Tauturu no te Au Pamiri

1. Akapeea te au pamiri Iseraela i puapinga ai mei te Sabati epetoma?

¹ Te akono anga i te Sabati e akanooanga aroa na Iehova, ka puapingaia te au pamiri. Kua akangaroi te ngati Iseraela mei ta ratou angaanga noa ua nei, e kua akapou i te taime i te akaata i to Iehova tu meitaki e to ratou pirianga kiaia. Ka rauka i te au metua te taangaanga i teia atianga kia apii tamou i te Ture ki roto i te ngakau o ta ratou tamariki. (Deu. 6:6, 7) Kua akanoo te Sabati i tetai tuatau o te epetoma tataki tai no te iti tangata o Iehova kia tamou i te manako ki runga i to ratou turanga pae vaerua.

2. Eaa ta te Sabati e apii maira ia tatou no runga ia Iehova?

² Tika rai, kare a Iehova e umuumu mai ana i te au pamiri kia akono i te Sabati. Tera ra, te apii maira taua ture ra ia tatou no runga i to tatou Atua. I manako oonu ua ana rai aia i tona iti tangata i te pae vaerua. (Isa. 48:17, 18) Teia tuatau, tetai ravenga ta Iehova e akaari maira i teia manako aroa koia oki na roto i te Akamorianga a te Ngutuare i te aiai.

3. Eaa te akakoroanga o te Akamorianga a te Ngutuare i te aiai?

³ Eaa te Akakoroanga o te Akamorianga a te Ngutuare i te Aiai? Roto ia Tianuare 2009, kua akamata te Apii Puka a te Putuputuanga i te raveia i te aiai e raveia ana te Apii Orometua Teokaratiki e te Uipaanga Tavini Anga. Tetai tumu no teia tauianga, koia oki kia oronga i te atianga no te au pamiri i te akaketaketa i to ratou pae vaerua na te akanooanga i tetai aiai taka meitaki i te epetoma, no te akamorianga a te ngutuare. Kua akamaroiroiia te au pamiri tataki tai kia neke i ta ratou apii pamiri ki te po e taangaangaia ana i mua ana no te apii puka me ka tau, e kia taangaanga i teia taime no te uriuri meitaki anga i te Pipiria e te rave i tetai apii tei tau ki te anoano o te pamiri.

4. Ka kotinga ainei te pamiri i ta ratou uriuri anga ki te ora okotai? Akamarama mai.

⁴ Kia tae ki te Apii Puka a te Putuputuanga, e anoano ana tatou i te taime no te akamanea, aere atu anga, e te vai atura. Te maataanga ia tatou, ka pou rai te aiai katoa i te akapapa kia tae atu ki teia uipaanga okotai ora. Na te au tauianga ki te akanooanga o ta tatou uipaanga, kua rauka ia tatou i teianei teia aiai i te akamori ia Iehova ei pamiri. No reira, eiaa tatou e kotinga i ta tatou Akamorianga a te Ngutuare i te aiai ki te okotai ua ora. E akamanako ra tatou i te au anoano e te au kotinga o to tatou pamiri e kia akanoo i te taime tau no te reira.

5. Ka akapou ainei te taime katoa ki te uriurianga a te pupu? Akamarama mai.

⁵ Ka Akapou Ainei te Taime Katoa ki te Uriurianga a te Pupu? Me uriuri kapiti te au tokorua akaipoipo e te au pamiri e tamariki tetai i te au tumu manako Tuatua Tapu, te akamaroiroi ra ratou tetai i tetai. (Roma 1:12) Ka piri vaitata te pamiri. No reira, te au uriurianga Tuatua Tapu i riro ei ko te tuanga puapinga roa atu o te Akamorianga a te Ngutuare i te aiai. Tera ra, ka tau te au mema o te pamiri kia akapou katoa i te taime no te apii na ratou uaorai. Ei akaraanga, muri ake i te uriurianga a te pupu, penei ka noo kapiti ua te pamiri i te au mema e apii takake atura, penei i te akaoti i tana akapapaanga no te au uipaanga me kore no te tatau i te au makatini. Tetai au pamiri e tamate ana i te tivi i te aiai katoa.

6. Akapeea te uriurianga me raveia?

⁶ Akapeea te Uriurianga Me Raveia? Kare te akanooanga e anoanoia ei uriurianga ua i te uianga e te pauanga. Kia riro te Akamorianga a te Ngutuare i te aiai ei mea oraora e te mataora, e akanoo ana te au pamiri i tetai porokaramu te aite ra ki ta tatou uipaanga o te epetoma. E akatuanga ana ratou i te uriurianga e e rave ana i te reira i roto i te au mataara tukeke. Ei akaraanga, penei ka tatau kapiti ratou i te Pipiria, akapapa i tetai tuanga o te au uipaanga, e te apiipii no te angaanga orometua. Oronga maira te kapi 6 i tetai au manako.

