i ta tatou Pipiria i te vaa tuatua e tatau maira i te au irava. I te tamou anga i te au irava Pipiria, ka akapapa te reira ia tatou kia ‘akono meitaki i te tuatua mou ra.’—2 Timo. 2:15, NW.
3 E Tuku e na te Pipiria e Tuatua Atu: Ia tatou e piri atura ki roto i te angaanga orometua, kia tuku tatou e na te Pipiria e tuatua atu. Ei akaraanga, me te tau ra te au turanga, kia tauta tatou i te oronga i tetai irava ki te tangata ngutuare. Me ui mai aia i tetai uianga me kore ka patoi mai aia, e mea meitaki atu kia taangaanga i te Pipiria i te oronga anga i te pauanga. Me kare o te tangata ngutuare taime, penei ka rauka rai ia tatou i te akakite atu i tetai manako Pipiria i te na ko anga, “I mua ake ka aere ei au, ka tika ia koe kia tatau ua atu au i teia irava kia koe.” Me rauka tetai ua atu tuatau, e tatau no roto mai tikai i te Pipiria, tuku anga i te tangata akarongo kia aru katoa mai ia koe e tatau ra.
4 I te akaariia atu anga ki tetai tangata ngutuare i te au irava e patoi ra i te Toru Tai, kua karanga aia, “I toku oraanga katoa kua aere ana au ki te pure, e kare roa au i kite ana e te akakite maira te Pipiria i teia!” Kua ariki ua aia i tetai apii Pipiria. Kua karanga oki a Iesu e ka akarongo tana au mamoe i tona reo. (Ioane 10:16, 27) Te mataara meitaki rava atu no te aronga ngakau tika kia kite mai i te tuatua mou koia oki i te kite atu anga i te reira no roto mai tikai i te au Tuatua Tapu. Kia riro tatou i reira ei aronga akangateitei no te tuatua mou i te Tuatua a te Atua!