Te Tuatau Akamaaraanga—E Taime no te Akamaata i te Angaanga!
1. Eaa te au tumu ka akamaata atu ei tatou i ta tatou angaanga ia Mati, Aperira, e Me?
1 Ka rauka ainei ia koe te akamaata atu i taau angaanga orometua no te tuatau Akamaaraanga e tu mai nei? Maata te au ngai ka meitaki te reva e ka roroa atu te au ra. Ka orote tetai au papuritia mei te angaanga me kore te apii te ka rauka ia ratou kia taangaanga no te angaanga orometua. Akamata ia Aperira 2, ka raveia tetai kamupeini takake i te pati i te aronga e inangaro maira kia kapiti mai kia tatou no te Akamaaraanga, a te ra 17 o Aperira. Muri ake, ka tauta tatou i te akatupu i te inangaro o te aronga tei tae mai, e ka pati ia ratou ki tetai akoanga takake ka orongaia i te epetoma o Aperira 25. Ae, e maata te au tumu no te akamaata atu i ta tatou angaanga i te marama o Mati, Aperira, e Me.
2. Eaa tetai mataara meitaki roa atu i te akamaata i ta tatou angaanga orometua?
2 Painia Tauturu: Tetai mataara meitaki roa atu i te akamaata i te angaanga, ko te painia tauturu. No te mea e maata ta tatou pouroa angaanga, ka umuumuia te parani anga i mua ake e te akatano anga i ta tatou papaanga. (Mase. 21:5) Penei ka rauka ia koe te tuku atu i te au angaanga kare e anoano vaveia. (Phili. 1:9-11) Kore ei e akakite e ka inangaro koe i te painia ki etai ke i roto i te putuputuanga, penei ka piri mai ratou kia koe ei painia tauturu?
3. Akapeea e rauka ai i te au pamiri i te akamaata atu i ta ratou angaanga?
3 I ta kotou Akamorianga a te Ngutuare i te aiai ka aru mai, e meitaki i te uriuri i to kotou akakoroanga ei pamiri. (Mase. 15:22) Me angaanga kapiti te pamiri, penei ka rauka i tetai au mema o te pamiri i te painia tauturu no tetai me kore maata atu te au marama. Akapeea me te manako ra koe e kare e rauka teia? Ka rauka i te pamiri kia akamaata atu i ta ratou angaanga na te piri anga ki te angaanga orometua i tetai au aiai, me kore na te tutu anga kia roa atu i te au openga epetoma.
4. Eaa te au akameitakianga ka tupu mai me akamaata atu i ta tatou angaanga orometua i te tuatau Akamaaraanga?
4 Te kite maira a Iehova i ta tatou pouroa e rave ra i te tavini iaia, e te akameitaki ra i ta tatou au atinga. (Ebe. 6:10) Tupu te mataora i te oronga anga kia Iehova e ki etai ke. (1 Para. 29:9; Anga. 20:35) Ka rauka ainei ia koe te akamaata i taau angaanga i te tuatau Akamaaraanga, kia kite i te mataora e te au akameitakianga ka tupu mai?