7. Eaa te turanga ta te au metua ka tauta kia rauka?

⁷ Eaa te Turanga ta te Au Metua ka Tauta kia Rauka? Ka ngoie te apii a te pamiri i roto i tetai turanga aroa e te tau meitaki. Penei ka raveia te apii ki vao i te are, me meitaki te reva. Tapu poto me ka inangaroia te reira. Tetai au pamiri e katikati ana i muri ake i te porokaramu. Ka tau te au metua kia kopae i te akariro i te Akamorianga a te Ngutuare i te aiai ei taime karo me kore ako, penei e akapou i te taime i te akara atu i tetai tu me kore manamanata ta raua i kite mai. Tera ra, e meitaki atu i te uriuri i te au manamanata ngata uaorai ki te tamaiti anake ua i tetai taime ke o te epetoma, kia kore e taakama i te tamaiti i mua i tona ai teina e te tuakana. Kare e inangaroia te Akamorianga a te Ngutuare i te aiai ei atianga maromaroa e te ngata, kia akaata ra e e Atua mataora ta tatou e akamori nei.​—1 Timo. 1:11.

8, 9. Eaa te akapapa anga e umuumuia ra e te au upoko pamiri?

⁸ Akapeea te Upoko o te Pamiri Me Akapapa? Ka puapinga maataia te pamiri me kua akapapa meitaki te upoko i mua ake i te Akamorianga a te Ngutuare i te aiai tataki tai, na te ikianga e eaa te ka uriuriia e akapeea me rave i te reira. (Mase. 21:5) E meitaki atu me ui te tane ki tana vaine no runga i teia. (Mase. 15:22) E te au upoko pamiri, eaa ei koe kore e ui ki te tamariki i tetai taime i ta ratou tamanakoanga? Me pera koe, ka rauka ia koe te kite puapinga i to ratou anoano e te au manamanata.

⁹ I te maata anga o te au epetoma kare e pou maata te taime no te upoko pamiri kia akapapa. Kare e kore, ka mataora te pamiri i tetai au tuanga matauia i te epetoma tataki tai, e kare e inangaroia i tetai porokaramu ou i te au taime ravarai. Penei e meitaki atu me akapapa aia i muri ake i te oti anga te apii tataki tai, koi kite ei aia i te au anoano pae vaerua o te pamiri. E tata ana tetai au upoko pamiri i tetai papaanga poto e e tamou ana ki tetai ngai ka kite te katoatoa, mei te kaparata akaanu kai. Ka mataora e ka tapapa atu te pamiri kia akapapa meitaki me ka anoanoia.

10. Akapeea te aronga e noo ra ko ratou ua i te taangaanga i ta ratou Akamorianga a te Ngutuare i te aiai?

¹⁰ Akapeea Me Ko Au Ua to Roto i Toku Pamiri? E taangaanga ana te aronga e noo ra ko ratou ua i te Akamorianga a te Ngutuare i te aiai no te apii na ratou uaorai. E kapiti mai ki te porokaramu meitaki i te apii naau uaorai, te tatau anga Pipiria, akapapa no te au uipaanga, e te tatau anga i Te Punanga Tiaki e te makatini E Ara! Tetai au papuritia e rave ana i tetai apii kimikimianga na ratou uaorai. Tetai taime, penei ka pati ratou i tetai papuritia ke me kore pamiri kia kapiti mai no tetai uriurianga Tuatua Tapu akamaroiroi.

11, 12. Eaa tetai au puapinga me rave putuputuia te Akamorianga a te Ngutuare i te aiai?

¹¹ Eaa te Au Puapinga me Rave Putuputuia te Akamorianga a te Ngutuare i te Aiai? Ka akavaitata atu te aronga e rave ngakau katoa ra i te akamori mou kia Iehova. Tetai katoa, ka akaketaketa te au pamiri e akamori kapiti ra i to ratou pirianga pamiri. Kua tata tetai tokorua akaipoipo no te au akameitakianga ta raua i mataora e: “Ei nga tokorua painia kare e tamariki, e reka ana maua i ta maua Akamorianga a te Ngutuare i te po. Manako maua e te akavaitata ra maua kia maua uaorai e ki to maua Metua i te rangi. Teianei me ara mai maua i te ra o ta maua apii, e karanga ana maua tetai ki tetai e: ‘Kite koe eaa teia po? E po Akamorianga na te Ngutuare!’”

¹² E tauturu katoa ana te akanooanga o te akamorianga a te ngutuare i te aiai i te au pamiri e maata ta ratou angaanga. Tetai metua vaine takaua e painia tamou, e utuutu ra e rua tamariki tamaroa kua tata e: “I mua ana, kare e raveia ana ta matou apii pamiri. Taki tai ua ake taime e kare putuputu ana te reira no te mea kua roiroi au. Kare au i kite e ka akapeea au. No reira au i tata atu ei i te akameitaki maata ia kotou no te Akamorianga a te Ngutuare i te aiai. Kua puapinga ta matou apii pamiri putuputu e te kite nei matou i te au meitaki.”

