Kua Kite Ainei Koe i Taau Au Ikianga?

Te maata ua atura te vavaianga kare e taangaanga ana i te toto te raveia ra i te au ngai rapakauanga maki takapini i teianei ao. Kua marama meitaki ainei koe i te au ikianga ka rauka i roto i te au rapakauanga kare e taangaanga ana i te toto? Ka inangaroia koe i te kite kia rauka ia koe i te akono i te au ikianga no runga i te rapakauanga i te pae vairakau e te vavaianga. E akara i te vitio No Blood​—Medicine Meets the Challenge. I muri ake, e akara akaou ma te pure i taau i kite ma te tauturu a te au uianga i raro ake.​—Akakiteanga: No te mea kua kapitiia mai te au tutu poto ua no te vavaianga, e mea tau kia matakite te au metua i te akarakara anga i te vitio ma ta ratou au tamariki rikiriki.

(1) Eaa te tumu maata i patoi ei te Au Kite o Iehova i te au pamuanga toto? (2) Me tae mai ki te ravenga rapakau, eaa ta te Au Kite o Iehova e inangaro ra? (3) Eaa te tikaanga tau o te aronga maki? (4) Eaa ra i tau ei e te mako kia iki i te au ravenga ke atu no te pamuanga? (5) Me pakari ake te pou o te toto, eaa ta te au taote nga ikianga viviki e rua ka rave? (6) Eaa te au kaveinga e a no te akanoonooanga no te au ravenga ke atu no te pamuanga? (7) Akapeea te au taote i te (a) akaite mai i te pouanga toto, (e) akono kia kore e pou te au teera toto muramura, (nga) akamaata i te toto, e (i) akaoki akaou mai i te toto tei pou? (8) Akamarama mai i te au ravenga tei kiteaia e ko te (a) haemodilution e te (e) cell salvage. (9) Eaa taau ka inangaro kia akakiteia atu no runga i tetai atu ravenga ke no te pamuanga? (10) Ka rauka ainei kia raveia te vavaianga kino e te ngata ma te kore e pamu toto? (11) Eaa te tupuanga papu e raveia nei i roto i te au ngai rapakauanga?

Te ariki anga i etai o teia au rapakauanga tei akaariia i roto i te vitio, e tumu ia no te tukuanga tika uaorai tei tau ki te akava ngakau tataki tai o tetai tei tereniia e te Pipiria. Kua iki ainei koe i tetai turanga taka meitaki no runga i te au rapakauanga e te au ravenga taau ka ariki koe noou uaorai e no taau tamariki, e kia akaki i tetai kati HCD? No tetai au uriuri anga katoa no teia au mea nei, e akara meitaki akaou i te “Au Uianga a te Aronga Tatau” i roto i te nga itiu o Tiunu 15, 2004, e Okotopa 15, 2000, o Te Punanga Tiaki. I reira e taangaanga i te au kapi i roto ake i Ta Tatou Angaanga Patireia o Noema 2006, “Eaa Toku Manako no Runga i te Au Tuanga o te Toto e te Rave Anga Rapakau no Runga i Toku Uaorai Toto?,” kia rave i taau uaorai ikianga no runga i te au ikianga taau ka ariki me kore ka patoi. I te openga, e akapapu e kua tata taka meitaki koe i taau au ikianga ki roto i taau kati HCD. Ko taau aronga rapakau i iki, e e tetai ua atu mema pamiri kare i te Kite, kia akamarama meitakiia atu taau au ikianga.