Te Tukutuku Ua Atura Ainei Koe?

Tukutuku ua atu i teaa? I te akaki anga i te kati HCD (Health Care Directive) tei orongaia mai no te Au Kite papetitoia. No “tei kore [koe] i kite i te ka tupu apopo,” e mea puapinga maata kia iki koe i mua roa ake e kia akakiteia na te tataanga e eaa te au rapakau anga e te au ravenga taau ka ariki i roto i tetai maki anga tupu poitirere ua. (Iako. 4:14; Anga. 15:28, 29) Ei tauturu ia koe, kua maaniia te vitio Transfusion-Alternative Health Care​—Meeting Patient Needs and Rights. Akara ia, e oti uriuri meitakiia ma te pure i taau i tamou mai ma te tauturu a teia au uianga i raro nei.​—Akakiteanga: No te mea kua kapitiia mai te au tutu poto ua no te vavai anga, e mea tau kia matakite te au metua i te akarakara anga i te vitio ma ta ratou tamariki rikiriki.

(1) Eaa ra te au tangata rapakau i akara akaou ei i te taangaangaia anga i te pamuanga toto? (2) E oronga mai i nga akaraanga e toru no te vavaianga ngata tei raveia ana ma te kore te pamuanga toto. (3) Eia au taote e te au taote vavai takapini i te ao nei tei akakite mai i to ratou inangaro i te akono i te aronga maki ma te kore te pamuanga toto? Eaa ratou i inangaro ei i te rave i te reira? (4) Eaa ta te au apii ua akenei a te are maki i kite mai no runga i te taangaanga anga i te toto? (5) Eaa te au kino i te pae vairakau te piri atura ki te pamuanga toto? (6) Eaa te manakoanga openga ta te aronga karape e manganui i kite mai no runga i te puapinga o te ravenga ke atu o te pamuanga? (7) Eaa te akatupu ra i te anaemia? Mei teaa te roa e rauka ai i te kopapa o te tangata i te akakoromaki i te reira? Eaa te ka rauka kia raveia ei pau atu i te reira? (8) Akapeea e rauka ai i te au teera toto muramura i te akamaataia i roto i te kopapa o tetai tangata maki? (9) Eaa te au ravenga e taangaangaia ana kia akaiti mai i te pou o te toto i te tuatau o te vai anga? (10) Ka puapinga ainei te ravenga ke atu o te pamuanga no te tamariki ou me kare no te au tangata tei o atu i roto i tetai au tupuanga tapapa koreia ei kino tikai ki te oraanga? (11) Eaa tetai o te au kaveinga maata i te pae akono no te ravenga rapakau meitaki? (12) Eaa ra i puapinga ai no te Kerititiano kia rave i te au ikianga i mua ake no te rapakauanga kare e toto? Akapeea tatou i te raveanga i te reira?

Ko te ariki anga i etai o teia au rapakau anga tei akaariia i roto i teia vitio e tumu ia no te tukuanga tika uaorai tei tau ki te akava ngakau tataki tai o tetai tei tereniia e te Pipiria. Kua iki ainei koe i tetai turanga taka meitaki no runga i te au rapakauanga e te au ravenga taau ka ariki koe noou uaorai e no taau tamariki? No tetai au uriuri anga katoa no teia au mea nei, e akara i te “Au Uianga a te Aronga Tatau” i roto i te au itiu o Tiunu 15, 2004, e to Okotopa 15, 2000, o Te Punanga Tiaki e te kapi i roto ake “Eaa Toku Manako no Runga i te Au Tuanga o te Toto e te Rave Anga Rapakau no Runga i Toku Uaorai Toto?” i roto i te itiu o Ta Tatou Angaanga Patireia o Noema 2006. Ko te aronga tei ikiia e koe no teia tupuanga poitirere e tetai ua atu au mema o toou pamiri kare i te Au Kite ka anoano katoaia ratou kia akakite pu tikaiia i taau au ikianga.