13. Eaa te akaari maira i te puapinga ka rauka i toou pamiri mei teia akanooanga?

¹³ Mei te Sabati rai, e apinga aroa te Akamorianga a te Ngutuare i te aiai, na to tatou Metua i te rangi te ka tauturu i te au pamiri. (Iako. 1:17) Te ravenga e taangaanga ana te au pamiri Iseraela i te Sabati, te akaari maira e kua puapinga ratou i te pae vaerua. Mei te reira rai, te ravenga ta tatou e taangaanga ra i te aiai tei orongaia mai no te akamorianga a te ngutuare, ka akaari mai e ka puapingaia to tatou pamiri. (2 Kori. 9:6; Gala. 6:7, 8; Kolo. 3:23, 24) Na te taangaanga meitaki anga i teia akanooanga, ka rauka toou pamiri kia tuatua i te manako o te tata taramo e: “E mea meitaki ra iaku kia akavaitata atu ki te Atua: kua irinaki au i te Atu ra, ia Iehova.”​—Sala. 73:28.

[Tataanga i te kapi 5]

Kare e inangaroia te Akamorianga a te Ngutuare i te aiai ei atianga maromaroa e te ngata, kia akaata ra e e Atua mataora ta tatou e akamori nei

[Pia i te kapi 6]

AKAPUTU

I Tetai Au Manako no te Akamorianga a te Ngutuare i te Aiai

Pipiria:

• Tatau kapiti i tetai tuanga o te tatauanga Pipiria i te epetoma. Me ka tau te reira, penei e tatau tetai tangata i te tua, e na tetai ke e tatau i te au tuatua a te au tangata tuketuke.

• Akatutu i tetai tuanga o te tatauanga Pipiria.

• Akanoo kia tatau tetai mema pamiri i te au pene Pipiria tei akatakaia i mua ake, e kia tata e tai me kore e rua uianga tana i rauka no te tatauanga. I reira e kimikimianga kapiti i te au uianga a te katoatoa.

• I te au epetoma tataki tai, akapapa i tetai kati e irava Pipiria to runga, e e tamou ngakau e e akamarama mai i te reira. Akaputu i te au putunga kati, e e uriuri i te reira i te au epetoma kia kite e eia au irava ka maara.

• Akarongo i tetai tepu no te tatauanga Pipiria ia kotou e aru ra i roto i ta kotou Pipiria.

Au Uipaanga:

• Akapapa kapiti no tetai tuanga o te au uipaanga.

• Apiipii i te au imene Patireia tei akanooia no te epetoma ki mua.

• Me e akoanga ta tetai tangata i runga i te Apii Orometua Teokaratiki me kore e akatutuanga i runga i te Uipaanga Tavini Anga, uriuri i te au manako no te orongaanga, me kore e akatutu i mua i te pamiri.

Au Anoano o te Pamiri:

• Akara i te au tuanga i roto i te nga puka Young People Ask me kore Learn From the Great Teacher.

• Rave i tetai apiipii no te pau atu i tetai turanga te ka tupu i te apii.

• Rave i tetai apiipii, akatutu te metua i te tamariki, e te tamariki i te metua. Kimikimi te tamariki i tetai tumu manako e oti uriuri ki te nga metua.

Angaanga Orometua:

• Apiipii i te au orongaanga no te openga epetoma.

• Uriuri i te au akakoroanga ta te pamiri ka akanoo kia maata atu ta ratou tuanga i te angaanga orometua i te tuatau Akamaaraanga me kore orote.

• Oronga ki te mema tataki tai o te pamiri i nga miniti ua kia rave i te kimikimianga, akapeea i te pau i te au uianga tukeke te ka tupu i roto i te angaanga orometua, e oti apiipii i teia.

Au Manako Ke:

• Tatau kapiti i tetai atikara i roto i te au makatini ou.

• Akanoo i te mema tataki tai o te pamiri kia tatau i tetai atikara e umere ra aia i mua ake, mei te au makatini ou, e oti kia ripoti mai i te reira.

• Tetai taime pati i tetai papuritia me kore nga tokorua kia kapiti mai ki ta kotou Akamorianga a te Ngutuare i te aiai e penei e uiui ia ratou.

• Akara e oti uriuri i tetai o ta tatou vitio.

• Uriuri kapiti i te “Ui te Au Mapu e” me kore “Uriuri Anga na te Ngutuare” i te makatini E Ara!

• Uriuri kapiti i te “Apii i Taau Tamariki” me kore “No ta Tatou Au Mapu” i roto i Te Punanga Tiaki.

• Tatau e oti uriuri i tetai tuanga o te Yearbook ou me kore tetai puka ou mei te uruoaanga i topa akenei.

• Muri ake i tetai uruoaanga me kore akaputuputuanga, uriuri i te au akakiteanga.

• Akara i te au mea angaia e Iehova, e oti uriuri e eaa ta te reira e apii maira ia tatou no Iehova.

• Angaanga kapiti i tetai apiianga mei tetai apinga maaniia, tetai mapu, me kore e chart.